ကျာ်မြဟ်၊ ဂျာန္နဝါရဳ ၁၃
ဟိုတ်နူပေါဲဗ္တိုက်ၜါသွာၚ် ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ်တုဲ ညးဍုၚ်ကွာန်ပါဲဒဴဘဲပၞာန် ဒးဂြိပ်ဒဴပါဲဒလေတ် ထောံလသာသ္ၚိဌာန် ၂၀၀၀၀ ပြၚ်ဝွံ စဵုကဵုလအ်ကၠုၚ်ၜါဂိတုဂှ် စဴဌာန်ဒၟံၚ်ဟွံမာန်ဏီတုဲ နွံပၟိက်ကၠုၚ်အရီုဗၚ် ဇွောံမ ကေုာံ ဂဥုဲဇဗတံ သၠုၚ်တိုန်ကၠုၚ်ဂှ် ဂွံတီကေတ် အတိုၚ်ဂလာန် ညးဒေသပါဲဒဴဘဲပၞာန်တံရ။
စနူဂိတုနဝ်ဝေမ်ဗာတုဲကၠုၚ်တေံတုဲ ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNU လုပ်စိုပ်ဗ္တိုက်လဝ် ဗ္ဒိုပ်သၞေဟ်ကၚ်ဒဒန် ကေုာံ ဗ္ဒိုပ်ဗၠာဲသၟိၚ်တိဍာ်ၜါသွာၚ် ကံၚ်ဇြဳပၞာန်တံတုဲဂှ် ပေါဲဗ္တိုက်ၜါလ္ပာ် က္တဵုဒှ်လဝ် ဗွဲမသ္ကာတ်မြဟ်ရ။
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် လလအ်ပွိုၚ် ၅၀ တ္ၚဲပြၚ်ဂှ် ပ္ဍဲဂိတုဒဳဇြေမ်ဗာ ၂၉ တုဲကၠုၚ်တေံ ကံၚ်ဇြဳပၞာန် ကလေၚ်ထိၚ်ဒက်ဂွံလဝ် အလုံဒေသၜါသွာၚ်မွဲဂှ်ကီုလေဝ် ညးဍုၚ်ကွာန်ပါဲဒဴဘဲပၞာန်တံဝွံ ဒဵုကဵုအခိၚ်လၟုဟ် ကလေၚ်စဴဌာန်ဒၟံၚ်ဟွံမာန်ဏီရ။
ညးဍုၚ်ကွာန်ပါဲဒဴဘဲပၞာန်ဂမၠိုၚ်ဝွံ ဒပ်ကံၚ်ဇြဳပၞာန် ဟိုတ်နူကလေၚ်ဖျေံလဝ်ဒပ် အပ္ဍဲဗ္ဒိုပ်ဗၠာဲသၟိၚ်ၜါသွာၚ်ဂှ်ကီု၊ ပ္ဍဲကဵုကွာန်တၟံဗြဴ သီုကဵုကွာန်ပွဳပွူဗ္ဒါဲဗ္ဒါဲလ္ၚဵုတံဂှ် ဆက်ဖျေံလဝ်ဒပ်ဂှ်ရ ဂွံကလေၚ်စဴဌာန်ဒၟံၚ်ဂှ် အရာမဒှ်ဓဝိၚ်တံ နွံဒၟံၚ်ရောၚ် ဂွံတီကေတ်ရ။
ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ထောံလသာဌာန်ဒၟံၚ်တံဂှ်ဝွံ တ္ၚဲပါဲဒဴဘဲပၞာန် ဂၠိၚ်သ္ၚောဲကၠုၚ်ဗက် အရာမနွံပၟိက် အရီုဗၚ်ဇွောံမစၞစ ကေုာံ ဂဥုဲဇဗတံ သၠုၚ်တိုန်ကၠုၚ်တုဲ မၞိဟ်ကဵုလ္ၚီ ဒးချာံ၊ ခ္ဍက်၊ က္တဵုဒှ်ဒၟံၚ်ယဲတံဂှ် ညးဍုၚ်ကွာန်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မွဲလ္ပာ်ဂှ်ပၠန် နူကဵုၜါသွာၚ်၊ တၟံဗြဴ၊ မဂြဝ် ကေုာံ ကွာန်လှာဂဇိုၚ် သ္ၚိဒၟံၚ်ဟွံအောန်နူကဵု ၁၀၀၀ မ္ဒးထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ် ကြပ်အလုံကွာန်မွဲတံဂှ် ဒပ်ကံၚ်ဇြဳပၞာန်တံ ကၠတ်ဂၠံက်တုဲ ကေတ်ဏာလဝ် ကပေါတ်မၞုံကဵုၚုဟ်မးတံဂှ်ရ။
ဟိုတ်နူပေါဲဗ္တိုက်ၜါသွာၚ်တုဲ ညးဒေသ ၂၀၀၀၀ ပြၚ် နူကဵုၜါသွာၚ်၊ လှာဂဇိုၚ်၊ ကအ်ဒုန်၊ ကအ်ပၞဟ်၊ မဂြဝ်၊ တၟံဗြဴတံပါလုပ်ဂှ် ကွာန် ၂၀ ပြၚ်တံဂှ်ဝွံ ဒးပါဲဒၟံၚ်ဘဲပၞာန် လ္ပာ်ကျာ်မြဟ်၊ မတ်မလီု ကေုာံ ဍုၚ်မုဟ်ဍုၚ် ဒၞါဲဗၠးဘဲတံဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ