ပ္ဍဲတက္ကသိုလ်မတ်မလီုဒမြိပ်တိုန်ဘာတံအောန်စှ်ေကၠုၚ်

မတ်မလီု၊ ဂျာန္နဝါရဳ ၁၂

တွဵုရးဍုၚ်မန် ပ္ဍဲတက္ကသိုလ်မတ်မလီု အပ္ဍဲသၞာံဗ္တောန်ပညာ ဒပ်ပၞာန်သီလဝ်အဝဵုဏံ ဒးဂဗလဝ် ဒမြိပ်တိုန်ဘာ အောန်စှ်ေကၠုၚ်ဂှ် ဂၠိုက်ဂၠါဲဂွံတီကေတ် နူကဵုဗွိုၚ် သၞာဲဒဴ Non CDM တံရ။

သၞာံဗ္တောန်ပညာတုဲကၠုၚ်တေံ ကွးဘာတက္ကသိုလ် တိုန်စိုပ်လဝ်ဘာဂှ် နွံလဝ် စဵုကဵု ၄၀၀၀၀ ပြၚ်ကီုလေဝ် ပ္ဍဲသၞာံဗ္တောန်ပညာဏံ ကွးဘာ ၜိုတ် ၇၀၀၀ ဓဝ်ဟေၚ် ကၠုၚ်စိုပ်ပအပ်လဝ်ဘာဂှ် ဂွံတီကေတ်ရ။

အခိၚ်ကာလပအပ်ဘာ သၞာံဗ္တောန်ပညာဏံဂှ် စဒုၚ်လဝ်တဲ နူကဵုဂိတုနဝ်ဝေမ်ဗာတုဲကၠုၚ်တေံတုဲ စၟတ်လဝ် စဵုကဵုဂိတုဒဳဇြေမ်ဗာ မဒှ်အခိၚ်ကာလပအပ်ဘာလက္ကရဴအိုတ်ဂှ်ရ။

အပ္ဍဲအကြာဏံ ကွးဘာ နူကဵုမေဂျာနာနာ ၜိုတ် ၇၀၀၀ ဓဝ်ဟေၚ် ပအပ်လဝ်ဘာဂှ်ရ ယဝ်ရဒးပ္တောံၜတ်ကဵုသၞာံဗ္တောန်ပညာတုဲကၠုၚ်တေံမ္ဂး မၞိဟ်တိုန်ဘာ အောန်စှ်ေကၠုၚ် စဵုကဵု ၃၀၀၀၀ ပြၚ်ရ။

မၞိဟ်တိုန်ဘာ အောန်စှ်ေကၠုၚ်ဂှ်ဝွံ ပ္ဍဲလက်ထက်ကံၚ်ဇြဳပၞာန် ဟိုတ်နူအခက်အခုဲ ပရေၚ်စသုၚ်မံၚ်စံၚ်ဂြောဝ်ဂတာတံတုဲ တိတ်ဍုၚ်မ္ၚး ဒမြိပ်ကၠောန်ကလောန်တံ သၠုၚ်တိုန်ကၠုၚ်ကီု၊ ဟိုတ်နူပေါဲဗ္တိုက်တုဲ ဒးပါဲဒလေတ်ဘဲပၞာန်ကီု၊ လှုဲဟွံမာန်တုဲ အခေါၚ်ဗ္တောန်ပညာ ဒးဆောံလေၚ်ကၠုၚ်ရ။

“ကွးဘာတံဂှ် စိုပ်ဒၟံၚ်လ္ပာ် CDM ပိုယ်တံဟာ သၟာန်တှ်ေ ဟွံမွဲဒၟံၚ်ပုဟ်။ အဲထေၚ်ဂှ်တှ်ေ ဍုၚ်သ္အာၚ်ရဏောၚ်။ ဂွံစဂွံသုၚ် ပ္ဍဲကဵုဍုၚ်မ္ၚး ဟွံသေၚ်မ္ဂး အပ္ဍဲဍုၚ်ရဂှ် ဒးရုန်ဂ္စါန် စသုၚ်ဒၟံၚ်အိုတ်ရ။ တိတ်အာဍုၚ်မ္ၚးအိုတ်ယျ ထေၚ်ကေတ်ရ။ အဲထေၚ်ဂှ်တှ်ေ ကွးဘာဂမၠိုၚ် နွံဒၟံၚ် ပ္ဍဲသွာၚ်ပရေၚ်ပညာ ဟွံသေၚ်ပုဟ်” သာ်ဝွံ အ္စာတက္ကသိုလ် သ္ပလဝ် CDM မွဲတၠ ဟီုရ။

သ္အာၚ်နူဂှ်ပၠန် ရံၚ်ကေတ် အကာဲအရာလၟုဟ်မ္ဂး ပ္ဍဲလက်ထက်ကံၚ်ဇြဳပၞာန်ဂှ် ပရေၚ်ကတ်ဗ္တောန်ပညာ စှ်ေကၠုၚ်ဒၟံၚ်ဂှ် ဂွံဆဵုကေတ်မာန်တုဲ သၞောတ်ပညာဍုၚ်ဗၟာဝွံ ဒှ်ဒၟံၚ်အကာဲအရာ သရိုဟ်စှ်ေအာဒၟံၚ်ပေၚ်ၚ်ဂှ် ညးဆက်ဟီုရ။

ဟိုတ်နူပအပ်ဘာတံ အောန်စှ်ေကၠုၚ်တုဲ ပ္ဍဲသၞာံတုဲကၠုၚ်တေံ ပ္ဍဲဒၞါဲဗ္တောန်လိက်တံဂှ် ဗ္ဒမ်ဗ္တောန်လိက်မွဲဗ္ဒမ်ဂှ် ကွးဘာဂၠိုၚ်ကဵုကၠံ နွံလဝ်ဂှ် အခိၚ်လၟုဟ် ပ္ဍဲအခန်ဗ္တောန်လိက်မွဲအခန်ဂှ် ကွးဘာ ၜိုတ်ပွဳပွူ ၄၀ ဓဝ်ရ နွံဂှ် ဂွံတီကေတ် နူကဵုဗွိုၚ်သၞာဲဒဴ Non-CDM တံရ။

တက္ကသိုလ်မတ်မလီုဂှ် ဘာသာမေဂျာဗ္တောန်ကဵုဒၟံၚ်ဂှ် ၁၇ နွံတုဲ ကၠာကံၚ်ဇြဳပၞာန်ဂွိုအ်သီအဝဵုဂှ် လၟေၚ်သၞာံ ကွးဘာတိုန်ဘာတံဂှ် နွံလဝ် ကဵုဠက်ရ။

တက္ကသိုလ်လွိုၚ်ကဝ် တွဵုရးကရေၚ်ဍာဲ ဒၞါဲပေါဲဗ္တိုက်သ္ကာတ်မြဟ်ဒၟံၚ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ဒးကၟာတ်လဝ်ဘာ ဟွံမွဲကဵုအခိၚ်တွဵုဒၞက်ရ။

ဒၟါနူယဲကပ်ကဝ်ဝေဒ် ကေုာံ ပရေၚ်ပၞာန်သီအဝဵု သၞာံ ၂၀၂၁ ဂှ်တုဲ သွာၚ်ပရေၚ်ပညာဍုၚ်ဗမာဝွံ ဒးဆေၚ်ဒၟံၚ်မုက် ကဵုအကြေပ်အဂြတ်တုဲ အခေါၚ်ဗ္တောန်ပညာ ညးသၟတ်တၞောဝ်တၟိတံ အန္တရာယ်နွံကၠုၚ်ယျဂှ် တိုက်သြန်ဂၠးတိ ကဵုလဝ်သတိရ။

ဂကောံမၚ်ရံၚ်ကဏ္ဍပရေၚ်ပညာမွဲ ECW ဂှ်လေဝ် ကောန်ၚာ်သၟတ် နူကဵုဍုၚ်ဗၟာ ၁၇ ပြကောဋိကိုဋ်ဂှ်ဝွံ ဟိုတ်နူပရေၚ်ပၞာန်သီအဝဵုတုဲ ဒၟါနူဖဵုအဆက်ပဋိပက္ခရပ်လွဟ် မက္တဵုဒှ်ကၠုၚ်တံဂှ်ရ ဒးဆောံလေၚ်ဒၟံၚ် အခေါၚ်ဗ္တောန်ပညာတံရောၚ်ဂှ် ပ္ဍဲတမ်သၞာံတုဲကၠုၚ်တေံ လလောၚ်ပ္တိတ်လဝ် လိက်ဒုၚ်စဳရေၚ်ရ။

ပရိုၚ်−သြၚ်လောန်တိုၚ်(မ်)

ဗီု−TLT