ဒဳပေဝ်ယေန် – နဝ်ဝေမ်ဗာ (၁)
ရးဒေသသေတ်ဂါၚ်၊ ပ္ဍဲပွိုၚ်ဍုၚ်ဒဳပေဝ်ယေန် ဟိုတ်ဟၟဲမွဲသာ် ဒပ်ကံၚ်ဇြဳပၞာန် ရပ်ဒက်ပြိုက်ဂစိုတ်လဝ် ညးဍုၚ်ကွာန် (၈)တၠရဂှ် ဂကောံထံက်ပၚ်ညးပါဲဘဲပၞာန်ဒဳပေဝ်ယေန် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုအံက်တဝ်ဗာ ပ္ဍဲကဵုနူစၟတ်တ္ၚဲ (၂၁) ကဵုစၟတ်တ္ၚဲ (၂၈)ဂှ် ထ္ပက်လုပ်ကၠုၚ်ကရောၚ်ပၞာန် လ္ပာ်ပလိုတ်ဒဳပေဝ်ယေန်တုဲ ရပ်ကေတ်ဏာလဝ် ညးဍုၚ်ကွာန် (၁၉) တၠ ပ္ဍဲကဵုဂှ် (၈) တၠ ဒးဒုၚ်ပြိုက်ဂစိုတ်ဏာလဝ်ရ။
“ပြဟ်ဟ်ဏံ ကရောၚ်ပၞာန်ကံၚ်ဇြဳပၞာန် လုပ်ဒၟံၚ် ပ္ဍဲမွဲဗွိုၚ်မုက်ဇြဳ(မုတ်ဆီ) ပယျဵယျေဥူ ဒဳပေဝ်ယေန်ရ။ နူတနေံဗ္တံတုဲကၠုၚ်တေံလေဝ် နူကဵုဒဳပေဝ်ယေန် လုပ်ပန်လဝ်တုဲ ညးဍုၚ်ကွာန် နူကွာန်မသိုဝ်ယုၚ် ဇီုကပိုက်ဒးနွံမံၚ်ဂှ် ဂွံတီကေတ်ရ။ တီဟွံကၠးဏီပုဟ်။” ဂှ် ညးတာလျိုၚ်ပရေၚ်ထံက်ပၚ် ညးပါဲဘဲပၞာန်ဒဳပေဝ်ယေန်မွဲတၠဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုညးဍုၚ်ကွာန် ဒပ်ကံၚ်ဇြဳပၞာန်ပြိုက်ဂစိုတ်လဝ်တအ်ဂှ် မၞိဟ်တြုံအယုက် (၆၀) သၞာံမွဲတၠ ဒးဒုၚ်ကုတ်ဂစိုတ်လဝ်ကအ်ကီု၊ မၞိဟ်တြုံ အယုက် (၃၄) သၞာံမွဲတၠ ဒးဒုၚ်ကုတ်လဝ်ဇိုၚ်တဲက္ဍိုပ်နွံတုဲ ညးတအ် ဒှ်ညးဂှ်ရော သ္ပဒ္တန်ဟွံမာန်ဏီရဂှ် ညးဟီုလဝ်ဏီရ။
ပ္ဍဲကဵုကရောၚ်ပၞာန်ဂှ် ဇြဟတ်ပါလုပ် ၜိုတ် (၁၀၀) တုဲ ညးဍုၚ်ကွာန် မံၚ်တန်တဴဒၟံၚ် ပ္ဍဲကွာန်မွဲဒမြိပ်ကရောၚ်ပၞာန် မွဲလက်ပြၚ်တအ် ဒးပါဲဒၟံၚ်ဘဲပၞာန်ရဂှ် ဂွံတီကေတ်ရ။
ပ္ဍဲမွဲဒမြိပ်ကရောၚ်ပၞာန်ဂှ် ညးဍုၚ်ကွာန် ဒးဒုၚ်ရပ်လဝ်တအ်ဂှ်လေဝ် ဟွံဂွံကလေၚ်ဗၠးတိတ်ကၠုၚ်ဏီတုဲ ညးဍုၚ်ကွာန် ပါဲဒၟံၚ်ဘဲပၞာန်တအ်လေဝ် နွံဒၟံၚ်ပၟိက် ဇွောံမစၞစရဂှ် ညးရီုဗၚ်ကဵုဒၟံၚ်တအ် ဟီုလဴဴလဝ်ရ။
ပရိုၚ် – သြၚ်လောန်တိုၚ်မ်
ဗီု – CJ
လိက်စၞောန်ဗီု – ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်ဒဳပေဝ်ယေန်တုဲ ညးဒေသတအ် ဒးဂြိပ်ဒဴဒၟံၚ် အခိၚ်ဗ္တံ။
sanlontai