မိုဝ်ဗျေဝ်၊ ဂျာန္နဝါရဳ ၉
ပ္ဍဲကဵုဒေသပယျဵု တွဵုရးသေံ−ကရေၚ်ဍာဲ ကေုာံ တွဵုရးကရေၚ်ဍာဲတံဂှ် ဒပ်ပၠန်ဂတး မလုပ်ဒၟံၚ်ပေါဲဗ္တိုက်ဂမၠိုၚ်ဝွံ အဖဝ်ခရိတ်အရပ်စပ်ပၞာန်သၠုၚ်တိုန်ကၠုၚ်ဂှ် ဒးဆေၚ်ဒၟံၚ်မုက် သီုကဵုအခက်အခုဲဇွောံမတံဂှ် ဂွံတီကေတ် ဇရေၚ်ဂကောံဒပ်ပၠန်ဂတးတံရ။
ဒပ်ပံၚ်ကောံပၠန်ဂတးကရေၚ်ဍာဲတံဝွံ စနူဂိတုနဝ်ဝေမ်ဗာ သၞာံတုဲကၠုၚ်တေံတုဲ ထ္ပက်ပၞာန်ဗ္တိုက်ဒၟံၚ် ကုဒပ်ကံၚ်ဇြဳပၞာန်တံ ဗွဲမသ္ကာတ်မြဟ်တုဲ သၠုၚ်ပ္တိုန်လဝ်ပရေၚ်ပၞာန်ရ။
အခိၚ်လၟုဟ် သွက်ကောန်သ္ဂံၚ်ပၠန်ဂတး မစိုပ်ဒၟံၚ်ဒေသ ပေါဲဗ္တိုက်က္တဵုဒှ်ဒၟံၚ်တံဂှ် နွံပၟိက်ဒၟံၚ်သ္ၚု အောန်အိုတ် နူ ၂၀၀ စဵုကဵု ၃၀၀ ရိုက်ဂှ် ဂွံတီကေတ် နူကဵုပရိုၚ်တမ်ရိုဟ်ပၠန်ဂတးဗလးတိတေံရ။
ၚုဟ်မကမ်လွဟ်အိုတ် သွက်ပေါဲဗ္တိုက် လလအ်ပွိုၚ်မွဲနာဍဳဂှ်ဝွံ သြန်ဒ္ကေဝ်ဗၟာ အိုတ်ဒၟံၚ် စဵုကဵုကၠံကိုဋ်ဏောၚ်ဂှ် ဒပ်ပၠန်ဂတးတံ သ္ဂးရ။
ဟိုတ်နူဒးရပ်စပ်ဒၟံၚ်မကမ်လွဟ်ဇၞော် သွက်ပေါဲဗ္တိုက်တံဂှ်တုဲ ဗွဲကြဴဏံ သွက်ကောန်သ္ဂံၚ်တံဂှ် ဒှ်ကၠုၚ်အခက်အခုဲဇွောံမတံရောၚ် ညးတာလျိုၚ် ဂကောံဒပ်ပံၚ်ကောံ ပၠန်ဂတးကရေၚ်ဍာဲမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လၟုဟ် အရာမဒှ်ကၠုၚ်အခက်အခုဲဂှ်တှ်ေ သွာၚ်ဇွောံမတံရဏောၚ်။ လ္ပာ်ဇွောံမဟီုဂှ် လၟုဟ် ပ္ဍဲကဵုတမ်ဒပ်ပိုယ်တံတှ်ေ သာတုဲစွံမံၚ်အာရီုဂှ် လ္ပာ်မကမ်လွဟ်လက်နက်တံဏောၚ်။ လွဟ်တံဂှ် အခက်အခုဲဟွံမွဲစကွေံကွေံရပုဟ်ကီုလေဝ် လ္ပာ်မကမ်လွဟ်တံဂှ် ဖေက်ဒးပလေဝ်ပလေတ်ဂၠိုၚ်တုဲ ဂွံနၚ်နူကာမ်ပိန်တံဂှ်သီုဖအိုတ်ဂှ် ညံၚ်ဂွံဇွောဝ်လုပ်ပ္ဍဲမကမ်လွဟ်တံသၟးဂှ် ကေတ်လဝ်တၚ်တုပ်စိုတ်သီုညးဖအိုတ်နွံဒၟံၚ်ရ။ အေ ဂှ်တှ်ေ လၟုဟ်ဂှ် လ္ပာ်ဇွောံမဂှ် ထ္ၜးဒၟံၚ်လက္ချန်နုက်ဏောၚ်” သာ်ဝွံ ညးသ္ဂးရ။
ဟိုတ်နူပေါဲဗ္တိုက်တုဲ အပ္ဍဲတွဵုရးကရေၚ်ဍာဲ နူကဵုသ္ကုတ်သၠုၚ်ကျာတွဵုရးသေံဂှ် သၞေဟ်ကၚ်ဒပ်ကံၚ်ဇြဳပၞာန်တံ တာဒၞါလဝ် ကပေါတ်ဗၞိက်ဂေတ်ဂြိပ်တံလေဝ် နွံဒၟံၚ်ရ။
This photo taken on October 16, 2021 shows members of the Karenni Nationalities Defence Force (KNDF) eating a meal at their base camp in the forest near Demoso, in Myanmar’s eastern Kayah state. – Young anti-coup recruits line up at a secret camp in Myanmar, hands behind their heads and stomachs braced, waiting for a drill instructor to deliver a punch to toughen them up for their fight against the military. (Photo by AFP) / TO GO WITH Myanmar-military-politics-coup-conflict, FOCUS
ဒဵုကဵုအခိၚ်လၟုဟ် ပ္ဍဲပယျဵုသေံကရေၚ်ဍာဲဂှ် ပေါဲဗ္တိုက်ဍောတ်တ်တံနွံဒၟံၚ်တုဲ အပ္ဍဲကာလခြာဟွံလအ်ဏံလေဝ် ထ္မံက်အာပေါဲဗ္တိုက် သ္ကာတ်မြဟ်တံဏောၚ်ဂှ် ဂကောံဒပ်မဟာမိတ် ပၠန်ဂတးကရေၚ်ဍာဲတံ သ္ဂးလဝ်ရ။
အပ္ဍဲဗ္ဒါဲပွိုၚ် ၂ ဂိတု ထ္မံက်လဝ်ပေါဲဗ္တိုက်ဂှ် ဒပ်ပၠန်ဂတးတံ သီဂွံလဝ် ဒေသဖေဝ်ခုၚ် ကေုာံ မိုဝ်ဗျေဝ် မၞုံပ္ဍဲဒေသပယျဵုသေံ−ကရေၚ်ဍာဲဂှ် ၜိုတ် ၉၀ တၟံကၠံရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ