တိုၚ်ပေ၊ ဂျာန္နဝါရဳ ၁၁
ပ္ဍဲထိုၚ်ဝါန် စပ်ကဵုပေါဲရုဲမာဲသမ္မတတုဲ အခိၚ်အရာမဒးဂွိၚ်ဂွါဲပရေၚ်ဂီုကၠီုတံ နွံဒၟံၚ်ဂှ် ဟိုတ်နူကြုက် ဗလးပ္တိုန်ဂြိုဟ်ပ္တောံတုဲ ဒးလလောၚ်ပ္တိတ်လဝ် တၚ်ကဵုသတိကာတၟေၚ်ရ။
အလံၚ်သမ္မတ လိုၚ်ချေန်တဳဂှ် ကြုက်ဝွံ ပ္တိတ်ဒၟံၚ်ဇြဟတ် သွက်ဂွံအုပ်ဓလီု လ္တူပေါဲရုဲမာဲထိုၚ်ဝါန်ဂှ်ဏောၚ် ပရေၚ်ပါ်ပါဲတံ မံက်တိတ်တုဲ ခြာဟွံလအ်ဂှ် တၚ်ကဵုသတိကာတၟေၚ် မံက်တိတ်ကၠုၚ်ရ။
သွဟ်ပေါဲရုဲမာဲ ထိုၚ်ဝါန်ဝွံ သ္ဂုတ်သွာတ်အာ ဂၠံၚ်တရဴပရေၚ်ဆက်ဆောံ ပရေၚ်တတ်ကၠောံကလိုဟ်ၜဳဂှ်ဏောၚ်ဂှ် ဂွံတီကေတ်ရ။
အခိၚ်ဒေသ လဒေါဝ်တ္ၚဲ ၃ နာဍဳ ၁၅ မိနေတ် လ္ပာ်ကြုက် လလောၚ်တြးလဝ် ဒဒှ်ရဗလးပ္တိုန် ဂြိုဟ်ပ္တောံပရေၚ်ဂၠိုက်ဂၠါဲ Einstine Probe မပကောံပ္ကေဝ်အာ တၚ်နၚ်စပ်ကဵုနက်သတ်တံ ဗွဲမအံၚ်ဇၞးဂှ် အပ္ဍဲထိုၚ်ဝါန် တၚ်ကဵုသတိကာတၟေၚ်တံ ညာန်ဗြုအာလဝ်ရ။
ဂြိုဟ်ပ္တောံကြုက်ဝွံ ဟိုတ်နူတတ်ကၠောံအာ ပယျဵုဒၞက်ကျာ သၠုၚ်ကျာထိုၚ်ဝါန်ဂှ်တုဲ နကဵုညးဍုၚ်ကွာန်ဂမၠိုၚ် ညံၚ်ဂွံဗၠးဘဲ စွံသတိအိုတ်ဂှ် ထ္မံက်ထ္ၜးလဝ် ပ္ဍဲကဵုတၚ်ကဵုသတိကာတၟေၚ် မလလောၚ်ပ္တိတ်လဝ် နကဵုဘာသာထိုၚ်ဝါန် ကေုာံ ကြုက်ရ။
ပ္ဍဲကဵုတၚ်ကဵုသတိ မလလောၚ်ပ္တိတ်လဝ် နကဵုဘာသာအၚ်ဂလိက်ဂှ် ထ္မံက်ထ္ၜးလဝ် နဒဒှ်ဍိုက်က္ၜၚ်ကျာတုဲ ကမ်လှောဝ်မွဲဖ္ဍိုက် တတ်ကၠောံအာ တွဵုဒၞက်ကျာထိုၚ်ဝါန် ထ္မံက်ထ္ၜးလဝ်ကီုလေဝ် သၞာဲဒဴတံဂှ် ဟိုတ်နူကၠာဲဘာသာဗၠေတ်မှာတုဲ ထ္မံက်ထ္ၜးဒးသာ်ဏံရောၚ်ဂှ် သ္ဂးလဝ်ရ။
သ္အာၚ်နူဂှ်ပၠန် တတ်ကၠောံအာ တွဵုဒၞက်ကျာထိုၚ်ဝါန်ဂှ်ဝွံ ကမ်လှောဝ်ဟွံသေၚ် ဒှ်ဒၟံၚ်ဂြိုဟ်ပ္တောံမွဲဂှ် ဝန်ဇၞော်ကာဍုၚ်သ္အာၚ် ဂျဵုသက်ဝူ သ္ပဒတန်လဝ် ကုအ္စာပရိုၚ်ဂမၠိုၚ်တုဲ ဒးလလောၚ်ပ္တိတ်လဝ်တၚ်ကဵုသတိဂှ်ဝွံ ဟိုတ်နူအရာမဒးလီုလာ်လဝ် ဒတုံစှ်ေကၠုၚ်မာန်ဏောၚ်ဂှ် ဟီုဂးလဝ်ရ။
ပေါဲရုဲမာဲထိုၚ်ဝါန် မကၠောန်ဗဒှ်အာ အပ္ဍဲကၞောတ်သတ္တာဟကၠုၚ်စိုပ်ဏံဂှ် ကၟိန်ဍုၚ်နာနာ ပါလုပ်သီုကဵုကြုက် ကေုာံ အမေရိကာန်တံ မၚ်ရံၚ်ဒၟံၚ်ရောၚ်ဂှ် ဂွံတီကေတ်ရ။
Ref: ABS-CBN News