ဝိုၚ်မဝ်၊ နိုဝ်ဝေန်ဗာ (၁)
ဗတိုက်သီကေတ်လဝ် ကုန်ဗျူဟာကာန်တောၚ်ယာန်ကံၚ်ဇြဳပၞာန် မၞုံဂၠံၚ်ကွဳစက် မျေတ်ဂျဳနာ – ဗာန်မဝ် တွဵုရးကချေၚ် ပၟိက်ဇၞော်ဒၟံၚ် သွက်ပရေၚ်ပၞာန်ရဂှ် ညးတာလျိုၚ်လလောၚ်ပရိုၚ် KIA/KIO သ္ကိုပ်ဗိုလ်ဇၞော်နဝ်ဗူ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကုန်ဗျူဟာဂှ် တ္ၚဲဏံ ဂိတုအံက်တဝ်ဗာ စၟတ်တ္ၚဲ ၃၁ အခိၚ်နူဂယး ၜိုတ် ၆ နာဍဳဂှ် ဒပ်ပၞာန်ဗၠးၜးကောန်ဂကူကချေၚ် KIA ၊ ဒပၞာန်ရခေၚ် AA ကေုာံ ဒပ်ပံၚ်ကောံတအ် လုပ်စိုပ်ဗတိုက်လဝ်တုဲ ပ္ဍဲအခိၚ်နူဂယး ၜိုတ် ၈ နာဍဳ သီကေတ်မာန်လဝ်ရ။
ကုန်ဗျူဟာကာန်တောၚ်ယာန် ဒးဒုၚ်သီကေတ်လဝ်ဂှ် ဒှ်ဗဒိုပ်ကံၚ်ဇြဳပၞာန် ဖျေံလဝ်သ္ဇိုၚ် လအ်ပွိုၚ်မွဲဗွဝ်စှ်သၞာံ ဒှ်တုဲ ပ္ဍဲပေါဲဗတိုက်ဂှ် အကာဲအရာ လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ်ကဵု အကာဲအရာသီဂွံလဝ် လွဟ်လက်နက်မကမ်တအ်ဂှ် လ္ပာ် KIA လလောၚ်တြးပ္တိတ်လဝ်ဂှ် ဟၟဲဏီရ။
ကြဴဴနူပေါဲဗတိုက် ဒှ်တုဲဂှ် ပ္ဍဲကဵုကွာန် နွံမံၚ်ဗ္ဒာဲကရပ်တအ် ပါလုပ်သီုကုန်ဗျူဟာဂှ် ပါဲနူပန်ကဵုက္ၜၚ်ကျာတုဲ ဟိုတ်နူဗတိုက်ပန်ဖျေံဒၟံၚ်လွဟ်ဇၞော်တုဲ သ္ၚိဒၟံၚ်ကောန်အရာပ် (၆) မ တူပၟတ် ဒှ်အာပတေၚ်ရဂှ် ဟီုလဝ်ရ။
ဒပ်ကံၚ်ဇြဳပၞာန် ဒးဗလးလဝ်တဲကုန်ဗျူဟာဂှ် တ္ၚဲဏံ အခိၚ်ဒေါဝ်တ္ၚဲ ၜိုတ် ၂ နာဍဳ ပ္ဍဲကဵုကုန်ဒဵုအလာမ်ဗွမ် (အလာန့်ဘွမ်) မၞုံဗ္ဒာဲဍုၚ်လိုၚ်ဇြာ ဌာန်ဂအုပ် KIO ဂှ် ဂြာတ်ထောံဖျေံဗုမ် ဗတိုက်လဝ်ကဵုက္ၜၚ်ကျာ ၃ အလန်ရဂှ် ဂွံတီကေတ် နူညးဒေသတအ်ရ။
ဂကောံမဟာမိတ်ကောဒေံ ၃ ဂကောံ က္ဍိုက်ဒၟံၚ်က္ဍိုပ် ပရေၚ်ချဳဒရာၚ်ပၞာန် ၁၀၂၇ ဂှ်မ္ဂး ဟိုတ်နူပန်ဖျေံဒၟံၚ်လွဟ်ဇၞော် နူကဵုဗဒိုပ်ကံၚ်ဇြဳပၞာန်ခါယာ ပ္ဍဲမွဲဗွိုၚ်လိုၚ်ဇြာ ဒၞာဲဌာန်ဂအုပ် KIA နွံဒၟံၚ်ဂှ်တုဲ ပ္ဍဲကဵုဗဒိုပ် AA မၞုံဗ္ဒာဲဗဒိုပ်ပါဲပၞာန် မုမ်လိုၚ်ခေတ် သ္ၚောဲခရာၜိုတ် ၂ မိုၚ်ဂှ်လေဝ် ဒတုံစှ်ေပါ်ခတိုဟ်လဝ်ရဂှ် တ္ၚဲဏံလလောၚ်တြးပ္တိတ်လဝ်ရ။
ပ္ဍဲဂိတုအံၚ်တဝ်ဗာ စၟတ်တ္ၚဲ ၃၀ ဂှ်လေဝ် ဗဒိုပ်ဗျူဟာ ခမရ ၃၂၄ မၞုံသၟဝ်ဌာန်ဂအုပ်ပၞာန်ဒိုဟ်ဨသာန် မၞုံမုမ်မဝ်၊ ဏာမ်ဟိုၚ် ပွိုၚ်ဍုၚ်နာမ္မတူ တွဵရးသေံသၟဝ်ကျာဂှ်လေဝ် ဒပ်မဟာ ၄ KIA ဗတိုက်သီကေတ်မာန်လဝ်ရဂှ် ဓမံက်ထ္ၜးလဝ် ပ္ဍဲပရိုၚ်ဒေသဂှ်ရ။
ပရိုၚ် – သြၚ်လောန်တိုၚ်မ်
ဗီု -Getty Image
sanlontai