ကျာ်ထဝ်၊ ဂျာန္နဝါရဳ ၁၃
ဂကောံဂီုကၠီုတိုက်သြန်အေန်ဝ ဒပ်ပၞာန်ပိုၚ် လ္တူဍုၚ်ကျာ်ထဝ် တွဵုရးဍုၚ်မန် ဒးဒုၚ်ဗ္တိုက်လဝ်တုဲ ကောန်ဒပ်ပၞာန်ပျဳတုသေတ် ကံၚ်ဇြဳပၞာန်မွဲတၠ ချိုတ်တုဲ မၞိဟ်ဗြဴမွဲတၠ ကလိဂွံလဝ်ဝပ်ဂှ် ဂွံတီကေတ် အတိုၚ်တၚ်လလောၚ်တြး ညးဒေသတံရ။
ဂကောံဂီုကၠီုတိုက်သြန်အေန်ဝဂှ် ပ္ဍဲဂိတုဂျာန္နဝါရဳ ၁၂ အခိၚ်လဒေါဝ်တ္ၚဲ ၜိုတ် ၁ နာဍဳဂှ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ကၠုၚ်စိုပ်ဗ္တိုက်ပန်ပှော်လဝ် နကဵုကွဳစက်မွဲဖ္ဍိုက်ဂှ်ရ ပရေၚ်ပန်ပှော်ၜါလ္ပာ် က္တဵုဒှ်လဝ်ရ။
အပ္ဍဲပရေၚ်ပန်ပှော်ဂှ် ကောန်ပၞာန်ပျဳတုသေတ်ကံၚ်ဇြဳပၞာန်မွဲတၠ ချိုတ်တုဲ လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံ သီဂွံလဝ် သီုကဵုသေနာတ်မွဲဇကိုအ်ဂှ် ဂွံတီကေတ် နူကဵုပရိုၚ်တမ်ရိုဟ်ဗလးတိတံရ။
အပ္ဍဲပရေၚ်ပန်ပှော်ၜါလ္ပာ်ဂှ် ညးဗြဴဒေသမွဲတၠ မကမ်တေက်ဒး ကလိဂွံအာလဝ်ဝပ်ဂှ်ရ ပလံၚ်ဗစိုပ်လွဳကဵုလဝ် ဇရေၚ်ရုၚ်ဂဥုဲညးဍုၚ်ကွာန်ကျာ်ထဝ်ရ။
ကြဴနူပရေၚ်ပန်ပှော်ဂှ်တုဲ ဟွံလအ်ဂှ် ကောန်ဂကောံဒပ်ကံၚ်ဇြဳပၞာန်တံ ၜိုန်ရကၟာတ်လဒဵုဂၠိုက်ဂၠါဲလဝ် အပ္ဍဲဍုၚ်ကီုလေဝ် အခိၚ်ဇိုၚ်သဝ်တ္ၚဲဂှ် အာကၠုၚ်ချဳဒရာၚ်ဒၟံၚ် အတိုၚ်သၞောတ်တြေံယျဂှ် ဂွံတီကေတ်ရ။
စပ်ကဵုပရေၚ်ဗ္တိုက် တိုက်သြန်အေန်ဝဂှ်တုဲ ဂကောံဒပ်ပံၚ်ကောံ ဂကောံဇြဟတ်ပၠန်ဂတး ဖျေံသ္ဇိုၚ်ကျာ်ထဝ်တံ လလောၚ်ပ္တိတ်လဝ်မွဲမွဲသာ် ဟွံမွဲဏီရ။
ပ္ဍဲဂိတုသေပ်တေမ်ဗာ ၂၆ သၞာံတုဲကၠုၚ်တေံဂှ်လေဝ် ဟိုတ်နူတိုက်သြန်ဗြဝတဳ ဒပ်ပၞာန်ပိုၚ် လ္တူဍုၚ်ရေဝ် တွဵုရးဍုၚ်မန် ဒးဒုၚ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန်မွဲတၠ ကေုာံ သၞာဲဒဴတိုက်သြန်မွဲတၠ ချိုတ်အာလဝ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−SBM