ၜၚ်ကံက်၊ ဂျာန္နဝါရဳ ၁၂
ပ္ဍဲဍုၚ်သေံ ကြဴနူကဵုလဝ်အခေါၚ်ရပ်စပ်သုၚ်စောဲတၞးဘၚ် ဂွံမွဲသၞာံပြၚ်ကၠုၚ်ဂှ် သွက်မူအပြောံ သၞောဝ်သ္ဂောံတာဒၞါ အခေါၚ်ပြေလၟောၚ်ရပ်စပ်တၞးဘၚ်ဂှ် အလဵုအသဳသေံ ဂွံကပှ်အာလညာတ်ညးဍုၚ်ကွာန်တံ နွံဒၟံၚ်ရ။
သၞာံ ၂၀၂၁ လောန်ကၠုၚ်တေံ ပွမသုၚ်စောဲတၞးဘၚ်ဂှ်ဝွံ ဟွံဒှ်ဒုဟ်ဒဏ်ပုဟ် ပ္ဍဲကဵုဍုၚ်သေံ ဒှ်ကၠုၚ်ဍုၚ်အာယှဒိုဟ်အဂၞဲ စၟတ်သမ္တီလဝ်ကၠာအိုတ်ဂှ် ဆေၚ်ဖျာသွံတြးတၞးဘၚ်တံ နွံကၠုၚ်ဂၠိုၚ်ကဵုလ္ၚီတုဲ သွာၚ်ကမၠောန်တၞးဘၚ်တံ ဇြဟတ်ခိုဟ်ကၠုၚ်လဝ်တုဲ အပ္ဍဲသၞာံကၠုၚ်စိုပ်တံဏံ စၟဳစလဝ် သွက်ဂွံဂွံသြန်လုပ် စဵုကဵုဒဝ်ဠာအမေရိကာန် ၁ ဒဿမ ၂ ဗဳလျာန်ရ။
စပ်ကဵုသုၚ်စောဲဒၟံၚ်တၞးဘၚ် ဟွံဗဗွဲကဵုဒၞါဲတံဂှ်တုဲ အခိၚ်အရာမဒှ်ဓဝိၚ်တံ မံက်တိတ်ဒၟံၚ်ဂှ် သ္ကိုပ်ဝန်ဇၞော် တာဗဳဇြေန်ဂှ် ဒစဵုဒစးလဝ် ပရေၚ်ရပ်စပ်သ္ဂောံပြေလၟောၚ်တံဂှ်တုဲ ပွမရပ်စပ် စပ်ကဵုလ္ပာ်ဂဥုဲတံဂှ် အလဵုအသဳ ထံက်အာဂလာန်ဏောၚ် ဟီုလဝ်ရ။
အခိၚ်လၟုဟ် အလဵုအသဳ ကၠောန်သ္ပ သ္ဂောံဖအိုတ်ကၠေံအခေါၚ်ရပ်စပ်သုၚ်စောဲတၞးဘၚ် နဒဒှ်ပြေလၟောၚ်ဂှ်ဝွံ ပ္တိတ်ဒၟံၚ်ဇြဟတ် သွက်ဂွံထ္မံက်ရုပ်ရဴ ကတိကဝတ်ပေါဲရုဲမာဲညးတံဏောၚ်ဂှ် ဂွံတီကေတ်ရ။
နကဵုနဲကဲဗၠေတ်တ် ချူခၞံလဝ် သၞောဝ်တာဒၞါပရေၚ်ရပ်စပ်တၞးဘၚ်အပြောံဂှ်ဏောၚ်ဂှ် ဝန်ဇၞော်ပရေၚ်ထတ်ယုက် ချိုလ်နာန်သရဳကွေ ကဵုလဝ်သမ္တီ ကုမဳဒဳယျာတံရ။
မၞိဟ်ရပ်စပ်သုၚ်စောဲတၞးဘၚ် ပြေလၟောၚ်တံဂှ် ဖျေံစၟတ်အာ ဒဏ်သြန် စဵုကဵု ၆ ဠက်ဏောၚ်တုဲ ကမၠောန်လလောၚ် ကေုာံ ကမ္မဏဳမာကေတ်တေန်တံဂှ် ဖျေံစၟတ်အာဒုဟ်ဒဏ် ထံၚ်မွဲသၞာံ ဟွံသေၚ်မ္ဂး ၁ ကိုဋ်ၝာတ်ဏောၚ်ဂှ် ဂွံတီကေတ်ရ။
သ္အာၚ်နူဂှ်ပၠန် လာၚ်ဇြေန်ဟွံမွဲမွဲသာ် မၞိဟ်တဵုလွဳတၞးဘၚ်တံဂှ်လေဝ် ဖျေံစၟတ်အာဒဏ်သြန် နူကဵု ၂ ဠက်ၝာတ် စဵုကဵု ၃ ကိုဋ်ၝာတ်ဏောၚ်တုဲ နဒဒှ်ဒဏ်ထံၚ်ဂှ် နူကဵု ၁ သၞာံ ဖျေံစၟတ်အာ စဵုကဵု ၃ သၞာံဏောၚ်ဂှ် ဂွံတီကေတ်တုဲ စပ်ကဵုသၞောဝ်အပြောံဏံတုဲ နကဵုညးဍုၚ်ကွာန်တံ ကၠုၚ်စိုပ်ဂိတုဂျာန္နဝါရဳ ၂၃ ဏံ စွံလက္ကရဴအိုတ်တုဲ ဒးကဵုလညာတ်ဏောၚ်ဂှ် ဂွံတီကေတ်ရ။
ပြဟ်ဟ်ဏံ အပ္ဍဲဍုၚ်သေံ ကဵုလဝ်အခေါၚ်ရပ်စပ်သုၚ်စောဲ တၞးဘၚ် ဗွဲမလုပ်သၞောဝ်ကီုလေဝ် စပ်ကဵုပရေၚ်ရပ်စပ်ပြေလၟောၚ်တံဂှ်တုဲ အရာမယောၚ်ယာပ္ဍဲသၞောဝ်တံ နွံဒၟံၚ်ဏီဂှ် ညးလ္ၚတ်ဂမၠိုၚ် သ္ၚဳဂၠိပ်လဝ်ရ။
Ref: Reuters