ဗေကျေန်၊ ဂျာန္နဝါရဳ ၆
ဟိုတ်နူပေါဲဗ္တိုက် ဒပ်ကံၚ်ဇြဳပၞာန်ကဵု ဒပ်ပၠန်ဂတးတံတုဲ မကမ်လွဟ်ဇၞော်တံ ဒတုံစှ်ေ အပ္ဍဲဍုၚ်ကြုက်တုဲ မၞိဟ် ၅ တၠ ဇီုကပိုက်ကလိဂွံလဝ်ဝပ်တုဲဂှ် အလဵုအသဳကြုက် ဖ္တိုက်ဖ္အောဝ်လဝ် သွက်ဂွံဒေါအ်ဒေၚ်ပေါဲဗ္တိုက်ရ။
စပ်ကဵုကိစ္စဏံတုဲ အလဵုအသဳကြုက် ဒစဵုဒစးဗျိပၠုတ်လဝ် သ္ကာတ်တ်မြဟ်ဟ်ရောၚ် ဂးလဝ်တုဲ သွက်ဂွံစဵုဒၞါ ပိုန်ဒြပ်လမျီု ညးဍုၚ်ကွာန်ဇကုတံဂှ် အရာမနွံပၟိက်တံသီုဖအိုတ်ဂှ် ကၠောန်အာဏောၚ် ညးမၞုံအခေါၚ်ဟီုဂး ဌာနဝန်ဇၞော်ကာစဵုဒၞါဍုၚ်ကြုက် ဝန်ဝါန်ဗေန် ဟီုလဝ်ရ။
နကဵုအလဵုအသဳကြုက် ဒစဵုဒစးလဝ် ဂကောံမဆက်စပ်သီုဖအိုတ် သ္ကာတ်တ်မြဟ်ဟ်တုဲ ဂကောံဗော်သွးမပါလုပ်ဒၟံၚ် အပ္ဍဲပဋိပက္ခတံသီုဖအိုတ် သွက်ဂွံဒေါအ်ပရေၚ်ဗ္တိုက်တံလွာဲဂှ်ကီု၊ လၟေၚ်ဒဒှ် မဗဒှ်ကဵုပလာပ်ပထုဲ ပရေၚ်ညိၚ်ဝတ်ပယျဵု ကြုက်−ဗၟာတံဂှ် သွက်ဂွံဝေၚ်ပါဲဂှ်ကီု သွက်ဂွံကေတ်အရေဝ်ရေၚ်တၠုၚ် ဗိုန်န်ဂှ်လေဝ် အာတ်မိက်လဝ်ရ။
မကမ်လွဟ်ဇၞော် မပန်ပှော်နၚ် နူကဵုသ္ကုတ်သၟဝ်ကျာဍုၚ်ဗၟာတံဂှ်ဝွံ ပ္ဍဲဂိတုဂျာန္နဝါရဳ ၃ တေံ ဒတုံစှ်ေလဝ် ပ္ဍဲဍုၚ်နာန်သာန် တွဵုရးယူနာန် နူကဵုပယျဵု ဇမ္ၚောဲနွံ ၁ ဒဿမ ၆ မိုၚ်ဂှ်ရ။
ဟိုတ်နူမကမ်လွဟ်ဇၞော် ဒတုံဗ္တိုက်ထ္ကးအာလဝ်ဂှ်တုဲ မၞိဟ် ၅ တၠ ဇီုကပိုက်ကလိဂွံလဝ်ဝပ်တုဲ ပ္တၚ်ရုၚ်ကမၠောန် ညးဒေသမွဲတၠ လီုလာ်အာလဝ်တုဲ ဆေၚ်ဖုၚ်မွဲဆေၚ် ဗ္ဒါဲဗ္ဒါဲဂှ်လေဝ် လီုလာ်အာလဝ်ဂှ် ဂွံတီကေတ်ရ။
ပ္ဍဲကဵုဆေၚ်ဖုၚ်မွဲဆေၚ် ဂွံညာတ်ကေတ်လဝ် ကရောၚ်ကရောန်ထ္ကးမွဲ ကၠးကၠးဖ္ဍးဖ္ဍးတုဲ သၟာပလံၚ်ဗ္စိုပ်ကပေါတ်မွဲတၠကဵု ညးဒေသမွဲတၠ ဇီုကပိုက်ကလိဂွံလဝ်ဝပ်ညိညဂှ် ညးဒေသမွဲတၠ ဟီုရ။
သ္အာၚ်နူဂှ်ပၠန် မၞိဟ် ၃ တၠတၞဟ်ဟ်ဂှ်လေဝ် ကော်ဏာလဝ်ရုၚ်ဂဥုဲ နကဵုယာန်ဖ္ဍိုက်မၞိဟ်ယဲဂှ်လေဝ် ဂွံဆဵုကေတ်လဝ်ဂှ် ညးဟီုလဝ်ဏီရ။
ပ္ဍဲသၞာံ ၂၀၁၅ ဂိတုမေ လောန်ကၠုၚ်တေံဂှ်လေဝ် ဟိုတ်နူပေါဲဗ္တိုက်အပ္ဍဲဍုၚ်ဗၟာတုဲ လွဟ်ဇၞော်ဒတုံစှ်ေလဝ် ပ္ဍဲဍုၚ်နာန်သာန်တုဲ မၞိဟ် ၅ တၠ ကေၚ်ကလိဂွံလဝ်ဝပ်ရ။
အလဵုအသဳကြုက်ဂှ် ညံၚ်ပရေၚ်ဗ္တိုက်တံ ဂွံဒေါအ်ဒေၚ်ဂှ် ကၠာတေံလေဝ် ကေၚ်ဖ္ဍိုက်ဖ္အောဝ်လဝ် ဂကောံဂမၠိုၚ်တုဲ လုပ်ပ္ညဳပ္ညပ်ကဵုလဝ်အကြာရ။
Ref; Yahoo news