နေဗျဳဒဝ်၊ ဂျာန္နဝါရဳ ၁၂
ပ္ဍဲလၟေၚ်တရဴဍုၚ်ဗၟာ ညးစၞးတၟေၚ်အာဇြဳယာန်တၟိစပ်ကဵုဍုၚ်ဗၟာ အေလောန်ကဳရိုဝ် ကေတ်တေတ်ဟံၚ် အလန်ကိုပ်ကၠာအိုတ်ဂှ် ထပ်သဳကၠဳစုတ်လဝ် ကိစ္စစပ်ကဵုပရေၚ်ၜိုဟ်လလမ် ကေုာံ တၚ်တုပ်စိုတ်အာဇြဳယာန် ၅ တၚ်ဂှ် ကံၚ်ဇြဳပၞာန် လလောၚ်ပ္တိတ်လဝ်ရ။
ပ္ဍဲဂိတုဂျာန္နဝါရဳ ၁၀ တေံ ညးစၞးတၟေၚ်အာဇြဳယာန် ဆဵုဂဗလဝ်ကဵု က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် သီုကဵုဂကောံရပ်လွဟ်ကောန်ဍုၚ်အရၚ်ဒေါအ်ပန်ပှော် ၇ ဂကောံ ကေုာံ ဝန်ဇၞော်အပ္ဍဲဍုၚ် ဒုသ္ကိုပ်ဗိုလ်ဇၞော် ယျာပျေအ်တံ ပ္ဍဲနေဗျဳဒဝ်ရ။
ပ္ဍဲကဵုဆဵုဂဗလဝ် ကုက္ဍိုပ်သ္ကိုပ်ပၞာန်ဂှ် နကဵုဍုၚ်ဗၟာ ပ္ညဳကဵုလၟေၚ်ကမၠောန်ဂတ နူကဵုကံၚ်ဇြဳပၞာန်တံ မဖျေံစၟတ်လဝ် တၚ်တုပ်စိုတ်အာဇြဳယာန် ၅ တၚ်ဂှ်တုဲ သဳကၠဳလဝ် အကာဲအရာထ္မံက်ဒၟံၚ်ရုပ်ရဴတံရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးတံရ။
သ္အာၚ်နူဂှ်ပၠန် နကဵုဍုၚ်ဗၟာ သွက်ဂွံပါလုပ်ပ္ဍဲကဵုကိစ္စ ကဵုအရီုဗၚ်စပ်ကဵုပရေၚ်ဗ္စာရဏာမၞိဟ်တံ ပေၚ်ၚ်ဂှ်ကီု၊ သၞာံ ၂၀၂၄ အခိၚ်ကေတ်လဝ်တာလျိုၚ် နဒဒှ်ဥက္ကဌ ဒးအလန်အာဇြဳယာန်ဂှ် ကမၠောန်မ္ဒးထ္မံက်ရုပ်ရဴကဵုက္ဍိုပ်တံဂှ် သဳကၠဳလဝ်ညးသ္ကအ်ရ။
ပ္ဍဲကဵုညးစၞးတၟေၚ်အာဇြဳယာန် ကေုာံ ဂကောံဒေါအ်ပန်ပှော်တံ ဆဵုဂဗလဝ်ညးသ္ကအ်ဂှ် သဳကၠဳလဝ် တၚ်တုပ်စိုတ်အာဇြဳယာန် ၅ တၚ်၊ ကိစ္စစပ်ကဵုကမၠောန်ပရေၚ်ၜိုဟ်လလမ် ဍုၚ်ဗၟာ ကေုာံ ကိစ္စစပ်ကဵု သ္ဂောံကဵုအရီုဗၚ် စပ်ကဵုပရေၚ်ဗ္စာရဏာမၞိဟ်တံဂှ်ရ။
ဝန်ဇၞော်ကာအပ္ဍဲဍုၚ် ဒုသ္ကိုပ်ဗိုလ်ဇၞော် ယျာပျေအ်ဂှ် ပ္တိုန်ထ္ၜးလဝ် အကာဲအရာသဳကၠဳဆဵုဂဗ ပရေၚ်ၜိုဟ်လလမ် ကေုာံ ဂကောံရပ်လွဟ်ကောန်ဍုၚ်အရၚ်တံ ကုညးစၞးတၟေၚ်အာဇြဳယာန်တုဲ ပ္ဍဲကဵုပရေၚ်သဳကၠဳသှ်ေတံဂှ် ဒှ်တၚ်သဳကၠဳ လအာတုပ်ကဵု ဂကောံဒေါအ်ပန်ပှော် ၇ ဂကောံတံရ။
ညးလ္ၚတ်သ္ၚဳဂၠိပ်ပရေၚ်ဍုၚ်ဗၟာ ဒံက်တာလှကျဝ်ဇြဝ်ဂှ် နကဵုဒပ်ပၞာန် ချပ်လဝ်သ္ဂောံဒုၚ်ကျဟွံမွဲဏီဂှ်ရ ညးစၞးလာအိုဝ်ကၠုၚ်စိုပ်ဂှ်လေဝ် ဒှ်လၟေၚ်ကမၠောန်ဓမ္မတာရတုဲ ပရေၚ်ဍုၚ်ဗၟာ တၟေၚ်ကၠုၚ်ဏောၚ် ဟွံထေၚ်ပုဟ်ဂှ် သ္ၚဳဂၠိပ်လဝ်ရ။
“ ဒဵုကဵုအခိၚ်လၟုဟ် ဒပ်ပၞာန် စိုတ်ဟွံဍိုန်စှ်ေဏီပုဟ်။ ဗွဲတၟေၚ် က္ဍိုပ်သ္ကိုပ်လ္တူလ္တူတေံဂှ်ရ။ ညးတံဂှ် သွက်ဂွံပါ်ပရအ်အဝဵုဒှ်ဒှ်၊ အခေါၚ်အရာဍေံတံဂွံလဝ်တံဂှ် သွက်ဂွံဖအောန်ဒှ်ဒှ် ဒဵုကဵုအခိၚ်လၟုဟ် ချပ်လဝ်ဟွံမွဲဏီပုဟ်။ ဟိုတ်ဂှ်ရ တၟေၚ်ကၠုၚ်ကွေံကွေံဏောၚ်ဂှ် ဟွံထေၚ်ပုဟ်။ ညးစၞးတၟေၚ်လာအိုဝ်ဂှ်တှ်ေ ညးဂှ် ဆၜိုတ်ကၠုၚ်လ္ၚတ်ရ ဒှ်ဏောၚ်။ ညအ်ဂှ် လၟေၚ်ကမၠောန်ဓမ္မတာရဏောၚ်။ ဂွံတာလျိုၚ်တၟိယျဟီုတှ်ေ ညးဂှ် ဒးတီလဝ်အကာဲအရာတံဏံဏောၚ်တှ်ေလေဝ် ဟိုတ်ဂှ်ရ ကၠုၚ်လ္ၚတ်ရဏောၚ် ဒှ်မာန်ဏောၚ်” သာ်ဝွံ သ္ဂးရ။
နကဵုအာဇြဳယာန် စပ်ကဵုပရေၚ်ဍုၚ်ဗၟာတုဲ ပ္ဍဲသၞာံသီလဝ်အဝဵု သၞာံ ၂၀၂၁ ဂိတုဨပရဴဂှ် ဖျေံစၟတ်လဝ် တၚ်တုပ်စိုတ် ၅ သာ် အလဵုက္ဍိုပ်သ္ကိုပ်ပၞာန် ထ္ပက်လဝ်စၟတ်တဲ သွက်ဂွံထ္မံက်ရုပ်ရဴနတဲရ။
ပ္ဍဲကဵုတၚ်တုပ်စိုတ် ၅ သာ်ဂှ် သွက်ဂွံကလေၚ်ဗလးကဵု က္ဍိုပ်သ္ကိုပ်ကၟိန်ဍုၚ် ကေုာံ ကောန်ထံၚ်ပရေၚ်ဍုၚ်ကွာန် မရပ်ဒက်လဝ်တံဂှ်ကီု၊ သွက်ဂွံဒေါအ်ဒေၚ်ကဵု ပရေၚ်သောၚ်ကလးနနဲပကီုပရာပ်တံဂှ်ကီု၊ သွက်ဂွံဆဵုဂဗသဳကၠဳ ကုဂကောံမဆေၚ်စပ်တံသီုဖအိုတ်ဂှ်ကီု၊ သွက်ဂွံကဵုအရီုဗၚ် စပ်ကဵုပရေၚ်ဗ္စာရဏာမၞိဟ်တံ ဒှ်တမ် တၚ်နၚ်တံဏံ ပါလုပ်ရ။
ညးစၞးတၟေၚ်ကၟိန်ဍုၚ် မဒးကေတ်လဝ်တာလျိုၚ် နဒဒှ်ဥက္ကဌ ဒးအလန်အာဇြဳယာန်တံဂှ်ဝွံ ၜိုန်ရပ္တိတ်ကၠုၚ်ဇြဟတ် ကြပ်ပွိုၚ်ပိသၞာံကီုလေဝ် လ္ပာ်ကံၚ်ဇြဳပၞာန် ဟွံဒ္ဂေတ်ဗက်လဝ် တၚ်တုပ်စိုတ်တံဏံရ။
ဟိုတ်ဂှ်ရ ပ္ဍဲကဵုကောံဓရီုအာဇြဳယာန်တံကဵု ကောံဓရီုဝန်ဇၞော်ကာဍုၚ်သ္အာၚ်တံဂှ် တာဒၞါလဝ် ညးစၞးလ္ပာ်ကံၚ်ဇြဳပၞာန်တံ အခေါၚ်သ္ဂောံတိုန်စိုပ် နဒဒှ်ညးစၞးဍုၚ်ဗၟာဂှ်ရ။
နကဵုကံၚ်ဇြဳပၞာန် ကုဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ ဟွံဒှ်ဒၟံၚ်ပေါဲဗ္တိုက်တံသၟးရ သဳကၠဳလဝ် ပရေၚ်ၜိုဟ်လလမ်တံနွံကီုလေဝ် ကု NUG PDF ပါလုပ်သီုကဵုဂကောံရပ်လွဟ်ကောန်ဍုၚ်အရၚ်တံဂှ် သဳကၠဳလဝ်ပရေၚ်ၜိုဟ်လလမ်ဟွံမွဲရ။
ပရိုၚ်−သြၚ်လောန်တိုၚ်(မ်)
ဗီု−MOI