တာကာ၊ ဂျာန္နဝါရဳ ၉
ပေါဲရုဲမာဲဗေန်ဂလာဒေတ် ဗော်ဒစဵုဒစးမွဲ မဗကပ်လဝ်ဗဗေၚ်ဂှ် သ္ကိုပ်ဝန်ဇၞော်လၟုဟ် ယှုက်ဟာသဳနာ သွက်အာယုက် မနုက်ကဵု ၅ ဝါဂှ် ထပ်ဂွံဇၞးလဝ်ရောၚ် သၞာဲဒဴပေါဲရုဲမာဲတံ ဟီုရ။
မၞိဟ်ကဵုမာဲ ၜိုတ် ၄၀ တၟံကၠံ ယအ်အာလဝ်ရောၚ် ကြဴနူလလောၚ်တြးလဝ် ပ္ဍဲကဵုပရိုၚ်ပေါဲရုဲမာဲ ကၠာတဲဏံတုဲဂှ် ဗော်ဂွံအဝဵု Awami League ဟာသဳနာ ဂွံဇၞးလဝ်ရောၚ် ညးမၞုံအခေါၚ်ဟီုဂး ကမ္မယှေန်ပေါဲရုဲမာဲဂှ် ဟီုလဝ်ကဵု AFP ရ။
ဂကောံအလဵုအသဳ ဟာသဳနာဝွံ သွက်ကၟိန်ဍုၚ် မ္ဒးဂဗလဝ်ဒဒှ်မဒိုက်ဝါတ်ဂှ် ညံၚ်ပရေၚ်ပိုန်ဒြပ်ဂွံဖောအ်ဗြေဝ်ကၠုၚ် ပၠလဝ်တရဴမာန်ကီုလေဝ် ကလိလောန် ပရေၚ်ဖံက်ပ္ကဝ်အခေါၚ်အရာမၞိဟ်တံတုဲ ဍဵုဍိုက်ဒၟံၚ် ရဲလ္ပာ်ဒစဵုဒစးတံ ဟွံမွဲဓဝ်ညှာတာရောၚ် သာ်ဝွံ ဒးဒုၚ်စောတ်စောဲလဝ်ရ။
ဗော်ဂွံအဝဵုဂှ်ဝွံ ပ္ဍဲကဵုဒၞါဲဒးပြိုၚ်ပ္ကာန်လဝ်ဂှ် ရဲလ္ပာ်ဒစဵုဒစး ဇြဟတ်တုပ်တံဂှ် စဵုကဵုဟွံမွဲဒှ်လဝ်ကီုလေဝ် ပ္ဍဲကဵုဒေသဆန္ဒမာဲညိညဂှ် ညးစၞးဟွံလုပ်ပြိုၚ် စွံလဝ်တုဲ အကာဲအရာဏံဝွံ ဒှ်အရာပ္တိတ်ဇြဟတ် ညံၚ်ဂွိုအ်ဒးဒုၚ်ဟီု နဒဒှ်အလဵုအသဳ မွဲဗော်ဓဝ် အုပ်ဓလီုဂှ်ဏောၚ်ဂှ် ညးလ္ၚတ်ဂမၠိုၚ် သ္ဂးလဝ်ရ။
ပ္ဍဲကဵုပေါဲရုဲမာဲဂှ် ဗော်ကောန်ဂကူ ဗေန်ဂလာဒေတ် BNP ဂှ် ဖ္တိုက်ဖ္အောဝ်လဝ် သွက်ဂွံဗ္ကပ်ဗဗေၚ်အိုတ်တုဲ ဗော်ဒစဵုဒစးတၞဟ်ဟ်တံလေဝ် ဂွံပါလုပ်ပ္ဍဲပေါဲရုဲမာဲ ဟွံဗဗွဲကဵုသၞောဝ်ဂှ် ကယျာန်ပါဲလဝ်ရ။
အခိၚ်လၟုဟ် ဗော်ဂွံအဝဵု ဟာသဳနာဝွံ ပ္ဍဲကဵုဒၞါဲအမာတ် ၃၀၀ ဂှ် ကလိဂွံလဝ် ဟွံအောန်နူကဵု ၂၂၀ ရောၚ် ဂွံတီကေတ်တုဲ သွဟ်ပေါဲရုဲမာဲဂှ် သွက်ဂွံလလောၚ်ပ္တိတ် ပ္ဍဲတ္ၚဲစန် အခိၚ်ဇိုၚ်သဝ်တ္ၚဲ နွံဂှ် ဂွံတီကေတ်ရ။
ဆ္ဂး နကဵုပရေၚ်ထံက်ဂလာန် အမာတ်ကၠတ်ထဝ်တၞဟ်သ္အာၚ်တံကဵု ဗော်မဟာမိတ်တံဂှ်တုဲ ဒဒှ်မ ဟာသဳနာ ထိၚ်ဒက် လ္တူကၠတ်ထဝ်ဂှ်ဝွံ သၠုၚ်တိုန်ကၠုၚ် နူကၠာတေံမာန်တုဲ သီုကဵုဖ္တိုက်ဖ္အောဝ်လဝ် ညးဍုၚ်ကွာန်တံ သွက်ဂွံထ္ၜးပျး ဒဒှ်ရဓဝ်ပတှ်ေနွံ လ္တူလၟေၚ်ကမၠောန်ဒဳမဝ်ကရေဇြဳတံဂှ်ရ။
ယှုက်ဟာသဳနာ ဂွံဇၞးလဝ်ပေါဲရုဲမာဲဂှ် ကြဴနူစုတ်မာဲတုဲဂှ် ဗော် BNP ဝွံ ဒှ်ဂကောံပကီုပရာပ်ရောၚ် ဟီုလဝ်တုဲ ညးဍုၚ်ကွာန်တံဂှ်တှ်ေ ဟိုတ်နူမွဲဗော်ဓဝ် အာစိုပ်ပြိုၚ်ပ္ကာန်လဝ်ဂှ်တုဲ မၞိဟ်ဟွံအာကဵုမာဲတံလေဝ် နွံလဝ်ဂှ် ပရိုၚ်မဳဒဳယျာအပ္ဍဲဒေသတံ ထ္မံက်ထ္ၜးလဝ်ရ။
Ref: CNA