ကိဗ်၊ ဂျာန္နဝါရဳ ၁၃
ပ္ဍဲရုယှာ ဟိုတ်နူကပေါတ်လွဟ်လက်နက်လ္ၚဵု ပိုတ်သ္ကုတ်ဒၟံၚ်တုဲ နကဵုယူကရုၚ် ယဝ်ရဒေါအ်ဒေၚ်ထောံ ပရေၚ်ဗ္တိုက်တံဂှ်မ္ဂး သွက်ပူတေန် ပရဲတိတ်အာဒှ်မာန်ဏောၚ် သမ္မတ ဇြဳလာန်သကဳ ဟီုဂးလဝ်ရ။
ပ္ဍဲကဵုပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲဍုၚ်တလေန် ဍုၚ်အက်သတဝ်နဳယျာဂှ် ယဝ်ရဒေါအ်ဒေၚ်ထောံ ပရေၚ်ဗ္တိုက်တံဏံမ္ဂး စပ်ကဵုပရေၚ်သ္ဂောံဂွံလွဟ်လက်နက်တံဂှ်တုဲ သွက်ယူကရုၚ် ပရဲနွံမာန်ဏောၚ် ဟီုဂးလဝ်ဂှ်တုဲ ကလေၚ်ခၠေဝ်လဝ်သာ်ဏံရ။
ဒေါအ်ဒေၚ်ထောံ ပရေၚ်ဗ္တိုက် ပ္ဍဲဗလးမုက်ပၞာန် နူကဵုပယျဵုဒၞက်ယူကရုၚ်ဟီုဂှ် ဒှ်အရာဒေါအ်ဒေၚ် သွက်ပေါဲပၞာန်ဟွံသေၚ်တုဲ ပ္တဝ်အာက္ဍိုပ် လ္ပာ်ပရေၚ်သဳကၠဳ လ္ဂောံကဵုပရေၚ်ဍုၚ်ကွာန်တံလေဝ် ဟွံသေၚ်ပုဟ်ဂှ် ဇြဳလာန်သကဳ ဟီုရ။
ပ္ဍဲဒပ်ပၞာန်ရုယှာ ဒရုၚ် ကေုာံ လွဟ်ဇၞော်တံ ပိုတ်အိုတ်ဒၟံၚ်တုဲ ကမ်လှောဝ်တံလေဝ် ပိုတ်သ္ကုတ်ဒၟံၚ်ဂှ်ရ အခိၚ်ဏံ ပိုယ်တံ ဒးဆက်ထ္ပက်အာပၞာန်ထေက်ဏောၚ်ဂှ် ညးဆက်ဟီုလဝ်ဏီရ။
အခိၚ်လၟုဟ် ရုယှာ ကလိဂွံလဝ်ခၞော်မကမ်လွဟ်ဇၞော် နူကဵုကိုဝ်ရဳယျာသၟဝ်ကျာတုဲ ဇရေၚ်အဳရာန်ဂှ်တှ်ေ သွက်ဂွံရာန်ကမ်လှောဝ်ပရေၚ်ဗ္တိုက်တံဂှ် ကၠောန်ၜိုတ်ဒၟံၚ် ပရေၚ်ပ္ညဳပ္ညပ်တံဂှ် ဂွံတီကေတ်ရ။
ကြဴနူလုပ်ၜက်ၜေတ်ဗ္တိုက်လဝ်ယူကရုၚ်တုဲဂှ် ရုယှာဝွံ ဟိုတ်နူသုၚ်စောဲလဝ် လွဟ်လက်နက်ညးတံဂှ်ရ အခါလၟုဟ် ရုၚ်ကြိုၚ်လွဟ်လက်နက်ညးတံဝွံ ခၞော်သၟးရနွံဒၟံၚ်ဂှ် ဇြဳလာန်သကဳ ဟီုရ။
အခိၚ်လၟုဟ် ယဝ်ရဒေါအ်ထေၚ်ထောံ ပရေၚ်ဗ္တိုက်တံဂှ်မ္ဂး သွက်ယူကရုၚ် ဂွံအခိၚ် သွက်ဂွံဗပေၚ်လွဟ်လက်နက်ဂှ် ဍာံပြကီုလေဝ် ရုယှာလေဝ် ဂွံအာအခိၚ် ဂွံပကောံပကေဝ်လွဟ်လက်နက်တံဂှ်တုဲ အခိၚ်ညးတံ လွဟ်လက်နက်ပိုတ်ဒၟံၚ်ဂှ် ဒေါအ်ဒေၚ်အာပရေၚ်ဗ္တိုက်တံ ဟွံသေၚ်ပုဟ်ဂှ် သ္ဂးလဝ်ရ။
သ္အာၚ်နူဂှ်ပၠန် ဂလာန်မဟီုဂးလဝ် သွက်ဂွံဒေါအ်ဒေၚ်ပရေၚ်ပန်ပှော်ဂှ်လေဝ် တးပါဲလဝ်တုဲ ယဝ်ရဒေါအ်ဒေၚ်ထောံပန်ပှော်မ္ဂး ရုယှာ လိုန်သၠေက်အာဇကုတံဏောၚ်ဂှ် ကဵုလဝ်သတိရ။
Ref: Yahoo news