ညးယိုက်ဝန်ကံၚ်ဇြဳပၞာန် ပ္ဍဲပွိုၚ်ဍုၚ်ကျောက်ဂျဳကဵု နာတ်တာန်ကွေန်တအ် ညံၚ်ဂွံဒေါံ နူတာလျိုၚ်ဂှ် KNDO ကဵုသတိ

ကျောက်ဂျဳ၊ နဝ်ဝေမ်ဗာ (၁)

ညးဆေၚ်စပ်ပါလုပ်ဒၟံၚ် ပ္ဍဲယန္တရာပရေၚ်အုပ်ဓုပ်ကံၚ်ဇြဳပၞာန် မၞုံပ္ဍဲဒေသကျောက်ကျဳကဵု နာတ်တာန်ကွေန် တိဍာဒပ်မဟာ ၃ ဗော်သွးကောန်ဂကူကရေၚ် KNU ညးလဵုမွဲဟွံဟီု သွက်ဂွံဒေါံဇူ ပရေၚ်ကၠောန်ရေၚ်တၠုၚ်ဒၟံၚ်ဂှ် ဒပ်ပၞာန်စဵုဒၞာကောန်ဂကူကရေၚ် KNDO တံဒပ် ၃ သၟဝ်တဲ KNU ဂှ် ကဵုလဝ်သမ္တီ လလောၚ်တြးလဝ်ရ။

တၚ်လလောၚ်တြး သွက်ညးယိုက်ဝန်ကံၚ်ဇြဳပၞာန် မၞုံပ္ဍဲပွိုၚ်ဍုၚ်ကျောက်ဂျဳကဵု ဒေသဍုၚ်နာတ်တာန်ကွေန်တအ် ဂွံတီဂးတုဲ တၚ်လလောၚ်တြးစၟတ် တဲသ္ကိုပ်ကရောၚ်ပၞာန် သဝ်လှယှိုဲဟေဝ် တံဒပ် ၃ ဒပ်စဵုဒၞာကောန်ဂကူကရေၚ် KNDO ပါဂှ် ဗဟဵု KNU လလောၚ်တြးလဝ် နကဵုစၟတ်တ္ၚဲ ဂိတုအံက်တဝ်ဗာ စၟတ်တ္ၚဲ ၃၀။

အတိုၚ်တၚ်လလောၚ်တြးဂှ်မ္ဂး ညးဆေၚ်ဆက်ပါလုပ်ဒၟံၚ် ပ္ဍဲယန္တရာပရေၚ်အုပ်ဓုပ်ကံၚ်ဇြဳပၞာန် မပ္တံကဵုပရေၚ်ထတ်ယိုတ်၊ ပရေၚ်ပညာ၊ ပရေၚ်ပိုန်ဒြပ်၊ ပရေၚ်မၞိဟ်၊ ဗၠာဲသၟိၚ်၊ ပလိုတ်ပၟတ်၊ သ္ကိုပ်အုပ်ဓုပ်၊ ညးစၟတ်စရၚ်တအ် ဒှ်တံ ပါလုပ်ဒၟံၚ် ပ္ဍဲပရေၚ်အုပ်ဓုပ်ကံၚ်ဇြဳပၞာန် မၞုံဒေသတအ် ညးလဵုမွဲဟွံဟီု သွက်ဂွံဒေါံဇူ ပရေၚ်ကၠောန်ရေၚ်တၠုၚ်ဒၟံၚ်ဂှ် သ္ကိုပ်ကရောၚ်ပၞာန် တံဒပ် ၃ KNDO ကဵုလဝ်သမ္တီရ။

သ္အာၚ်နူဂှ်ပၠန် သွက်အဝဵုကံၚ်ဇြဳပၞာန် မၞုံပ္ဍဲပွိုၚ်ဍုၚ်ကျောက်ကျဳကဵု ပ္ဍဲဒေသနာတ်တာန်ကွေန်ဂှ် ဂွံဂၠိၚ် ကၠုၚ်နူဒေသသ္အာၚ်တုဲ နကဵုညးပါလုပ်ရေၚ်တၠုၚ်ဒၟံၚ်တအ်ဂှ်လေဝ် သွက်ဂွံကလေၚ်စဴဴအာ ဌာန်ဒေသဆေၚ်စပ်ကဵုဇကုဇကုဂှ် ကဵုလဝ်သတိရ။

သွက်ဂွံဒ္ဂေတ်ဗက် အတိုၚ်တၚ်လလောၚ်တြးလၟုဟ်ဏံကီု ဟွံ​ဒ္ဂေတ်ဗက်တုဲ ယဝ်ဖံက်ပ္ကဝ်ကလိလောန်ဒးမ္ဂး ဖိုလ်အဆက်က္တဵုဒှ်ကၠုၚ်တအ်ဂှ် နကဵု တံဒပ် ၃ KNDO ကေတ်အာတာလျိုၚ်ဟွံသေၚ်ရဂှ်လေဝ် ဟီုလဝ်ရ။

ပ္ဍဲပွိုၚ်ဍုၚ်ကျောက်ဂျဳကဵု ဒေသနာတ်တာန်ကွေန်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA ဒပ်မဟာ ၃ တအ် ပေါဲဗတိုက် ဒှ်ဒၟံၚ် မွဲခနမွဲခနနွံတုဲ ပ္ဍဲဂိတုဂျောန်တုဲကၠုၚ်တေံ လ္တူဍုၚ်နာတ်တာန်ကွေန်လေဝ် ပေါဲဗတိုက်သ္ကာတ်မြဟ်ဒှ်လဝ်တုဲ လ္ပာ်ဒပ်ကံၚ်ဇြဳပၞာန် ဇီုကပိုက်ဒးချိုတ်လဝ် နွံ ဗွဲမဂၠိုၚ်တုဲ လွဟ်လက်နက်ဗွဲမဂၠိုၚ်ဂှ်လေဝ် ဒပ်ပံၚ်ကောံတအ် သီဂွံလဝ်ရ။

ပရိုၚ် – သြၚ်လောန်တိုၚ်မ်

ဗီု – MOI