ကိဗ်၊ ဂျာန္နဝါရဳ ၅
ဟိုတ်နူပရေၚ်ပ္ညဳပ္ညပ်အကြာတံတုဲ ယူကရုၚ် ကေုာံ ရုယှာ သၠာဲဂတးလဝ်ဂၠုဲပၞာန် ဂၠိုၚ်ကဵုကၠံတုဲ ဣဏံဝွံ ဒှ်ပရေၚ်သၠာဲဂတးကောန်ထံၚ် ဇၞော်အိုတ် အပ္ဍဲပေါဲပၞာန်ဂှ် သၞာဲဒဴဍုၚ်ကိဗ်တံ ဟီုရ။
ပါလုပ်သီုကဵု ကောန်ဂကောံဒပ်ရပ်လွဟ်တံကဵု ဂကောံဒပ်မၚ်ပယျဵုတံဂှ် ရုယှာ ကလေၚ်ဗလးကဵုလဝ် ကောန်ထံၚ် ၂၃၀ တၠဂှ် ယူကရုၚ် သ္ဂးရ။
အတိုၚ်တၚ်တုပ်စိုတ် ကလိဂွံလဝ် နူကဵုဍုၚ်ယူအေအဳ လုပ်စိုပ်ပ္ညဳပ္ညပ်လဝ်အကြာဂှ်မ္ဂး ယူကရုၚ်လေဝ် ကလေၚ်ဗလးကဵုလဝ် ကောန်ဍုၚ်ရုယှာ ၂၄၈ တၠရ။
ဣဏံဝွံ ကြဴနူဂိတုအဝ်ဂါတ်တုဲကၠုၚ်တေံတုဲ ဒှ်ပရေၚ်သၠာဲဂတးကောန်ထံၚ်ဇၞော်ဇၞော် အလန်ကိုပ်ကၠာအိုတ်ရ။
မၞိဟ်ပိုယ်တံ စိုပ်တိဍာ်မိမညးတံယျဂှ် သမ္ပတယူကရုၚ် ဗိုဝ်လိုဝ်ဒဳမာ ဇြဳလာန်သကဳ ချူလဝ် ပ္ဍဲကဵုမဳဒဳယျာဇာဇၞိက်ပရေၚ်မၞိဟ်ညးတံရ။
ကောန်ပၞာန် ကေုာံ ကောန်အရာပ် ၂၀၀ ပြၚ် ရုယှာရပ်ဒက်လဝ်တံဂှ် တ္ၚဲဏံ ဇကုတံ ကလေၚ်ကော်ဖျဴနၚ်မာန်ဂှ် ဇြဳလာန်သကဳ ဟီုရ။
ကြဴနူပ္ညဳပ္ညပ် ဝါတ်တ်ဂါတ်တ်တုဲမှ ကလိဂွံလဝ် တၚ်တုပ်စိုတ်ၜါလ္ပာ်တံဏောၚ်ဂှ် ထ္မံက်ထ္ၜးလဝ် ပ္ဍဲကဵုတၚ်လလောၚ်တြး ဌာနဝန်ဇၞော်ကာစဵုဒၞါ ရုယှာရ။
ပ္ဍဲသၞာံ ၂၀၂၂ ဂိတုဖေဖဝ်ဝါရဳဂှ် ကြဴနူရုယှာ လုပ်ၜက်ၜေတ်ဗ္တိုက်လဝ် တၟံကၠံပေၚ်ၚ်တုဲဂှ် အကြာယူကရုၚ် ကေုာံ ရုယှာဂှ် ၜိုန်ရကၠောန်ကၠုၚ်လဝ် ပရေၚ်သၠာဲဂတးကောန်ထံၚ် ဟွံအောန်ကဵုဝါကီုလေဝ် ဒၟါနူရုယှာတုဲ ဗွဲကြဴဏံ လၟေၚ်ကမၠောန်တံ လအ်လကၠုၚ်ဂှ် သၞာဲဒဴယူကရုၚ်တံ ဟီုရ။
ဒဒှ်ရတၚ်ဂုဏ် ကုယူအေအဳ မလုပ်ပ္ညဳပ္ညပ်ကဵုလဝ်အကြာ သီုၜါလ္ပာ် ညံၚ်သ္ဂောံဂွံတၚ်တုပ်စိုတ်ဂှ် ဟီုဂးလဝ်ရ။
ကောန်ထံၚ်ယူကရုၚ်လ္ၚဵု ကလေၚ်ဗလးကၠုၚ် နူကဵုတဲရုယှာကၠာတေံဂှ် ညးတံဝွံ အခိၚ်ဒးဒုၚ်ရပ်လဝ်ဂှ် ဒးဒုၚ်ပျဲပျာံ ဒးဒုၚ်ယှတ်လဝ်ကဵုဓာတ်လလဳတံဂှ် ကေၚ်ဟီုဂးလဝ်ရ။
Ref: BBC