ဝါယှေန်တာန်၊ ဂျာန္နဝါရဳ ၁၀

အလဵုအသဳအဳရာတ် သွက်ဂွံဖာဲပ္တိတ် ဂကောံပံၚ်ကောံစပ်ကဵုလ္ပာ်ပၞာန် သၟဝ်ပၠတရဴအမေရိကာန်ဂှ် စရေၚ်တၠုၚ်အာဏောၚ် လလောၚ်တြးလဝ်ကီုလေဝ် အမေရိကာန်ဂှ်တှ်ေ ကလေၚ်ကော်ဖျဴ ဒပ်ညးတံဟွံသေၚ်ပုဟ်ဂှ် ဟီုရ။

ဟိုတ်နူကၠောန်ဒၟံၚ် သွက်ဂွံဗ္တိုက်သၠေက် ဂကောံအိုၚ်အက်(သ်)တံဂှ်တုဲ ကောန်ဂကောံဒပ်ဂမၠိုၚ် ဂွံဆုတ်ကလေၚ်အာ ဟွံမွဲဏီပုဟ်ဂှ် ဂအုပ်သ္ကိုပ်ဗိုလ်ဒပ်ကျာအမေရိကာန် ပက်ထရေတ်ရိုဝ်ကဒါ ဟီုလဝ် ပ္ဍဲပေါဲသောၚ်ကလးလိက်ပရိုၚ်ရ။

စပ်ကဵုတၚ်သ္ဂုတ်သွာတ် သ္ဂောံပါဲပ္တိတ် ကောန်ပၞာန်အမေရိကာန်တံဂှ်တုဲ ကဵုလဝ်သမ္တီ ကုဌာနဝန်ဇၞော်ကာစဵုဒၞါအဳရာတ်လေဝ်ဟွံမွဲဏီတုဲ ဒပ်ပၞာန်အမေရိကာန်ဝွံ ဒၟါနူအလဵုအသဳအဳရာတ်ကော်ဘိက်လဝ်တုဲ တန်တဴဒၟံၚ်ဏောၚ်ဂှ် သ္ဂးလဝ်ရ။

ကြဴနူဒပ်ပၞာန်အမေရိကာန် ဗ္တိုက်လဝ် ရုၚ်သ္ကိုပ်ဝန်ဇၞော်အဳရာတ် မိုဝ်ဟာမက်ယှဳဟဳယာအေဝ်လသူဒါနဳ နကဵုဒရုၚ်တုဲဂှ် စကၠောန်အာပရေၚ်ပါဲပ္တိတ်တံဏောၚ်ဂှ် လလောၚ်တြးလဝ်ရ။

ဟိုတ်နူပရေၚ်ဗ္တိုက်ဏံတုဲ က္ဍိုပ်သ္ကိုပ်ဂကောံရပ်လွဟ်မွဲ ဒးချိုတ်အာလဝ်ဂှ် ဌာန်ဂအုပ်ပၞာန်ပေန်တဂေါန် ဟီုလဝ်တုဲ ဂကောံရပ်လွဟ်ဏံဝွံ တုဲကၠုၚ်ခြာဟွံလအ်တေံ ကၠောန်သ္ပဗ္တိုက်လဝ် ကောန်ဒပ်အမေရိကာန်တံဂှ် ဂွံတီကေတ်ရ။

အမေရိကာန်ဝွံ ဖျေံလဝ်ကောန်ဒပ်ညးတံ ပ္ဍဲအဳရာတ်တုဲ ပ္ဍဲသဳရဳယျာဂှ်လေဝ် ကောန်ဒပ် ၉၀၀ ပြၚ် ကေတ်လဝ်ဒၞါဲဂှ်ဂွံတီကေတ်တုဲ ကောန်ဂကောံဒပ်အမေရိကာန်တံဝွံ ညံၚ်ဂကောံအိုၚ်အက်(သ်) ဂွိုအ်ယာက္ဍိုပ်မာန် ကဵုဒၟံၚ်ကသပ်စပ်ကဵုပရေၚ်ပၞာန် ကုဂကောံဒပ်အပ္ဍဲဒေသတံရောၚ်ဂှ် ပေန်တဂေါန် ဟီုရ။

ကြဴနူပေါဲဗ္တိုက် အေဿရေ−ဟာမာသ် စလဝ် ပ္ဍဲဂိတုအံက်တဝ်ဗာတုဲကၠုၚ်တေံတုဲဂှ် ကောန်ဂကောံဒပ်အမေရိကာန် နွံဒၟံၚ်ပ္ဍဲအဳရာတ် ကေုာ ပ္ဍဲသဳရဳယျာတံဝွံ ဒးဒုၚ်ဗ္တိုက်လဝ် ဟွံအောန်နူကဵု ၁၀၀ ဝါဂှ် ဂွံတီကေတ်ရ။

ဌာနဝန်ဇၞော်ကာဍုၚ်သ္အာၚ်အမေရိကာန်ဂှ် သွက်ဂွံကလေၚ်ကော်ကောန်ဒပ်တံဂှ် ဟွံဂွံသဳကၠဳ ကုအလဵုအသဳအဳရာတ် နကဵုပရေၚ်ကလုတ်တမာန်ဏီပုဟ်ဂှ် သ္ဂးလဝ်ရ။

Ref: Reuters

Leave a Reply

Your email address will not be published. Required fields are marked *