တိုဝ်ကျိုဝ်၊ ဂျာန္နဝါရဳ ၃
သ္ကုတ်လဒေါဝ်ဍုၚ်ဂျပါန် ပ္ဍဲတ္ၚဲကၠောံသၞာံတေံ ဟိုတ်နူတိချဳဇြဟတ်သ္ကာတ် ချဳဇတဝ်အာလဝ်တုဲ ဒးဆုဲပြံၚ်လဝ် ညးဒေသလၟိဟ်မွဲကိုဋ် ဒၞါဲဗၠးဘဲတံတုဲ ဂွံဆဵုလဝ် မၞိဟ်ချိုတ်အာ ၁၃ တၠဂှ် သၟိၚ်တၠအဝဵုတံ ဟီုဂးလဝ်ရ။
တုဲကၠုၚ် ပ္ဍဲဂိတုဂျာန္နဝါရဳ ၁ တေံ ဟိုတ်နူတိချဳ ရေတ်တာသကေ ၇ ဒဿမ ၆ မၞုံမွဲ ချဳဇတဝ်အာလဝ်တုဲ စမြိုၚ်ဂမၠိုၚ် ဒးသရိုဟ်လီုလာ်အာလဝ်တုဲ သ္ၚိမၞိဟ်ဒၟံၚ် ဂၠိုၚ်ကဵုဠက် ဇြဟတ်ဓာတ် ပိုတ်အာလဝ်ရ။
ဒးတံၚ်ဂြဲပ္တိတ်လဝ်ဇွ ပ္ဍဲအကြာစမြိုၚ်သရိုဟ်စှ်ေလီုလာ်အာလဝ်တံဂှ် ဗၠာဲသၟိၚ်တံ ဟီုလဝ်ရ။
ဟိုတ်နူတိချဳဂှ်တုဲ ပ္ဍဲကဵုပြၚ်ၜဳဇမၠိၚ် ဗွဲဒိုဟ်ပလိုတ် ဍုၚ်ဂျပါန်ဂှ် ဇွိုန်လပှ် သမၠုၚ်မၞုံမွဲမဳတာ က္တဵုဒှ်လဝ်တုဲ လပှ်ထတ်လဝ် သီုဍုၚ်ကိုဝ်ရဳယျာဂှ် ဂွံတီကေတ်ရ။
အလဵုအသဳဂျပါန်ဂှ် ဟိုတ်နူတိချဳတုဲ ညးဒေသ ဗၞတ် ၁ ကိုဋ်ပြၚ် နူကဵုပြၚ်ၜဳဟိုဝ်ယှူ သ္ကုတ်ပလိုတ် မဒှ်တ္ကအ်ပၟိက်ဇၞော်ဂှ် ဆုဲပြံၚ်လဝ်ကဵုဒၞါဲဗၠးဘဲတံဂှ် သ္ဂးရ။
ပ္ဍဲဂၠံၚ်က္ၜၚ်ကျာဂြိပ် သၞေဟ်က္ၜၚ်ကျာအပ္ဍဲဍုၚ်မွဲဂှ် ဟိုတ်နူကရောၚ်ကရောန်ထ္ကးတံ က္တဵုဒှ်လဝ်ဂှ်ရ ဒးကၟာတ်လဝ်တုဲ သွက်လၟေၚ်ကမၠောန်ဟံၚ်ပြာ်တံဂှ် ဗလးလဝ် ကောန်ပၞာန်တံဂှ် ဂွံတီကေတ်ရ။
ပ္ဍဲကဵုယှဳကာ ဒေသအဳယှဳကာဝါ ကြဴနူစမြိုၚ်မွဲ သရိုဟ်စှ်ေအာတုဲ မၞိဟ်တြုံ အာယုက်ဇၞော်ဇၞော်မွဲတၠ ဒးချိုတ်အာလဝ်ဂှ် ဌာန်ပရိုၚ် NTV နိဿဲကေတ် ဂကောံဒပ်ဗၠာဲသၟိၚ်ဒေသမဆေၚ်စပ်တံဂှ်တုဲ ထ္မံက်ထ္ၜးလဝ်ရ။
သ္အာၚ်နူဂှ်ပၠန် ပ္ဍဲကဵုဒေသအဳယှဳကာဝါဂှ် မ္ၚးနူကဵုမၞိဟ်တြုံ အာယုက် ၅၀ သၞာံပြၚ်မွဲတၠ၊ မၞိဟ်ဗြဴမွဲတၠ ကေုာံ ညးသၟတ်မွဲတၠဂှ် မၞိဟ်တြုံအာယုက် ၇၀ သၞာံပြၚ်မွဲတၠ ချိုတ်အာလဝ်ဂှ် ထ္မံက်ထ္ၜးလဝ် ပ္ဍဲကဵုဌာန်ပရိုၚ် Kyodo News ရ။
ပ္ဍဲကဵုပရိုၚ်မွဲပိုဒ် ပ္ဍဲလိက်ပရိုၚ် Asahi ဂှ် တံၚ်ပ္တိတ်ဂွံလဝ် မၞိဟ်တြုံအာယုက် ၉၀ သၞာံမွဲတၠ နူအကြာစမြိုၚ်လီုလာ်တံဂှ်တုဲ ပ္တိုန်လဝ်ရုၚ်ဂဥုဲကီုလေဝ် ဒးချိုတ်အာလဝ် ပ္ဍဲကဵုရုၚ်ဂဥုဲဂှ် သ္ဂးလဝ်ရ။
ပြဟ်ဟ်ဏံ ဟိုတ်နူဂၠံၚ်ကၟာတ်ဒၟံၚ်တုဲ နကဵုဂကောံဟံၚ်ပြာ်ဂၠိုက်ဂၠါဲဂမၠိုၚ် ဂွံစိုပ်ဒေသဒးလဝ်ဘဲဂၠိုၚ်အိုတ်တံဂှ် ဒးဆေၚ်ဒၟံၚ်မုက် ကုအခက်အခုဲတံရောၚ် သ္ကိုပ်ဝန်ဇၞော် ဖူမဳယိုဝ် ကဳယှဳဒါ ဟီုလဝ်ကဵု အ္စာပရိုၚ်တံရ။
ကြဴနူတိချဳဇတဝ်အာတုဲဂှ် ပ္ဍဲကဵုထဳဝဳ လိက်သ္ကုတ်အရံၚ်ဍာ်မိတ်ဂြၚ်ၚ် ဆုဲပြံၚ်ဒၞါဲဗၠးဘဲသူနာမဳတံအိုတ်ညိ မံက်ကၠုၚ်လဝ်တုဲ ပ္ဍဲကဵုရုယှာ ကေုာံ ကိုဝ်ရဳယျာသၟဝ်ကျာတံဂှ်လေဝ် ဟိုတ်နူတိချဳပ္ဍဲဂျပါန်တုဲ ဒးလလောၚ်ပ္တိတ်လဝ် တၚ်ကဵုသတိ သူနာမဳတံဂှ် ဂွံတီကေတ်ရ။
သမ္မတအမေရိကာန် ဂျဵုဗိုၚ်ဒေန်ဂှ် သွက်ဂွံကဵုအရီုဗၚ်မၞုံပၟိက် ကုဂျပါန်ဂှ် ဒှ်ဒၟံၚ်ဒတုဲရောၚ် လလောၚ်တြးလဝ်ရ။
Ref: CNA