ကိုဝ်ပေန်ဟေဂေန်၊ ဂျာန္နဝါရဳ ၂
ဨကရာဇ်ဗြဴ ဍုၚ်ဒိန်မက် မာဂရက်−၂ ဝွံ ပ္ဍဲကဵုဂိတုဂျာန္နဝါရဳ ၁၄ တ္ၚဲတိုန်နန်ပေၚ် ၅၂ သၞာံဂှ် ထောံလသာကၠေံနန်ဏောၚ်ဂှ် လလောၚ်တြးလဝ် ပ္ဍဲကဵုဂလာန်ရုပ်ရမျာၚ်သၞာံတၟိရ။
ပ္ဍဲသၞာံ ၁၉၇၂ ကြဴနူမအံက် ဨကရာဇ်ဇၞော် ဖရက်ဒရေတ်−၉ စုတိအာတုဲ ဨကရာဇ်ဗြဴ မာဂရက်−၂ တိုန်လဝ်နန်ရ။
ဨကရာဇ်ဗြဴဂှ်ဝွံ ပ္ဍဲသၞာံ ၂၀၂၃ မံက်တေံ ကြဴနူလွဳပါ်ကရေက်ဇုတ်စးတုဲ သ္ဂုတ်သွာတ်လဝ် သွက်ဂွံထောံလသာကၠေံနန်တုဲ စိုပ်အခိၚ် ဒးကဵုဒၞါဲ သွက်တၞောဝ်ဒတောဝ်အနာဂတ်တံယျ ကြဴနူလွဳပါ်ကရေက်ဂှ်တုဲဂှ် ကသပ်သာ်ဏံ မံက်ဂတဝ်ကၠုၚ်ဂှ် ဨကရာဇ်ဗြဴဂှ် ဂးလဝ်ရ။
စပ်ကဵုပရေၚ် ဨကရာဇ်ဗြဴဂှ် သၠးကၠေံနန်ဂှ်တုဲ တၚ်တဴဂုဏ် စၞးညးဍုၚ်ကွာန်တံဂှ် သ္ကိုပ်ဝန်ဇၞော်ဒိန်မက် မာတ်တဳဝှေတ်ဒရေတ်ဇြေန် သ္ဂးလဝ်ရ။
နန်က္ဍိုၚ်ဗ္တာၚ်ဂှ် ပအပ်ကဵုအာ ကောန်သၟိၚ်ဖရက်ဒရေတ် အာယုက် ၅၅ သၞာံဂှ်ဏောၚ် ဨကရာဇ်ဗြဴဂှ် သ္ဂးလဝ်တုဲ ကောန်သၟိၚ် တိုန်နန်ဂှ်ဝွံ ကၠောန်ဗဒှ်အာ အသေအဟာန်တိုန်နန် ညံၚ်ရဴဗျိတိၚ်ဟွံသေၚ်ပုဟ်ဂှ် ဂွံတီကေတ်ရ။
ဆ္ဂး ပ္ဍဲတ္ၚဲညးတိုန်နန်ဂှ် နူကဵုတိုက်သရာဲသဂံၚ် အမာလဳယာန်ဗတ် မၞုံဍုၚ်ကိုဝ်ပေန်ဟေဂေန် လလောၚ်တြးအာ ပရူဂွံဆက်တိုန်န်တံဏောၚ် မဒှ်ရ။
ညးဝွံ ဒုၚ်ကေတ်အာဲကၟာဲ ဨကရာဇ်ဗြဴ နဒဒှ်ဨကရာဇ်ဒိန်မက်တုဲ အုပ်ဓုပ်အာ သီုကဵုဂရေန်လာန် ကေုာံ သီုကဵုတ္ကအ်ဖာရိုဝ်တံဏောၚ်ဂှ် ဂွံတီကေတ်ရ။
ဨကရာဇ်ဗြဴဍုၚ်ဒိန်မက် မာဂရက်−၂ အာယုက် ၈၃ သၞာံဂှ်ဝွံ ပ္ဍဲဂၠးတိဏံ ဒှ်ဨကရာဇ်ဗြဴဂျိုၚ်တဴဒၟံၚ် မွဲတၠဓဝ်တုဲ ပ္ဍဲကဵုဥရဝ်ပတေံဂှ်လေဝ် အခိၚ်လၟုဟ် ဒှ်ဨကရာဇ်ဗြဴအာယုက်ဂၠိၚ်အိုတ်မွဲတုဲ ညးဍုၚ်ကွာန်တံဂှ်တှ်ေ စၟဳစလဝ်ညး သွက်ဂွံအုပ်ဓုပ်ပ္ကၚ်ရၚ်ဍုၚ် စဵုကဵုစုတိစဴသွဝ် မဒှ်ရ။
Ref: BBC