မတ်မလီု၊ ဂျာန္နဝါရဳ ၈
ပ္ဍဲတွဵုရးဍုၚ်မန် အပ္ဍဲကာလသီအဝဵုကြပ်ပေၚ်ပိသၞာံဂှ် ညးဍုၚ်ကွာန်သ္ဇိုၚ်တံဝွံ ဟိုတ်နူၚုဟ်လွဳယဲတံကဵု ၚုဟ်ဂဥုဲဇဗတံ က္ဍၚ်တိုန်ကၠုၚ်တုဲ သုၚ်စောဲကၠုၚ် ဂဥုဲဖက်တံအဓိကတုဲ ကၠာအခိၚ်ဂွိုအ်စိုပ် အာယုက်ဒးအိုတ်တံ နွံကၠုၚ်ဂှ် အ္စာသဝ်ဝန်ဂမၠိုၚ် ဟီုရ။
ကပေါတ်ဂဥုဲဇဗတံဂှ်ဝွံ ဟိုတ်နူတၚ်သၞောတ်ဗ္ၜတ် အခေါၚ်ပၠောပ်ပ္တိုန် ကံၚ်ဇြဳပၞာန်တံဂှ်တုဲ အပ္ဍဲဗွဝ်ဖျာ ပိုတ်သ္ကုတ်ဒၟံၚ်ဂှ်ကီု၊ ၚုဟ်မးသြန်ဗၟာစှ်ေတုဲ ၚုဟ်ဒဝ်ဠာ သၠုၚ်တိုန်ကၠုၚ်သၟးဟွံက သီုကဵုကပေါတ်သှ်ေသၟေဟ်ဒၟံၚ်တံ အောန်စှ်ေကၠုၚ်တုဲ ၚုဟ်ဂှ် သၠုၚ်တိုန်ကၠုၚ် ကဵုဆရ။
ဟိုတ်နူၚုဟ်ဂဥုဲဇဗတံ သၠုၚ်တိုန်ကၠုၚ်ကဵုဆဂှ်တုဲ ညးဍုၚ်ကွာန်သ္ဇိုၚ်တံဝွံ ယဝ်ရပရေၚ်ထတ်ယုက် ဒှ်ကၠုၚ်မွဲမွဲသာ်မ္ဂး ဂွံအာထ္ၜး ရုၚ်ဂဥုဲ၊ ဗ္ဒမ်ဂဥုဲ ဗီုကၠာတေံဂှ် သ္ပဟွံမာန်ရတုဲ ပ္ဍဲကဵုဆေၚ်ဂဥုဲ မကြပ်တံဂှ် ရာန်သုၚ်ကၠုၚ် ဂဥုဲဖက်တံ ဂၠိုၚ်ကၠုၚ်ရ။
အ္စာသဝ်ဝန်မွဲတၠဂှ် ဟိုတ်နူရပ်စပ်ကၠုၚ်ဂဥုဲဖက်တံဂၠိုၚ်ကၠုၚ်ဂှ်တုဲ ဇီုကပိုက်ကဵုထိုၚ်စၞကီု၊ ထ္အအ်ဆီကီု အရာတံဏံ ဒှ်ကၠုၚ်မာန်တုဲ ဍာ်ဇမၠိၚ်မ္ဂး ကောန်တၟံလီု၊ ကတေၚ်အရီုဇီုကပိုက်ဒးတံသၟးဟွံက ယဲဘဲဂၠိၚ်ဂၠေၚ်တုဲ အာယုက်မၞိဟ်လေဝ်ဂၠေံကၠုၚ်မာန်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အန္တရာယ်ဂဥုဲဖက်ဂှ်တှ်ေ နွံၜါဂကူရ။ ဍာ်ဇမၠေံဂှ်တှ်ေ ဒးထိုၚ်စၞဏောၚ်။ လ္ၚဵုတံဂှ်တှ်ေ ဒှ်ကၠုၚ်စဵုကဵုထ္အအ်ဆီဏောၚ်။ တုဲပၠန် ဍုက်အာကဵုဂဥုဲဂစိုတ်စၟဂှ်တုဲ အခိၚ်ဒှ်ယဲဇၞော်ဇၞော်တံဂှ်တှ်ေ ဂဥုဲဟွံဗက်တံ ဒှ်ကၠုၚ်မာန်ရ။ လွဳဓမ္မတာတုဲ စၞးဒးအိုတ်ဂှ် ဒးအိုတ် စဵုကဵုၜါဆပိဆ၊ စဵုကဵုလွဳဟွံဂွံ က္တဵုဒှ်ကၠုၚ်မာန်ရ။ ဍာ်ဇမၠိၚ်ဂှ်တှ်ေ ဂဥုဲဂိဇကု ပါဒၟံၚ်ပ္ဍဲကဵုဂဥုဲဖက်လ္ၚဵုတံဂှ် ကောန်တၟံလီု၊ ကတေၚ်အရီုလီုမာန်ရ။ သ္ၚိထိုၚ်စၞဂှ် ကြဳကၠုၚ်တုဲ ဍာ်ဇမၠိၚ် သုၚ်ဂဥုဲတၞဟ်ဟ်တံ ဝါတ်ကၠုၚ်ဂှ် ဒှ်ကၠုၚ်မာန်ရ။ ဒှ်ယဲဍာံဍာံတှ်ေ လွဳဟွံဂွံရပုဟ်။ လွဳစကျာတ်အာဏောၚ်။ က္တဵုဒှ်အာ စဵုကဵုလွဳဟွံဂွံရဏောၚ်။ ပြဟ်ဟ်ဏံဂှ်တှ်ေ ကဵုဂဥုဲဖက်ဂှ် ပြေပြံၚ်အာဏောၚ်။ ဍာ်ဇမၠိၚ်ဂှ်တှ်ေ မၞိဟ်ယဲတံလေဝ် ဒးလွဳကၠုၚ်ယဲ သာဝါတ်ကၠုၚ်ဏောၚ်။ ယဲတံဂှ် ဇၞော်ကၠုၚ်ဏောၚ်။ အာယုက်လေဝ် ဂၠေံကၠုၚ်ဏောၚ်” သာ်ဝွံ သ္ဂးရ။
အခိၚ်လၟုဟ် ရုၚ်ဂဥုဲဗ္ဒမ်ဂဥုဲတံဝွံ ဒးဒုၚ်ကံက်ကၠုၚ်အခေါန် ကုကံၚ်ဇြဳပၞာန်တံ သၠုၚ်တိုန်ကၠုၚ်ဂှ်ကီု၊ ဟိုတ်နူၚုဟ်ဂဥုဲ သၠုၚ်တိုန်ကၠုၚ် ကဵုဆဂှ်တုဲ ၚုဟ်လွဳယဲတံဂှ် သာတုဲကံက်ကၠုၚ်ဂှ်ရ ညးဍုၚ်ကွာန်သ္ဇိုၚ်ဗွဲမဂၠိုၚ်ဝွံ ဗီုကၠာတေံ ရုၚ်ဂဥုဲ၊ ဗ္ဒမ်ဂဥုဲတံဂှ် အာဟွံမာန်ရတုဲ သုၚ်စောဲကၠုၚ်ဂဥုဲဖက် သၠုၚ်တိုန်ကၠုၚ်တီတီဂှ် ညးဆက်ဟီုရ။
ညးဒေသမွဲတၠဂှ် ညးဍုၚ်ကွာန်သ္ဇိုၚ်တံဝွံ လ္တူနူကဵုပရေၚ်ပိုန်ဒြပ်ဂြုဲဂြေဟ်စှ်ဂှ်ေ ပရေၚ်ထတ်ယုက် ဆုတ်ယုတ်စှ်ေကၠုၚ်တံ ဂၠိုၚ်ဒၟံၚ်ဂှ်ရ ဒုၚ်လွဳယဲဗီုကၠာတေံ ဟွံမာန်ရတုဲ ဒးလွဳဒၟံၚ်ကဵု ဂဥုဲဖက်သၟးဂှ် ဟီုရ။
“လၟုဟ်မ္ဂး ရာသဳဥတုတံဂှ် ဖံက်ပၠန်တုဲ လ္တူနူကဵုပရေၚ်ပိုန်ဒြပ်စှ်ေ ဂှ် ပရေၚ်ထတ်ယုက် ဆုတ်ယုတ်စှ်ေကၠုၚ်ဂှ် သာဂၠိုၚ်ကၠုၚ်ရ။ အာဂတနူဏံလေဝ် ဒှ်တိုန်ဒဒိုက်အိုတ်ဏောၚ်။ မၞိဟ်လှုဲဟွံမွဲဂှ်တှ်ေ လွဳဟွံမာန်ရပုဟ်။ တုဲအာကဵု ၜိုတ်ဂဥုဲအကြာသ္ၚိတံရဏောၚ်။ ပ္ဍဲကဵုဆေၚ်ဂဥုဲဂှ်လေဝ် ဖက်။ ဆေၚ်ဇဗၠုသွတ်လေဝ် ဖက်။ ကုရဲမအာဒၟံၚ် ကဵုဂဥုဲဖက်တံဂှ်တှ်ေ သာတုဲဒှ်ဒဒိုက်အိုတ်ဏောၚ်။ အဓိကဂှ်တှ်ေ ညးဍုၚ်ကွာန်ဒိုက်ဂတ်တံ ဒှ်ဒဒိုက်ကွေံကွေံဏောၚ်။ လၟုဟ်ရဂှ် ဒှ်ဒၟံၚ်အိုတ်ရ။ ၜိုတ်ဒးချာံ၊ ခ္ဍက်ရဂှ် လ္ၚဵုတံဂှ် ရာန်ဂဥုဲဟွံမာန်ပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ညးဍုၚ်ကွာန်သ္ဇိုၚ်တံဝွံ ဂဥုဲသုၚ်ဒၟံၚ်လၟိုန်တံရဂှ် ဂွံရာန်သုန်မာန်ဂှ် ခက်ခုဲကၠုၚ်တီတီတုဲ သွက်ညးဒးဒုၚ်စသိုၚ်ဒၟံၚ် ယဲဇမၠိၚ်တံ လ္တူနူဂွံကလေၚ်ခိုဟ်ကၠုၚ်ဂှ် သ္ဂောံချိုတ်ဏောၚ် ဂၠိုၚ်ကၠုၚ်ဂှ် ညးဆက်ဟီုရ။
ညးဍုၚ်ကွာန်သ္ဇိုၚ်တံဝွံ ဂွံဂွံဂဥုဲဇဗတံဂှ် ဝါတ်ဂါတ်ကၠုၚ်တုဲ ဟိုတ်နူသုၚ်စောဲကၠုၚ် ဂဥုဲဖက်ဟွံလုပ်သၞောဝ်တံ ဂၠိုၚ်ကၠုၚ်ဂှ်တုဲ ဗွဲကြဴဏံ ယဲဘဲသ္ကာတ်မြဟ်ကၠုၚ်ဂၠိုၚ်တုဲ ဟွံထေက်ကဵုချိုတ်မွဲသာ် ဒးချိုတ်အာတံလေဝ် နွံကၠုၚ်ဂှ် ဂွံတီကေတ်ရ။
ပ္ဍဲတွဵုရးဍုၚ်မန် ပ္ဍဲလက်ထက်အလဵုအသဳတုဲကၠုၚ်တေံ ၜိုန်ရထ္မံက်ပ္တိတ်ကေတ်ကၠုၚ်အရေဝ် ကုပရေၚ်သွံတြးဂဥုဲဖက်တံဂှ်ကီုလေဝ် ပ္ဍဲလက်ထက်ကံၚ်ဇြဳပၞာန်ဏံ ကေတ်ကၠုၚ်အရေဝ်မွဲမွဲသာ် စဵုကဵုဟွံမွဲ အောန်ဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media