ဗိက်၊ ဂျာန္နဝါရဳ ၁၂
ရးတၞၚ်သဳ၊ ပ္ဍဲပွိုၚ်ဍုၚ်ဗိက် ကရောၚ်ပၞာန်တိုက် ကံၚ်ဇြဳပၞာန်တံ ဒးဒုၚ်ဗ္တိုက်ဗ္တိုဟ်လဝ်မာၚ်တုဲ ကောန်ဒပ်ကံၚ်ဇြဳပၞာန် ၄ တၠ ချိုတ်အာလဝ်ဂှ် ဂွံတီကေတ် အတိုၚ်တၚ်လလောၚ်တြး ဂကောံဇြဟတ်ပၠန်ဂတးတံရ။
ပ္ဍဲဂိတုဂျာန္နဝါရဳ ၁၀ အခိၚ်ဇိုၚ်သဝ်တ္ၚဲ ၜိုတ် ၄ နာဍဳ ကရောၚ်ပၞာန်တိုက်ကံၚ်ဇြဳပၞာန် ကၠုၚ်နူဍုၚ်တၞၚ်သဳ ဇြဟတ်ပွဳပွူ ၇၀ ဂှ် ဂကောံဇြဟတ်ပၠန်ဂတးတံ ဗ္တိုက်ဗ္တိုဟ်လဝ်မာၚ် အကြာကွာန်တဂါန်ဒံၚ်ပု ကေုာံ ကွာန်ခုၚ်မှဝ်ရ။
ဟိုတ်နူပရေၚ်ဗ္တိုက်ဗ္တိုဟ်မာၚ် ဂကောံဇြဟတ်ပၠန်ဂတးတံတုဲ ကောန်ဒပ်ကံၚ်ဇြဳပၞာန် ၄ တၠ ချိုတ်တုဲ မၞိဟ်ဇီုကပိုက်ကလိဂွံဝပ် ဂၠိုၚ်လဝ်ဂှ် ညးဒုၚ်တာလျိုၚ် လလောၚ်ပရိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ကျောန်သု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပရေၚ်ဗ္တိုက်ဗ္တိုဟ်မာၚ်ဂှ် လ္ပာ်ဒပ်ကံၚ်ဇြဳပၞာန် ဟိုတ်နူပန်ပှော်လဝ် နကဵုလွဟ်ဇၞော်ကြာန်န်တုဲ ညးဒေသ နူကဵုကွာန် တဂါန်ဒံၚ်ပု ၂ တၠ ဇီုကပိုက်ကလိဂွံလဝ်ဝပ်သၟးဟွံက ဘာဗ္တောန်လိက်မွဲဘာလေဝ် ပၟတ်တူလီုလာ်အာလဝ်ဂှ် ညးတာလျိုၚ်လလောၚ်ပရိုၚ် ဂကောံဒပ်စဵုဒၞါညးဍုၚ်ကွာန် တဝ်ဗုၚ်ကျဳ ဟီုရ။
ဟိုတ်နူအကာဲအရာပရေၚ်ပၞာန် မက္တဵုဒှ်ဒၟံၚ် ပ္ဍဲသ္ကုတ်ဂၠံၚ် ပွိုၚ်ဍုၚ်ဗိက်ကဵု ပွိုၚ်ဍုၚ်တၞၚ်သဳဂှ်တုဲ နကဵုညးဒေသတံ ကေုာံ ညးဍုၚ်ကွာန်အာတရဴတံ ညံၚ်ဂွံပစိုတ် ကုပရေၚ်ပၞာန်ဂှ်ကီု၊ သွက်ဂွံဒ္ဂေတ်ဗက်ကဵု တၚ်လလောၚ်တြးတံဂှ် ကဵုသမ္တီဖ္တိုက်ဖ္အောဝ်လဝ်ရ။
ပရေၚ်ဗ္တိုက်ဏံဂှ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ကျောန်သု−ပကဖ၊ ဂကောံဒပ်စဵုဒၞါညးဍုၚ်ကွာန် တဝ်ဗုၚ်ကျဳ (ပကဖ−တၞၚ်သဳ) ၊ ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ပဠဝ် − ပကဖ ကေုာံ ဂကောံဒပ်ဂီုကၠီု ရးတၞၚ်သဳတံ ဗ္တိုက်ဗ္တိုဟ်လဝ်မခတိုဟ် နကဵုသၞောတ်ဒမၠုက်ရ။
တုဲကၠုၚ် ပ္ဍဲသၞာံ ၂၀၂၃ ဂိတုဒဳဇြေမ်ဗာ သတ္တာဟလက္ကရဴအိုတ်ဂှ်လေဝ် ပ္ဍဲပွိုၚ်ဍုၚ်ဗိက်၊ ကွာန်တဂါန်ဒံၚ်ပုဂှ် ဂကောံဇြဟတ်ပၠန်ဂတးတံ လုပ်စိုပ်ဍိုက်ဗ္တိုက်လဝ် သၞေဟ်ကၚ်စၟဳတ်ကံၚ်ဇြဳပၞာန် မကံက်ဒၟံၚ်အခေါန်တံဂှ်တုဲ စံၚ်ပလီုပလာ်လဝ်ဏီရ။
ပရိုၚ်−သြၚ်လောန်တိုၚ်(မ်)
ဗီု− PDF ကျောန်သု