ကၞောတ်ၜဳရေဝ်၊ ဂျာန္နဝါရဳ ၉
ကမ္မတဳဗဟဵု ဗော်ဍုၚ်မန်တၟိလ္ၚဵု အာယုက်ဇၞော်တိုန်ကၠုၚ်ကီု၊ ဟိုတ်နူပရေၚ်ထတ်ယုက်ဍိုန်လျစှ်ေကၠုၚ်ကီုတုဲ ယိုက်ဂၠေၚ်တာလျိုၚ်ဗော် အခိၚ်ပေၚ်ၚ်ဟွံမာန်ကၠာလေဝ် ရန်တၟံကဵု ဂွံဒှ်ဇြဟတ်ဗော်၊ ဂွံဒှ်ဒတုဲဖဵုဗော်မာန်တုဲ စကာအာသၞောတ်ကမ္မတဳဗဟဵုလၟိုန်ရောၚ် နူကဵုသဘၚ်သဳကၠဳဗော်ဍုၚ်မန်တၟိ သ္ပဒတန်လဝ်ရ။
သ္ပဒတန်လဝ် ပ္ဍဲကဵုသဘၚ်သဳကၠဳ ဗော်ဍုၚ်မန်တၟိ အလန်(၁၁) ဝါ မကၠောန်ဗဒှ်ဒၟံၚ် ပ္ဍဲကၞောတ်ၜဳရေဝ်ဂှ်တုဲ သွက်ဂွံဒှ်ကမ္မတဳဗဟဵုလၟိုန် တၚ်နၚ်ဗ္ၜတ်လဝ်တံဂှ်လေဝ် ပ္ဍဲဂိတုဂျာန္နဝါရဳ ၈ အခိၚ်ပယျာံဂယးဂှ် နူပရိုၚ်ဍုၚ်မန်တၟိ လလောၚ်ပ္တိတ်ကၠုၚ်ရ။
ဂွံဒှ်ကမ္မတဳဗဟဵုလၟိုန်ဂှ် အာယုက် ဒးပေၚ် ၇၀ သၞာံကီု၊ အာယုက်ဟွံပေၚ်ကၠာလေဝ် ညးမၞုံကဵုပရေၚ်ထတ်ယုက် မဍိုန်လျဂမၠိုၚ်၊ ညးမကေၚ်ကေတ်လဝ်တာလျိုၚ်ကမ္မတဳဗဟဵု (၅) ဝါ နူကဵုသဘၚ်သဳကၠဳကၠာတေံဂှ်ကီု၊ ကေၚ်ယိုက်ဂၠေၚ်လဝ်တာလျိုၚ် ပ္ဍဲဗော် ပွိုၚ် (၂၅) သၞာံ မွဲအဆက်ဓဝ်ဂှ်ကီု တၚ်ဗ္ၜတ်သာ်ဏံတံ ပါလုပ်ရ။
သ္အာၚ်နူဂှ်ပၠန် အခိၚ်ဗော်နွံပၟိက် ကဵုတာလျိုၚ် ပရေၚ်ကမၠောန်မွဲမွဲ ကာလ(ဂၠေံဂၠေံ) မ္ဂး ညးမယိုက်ဂၠေၚ်မာန် ကေုာံ ယဝ်ရတၚ်ဗ္ၜတ် မထ္မံက်ထ္ၜးလဝ်လ္တူတေံဂမၠိုၚ် ဍိုက်ပေၚ်မ္ဂး အာတ်မိက်အခေါၚ်သ္ဂောံဒှ် ကမ္မတဳဗဟဵုလၟိုန်မာန်ရောၚ်ဂှ် သ္ဂးရ။
ကမ္မတဳဗဟဵု ဍိုက်ပေၚ်ကဵုတၚ်နၚ်တအ်ဂှ် နကဵုဆန္ဒပူဂဵု မိက်ဂွံယိုက်ဂၠေၚ်တာလျိုၚ် နဒဒှ်ကမ္မတဳဗဟဵုလၟိုန်မ္ဂး မ္ဒးချူပ္တိုန်လိက် ကုရုၚ်ဌာန်ဂအုပ်ဗဟဵုတုဲ ကမ္မတဳရေၚ်တၠုၚ်ကေၚ်ကာဗဟဵုတံ သ္ပကဵုဒတန်ဏောၚ်ဂှ် ဂွံတီကေတ်ရ။
ညးမဒှ်ကမ္မတဳဗဟဵုလၟိုန် ပ္ဍဲဗော်၊ မ္ၚးဗွိုၚ်ဗော်တံဝွံ ပ္ဍဲကဵုကောံဓရီုကမ္မတဳဗဟဵုကီု၊ သဘၚ်သဳကၠဳဗော်ကီု တိုန်စိုပ်ကဵုကသပ်မာန်တုဲ အခေါၚ်ဒုၚ်စသိုၚ် ကေုာံ အခေါၚ်အရာတုပ်သၟဟ် ညံၚ်ရဴကောန်ဗော်မွဲကီု ကလိဂွံရောၚ်ဂှ် နူကဵုသဘၚ်သဳကၠဳ သ္ဂုတ်သွာတ်လဝ်ရ။
သဘၚ်သဳကၠဳဗော်ဍုၚ်မန်တၟိ အလန် (၁၁) ဝါဂှ် နူဂိတုဒဳဇြေမ်ဗာ စၟတ်တ္ၚဲ (၂၅) စကၠောန်ဗဒှ်လဝ်တုဲ အပ္ဍဲသတ္တာဟဏံ သွက်ဂွံဆက်ရုဲစှ်အာ ညးတာလျိုၚ်ကမ္မတဳဗဟဵု၊ ကမ္မတဳခရိုၚ်၊ ကမ္မတဳပွိုၚ်ဍုၚ်အဆံၚ်ၚ်တံ နွံဒၟံၚ်ဂှ် ဂွံတီကေတ် နူကဵုပရိုၚ်ဍုၚ်မန်တၟိရ။
ပရိုၚ်−သြၚ်လောန်တိုၚ်(မ်)
ဗီု−NMSP