မတ်မလီု၊ ဂျာန္နဝါရဳ ၁၃
အပ္ဍဲကာလသီအဝဵုဏံ မ္ၚးနူကဵုပေါဲဗ္တိုက်အလုံဍုၚ်ဂှ် ဟိုတ်နူပဋိပက္ခရပ်လွဟ်တံတုဲ ညးအဝဲဟွံခိုၚ်ကၠိုက်ဂမၠိုၚ်ဝွံ သွက်ဘဝဂွံဒတူလိုၚ် ကေုာံ ဂွံဂျိုၚ်လမျီုမံၚ်တန်တဴဂှ် သာခက်ခုဲကၠုၚ်ရောၚ် ကမ္မတဳပံၚ်တောဲရေၚ်တၠုၚ် အခေါၚ်တုပ်သၟဟ် ညးအဝဲဟွံခိုၚ်ကၠိုက်ဍုၚ်ဗၟာ MCERP ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
နကဵုတၚ်ထ္ၜးဟိုတ် မမာဲဗၠေတ်မှာ ပတှ်ေလွဟ်တုဲ ဒပ်ပၞာန်သီလဝ်အဝဵုကၟိန်ဍုၚ် အပ္ဍဲကာလကြပ်ပိသၞာံဏံ ပ္ဍဲကဵုရးဒေသ ကေုာံ တွဵုရးနာနာတံဂှ် ပေါဲဗ္တိုက်ၜါလ္ပာ်တံ သ္ကာတ်မြဟ်လဝ်တုဲ ပရေၚ်ဗ္တိုက်တရဴကျာဒပ်ကံၚ်ဇြဳပၞာန်တံ နွံလဝ် လၟေၚ်ဒဒှ်တ္ၚဲရ။
ညးအဝဲဟွံခိုၚ်ကၠိုက်ဂမၠိုၚ်ဝွံ အပ္ဍဲပေါဲဗ္တိုက် သွက်ဂွံဂြိပ်ဒဴပါဲဒလေတ်ဂှ် အခက်အခုဲနွံတုဲ ဒးဇီုကပိုက်ချိုတ်ဂျိုၚ်ကီု၊ ဒးဒုၚ်ဗ္တိုက်ဂြာတ်ဗုမ် နကဵုက္ၜၚ်ကျာကီု၊ ဂဗကဵုကရောၚ်ပၞာန်ကံၚ်ဇြဳပၞာန်တုဲ ဒးဒုၚ်ပန်ဂစိုတ် လၟေၚ်ဒဒှ်ဏံလေဝ် နွံကၠုၚ်လဝ် ဗွဲမဂၠိုၚ်ဂၠေၚ်ရ။
မွဲလ္ပာ်ဂှ်ပၠန် ညးအဝဲဟွံခိုၚ်ကၠိုက်တံဝွံ ပရေၚ်မၚ်မွဲရံၚ်စံၚ်ပရေၚ်ထတ်ယုက်တံ ဟွံကလိဂွံဂှ်ကီု၊ အခေါၚ်အရာကမၠောန်ကၟိတ် အောန်စှ်ေတံကီု သီုကဵုအခက်အခုဲ ပရေၚ်စသုၚ်မံၚ်စံၚ်ဂြောဝ်ဂတာတံတုဲ အာဟာရဟွံပေၚ်တံ နွံကၠုၚ်ဂှ်ရ က္တဵုဒှ်ယဲဘဲဂၠိုၚ်ကၠုၚ်လဝ်ရ။
ဥက္ကဌ ကမ္မတဳပံၚ်တောဲရေၚ်တၠုၚ် အခေါၚ်တုပ်သၟဟ် ညးအဝဲဟွံခိုၚ်ကၠိုက် ဍုၚ်ဗမာ MCERP ဥူဇြဝ်လေန်ထောန်ဂှ် ညးအဝဲဟွံခိုၚ်ကၠိုက်ဂမၠိုၚ်ဝွံ သွက်ဂွံဂြိပ်ဒဴပါဲဒလေတ် အပ္ဍဲပေါဲဗ္တိုက်ဂှ် အခက်အခုဲနွံတုဲ လၟေၚ်ဒဒှ် ဒးဇီုကပိုက်ချိုတ်အာတံဂှ်လေဝ် ဒးဒုၚ်စသိုၚ်ဒၟံၚ်ဂၠိုၚ်အိုတ်ရောၚ် ဟီုရ။
“ပိုယ်တံ ဂွံမိၚ်ကေတ် ဂၞန်မွဲဂှ်တှ်ေ လ္ပာ်ထောံဒၟံၚ်မခတိုဟ်တံဂှ်ဟီုတှ်ေ ကတိုၚ်ဥမၚ်တံနွံမ္ဂးလေဝ် ညးအဝဲဟွံခိုၚ်ကၠိုက် ဒးရပ်စပ်ဒၟံၚ် ကွဳဓရိုဟ်တံဂှ် ဗီုလဵုဂွံစှ်ေရော။ တုဲပၠန် ညးအဝဲဟွံခိုၚ်ကၠိုက် ကဵုလေံဒစုန်တံဂှ်တှ်ေ မိၚ်ဗရုက္ၜၚ်ကျာဗက် အပ္ဍဲပွိုၚ် ၅ စက္က ဂွံလုပ်ဟီုဂှ် သွက်ညးတံ သာ်လဵုမှဒှ်ဟွံမာန်ပုဟ်။ ဂွံဂြိပ်တိတ်ရဂှ် ဒှ်ဒၟံၚ်အခက်အခုဲဏောၚ်။ ညးအာရီုမိၚ် မယောၚ်ယာတံဂှ်တှ်ေ သာပရေံရ။ က္ၜၚ်ကျာပဝ်ကၠုၚ် ဂွံမိၚ်ဗြုက္ၜၚ်ကျာတှ်ေ ခိုဟ်ဒၟံၚ်ညိဏီ။ ညးတံဂှ် ဟွံမိၚ်ပုဟ်။ က္ၜၚ်ကျာကၠုၚ်လေဝ် ဟွံတီပုဟ်။ ဗီုဏံဟီုတှ်ေ အရာတံဏံဂှ် သာ်လဵုမှ ပါဲဟွံဗၠးဘူး။ ဇၟာပ်ပ်ဒှ်ဂှ် သ္ဇက်ဂွံအေၚ်ဒုၚ်အာရနွံ” သာ်ဝွံ သ္ဂးရ။
သ္အာၚ်နူဂှ်ပၠန် ညးအဝဲဟွံခိုၚ်ကၠိုက် အကြာပေါဲဗ္တိုက်တံဝွံ ညံၚ်ရဴမၞိဟ်ဓမ္မတာတံဂှ် ဂြိပ်ဟွံမာန်တုဲ ဒးလွဟ်ဇၞော်၊ လွဟ်ဍောတ်တုဲ ဇီုကပိုက်ဒးချိုတ်အာတံ သာဂၠိုၚ်ကၠုၚ်တုဲ ဇီုကပိုက်ကလိဂွံဝပ်နွံမ္ဂးလေဝ် ရီုဗၚ်ရေၚ်တၠုၚ်ကဵု ဗီုကၠာတေံ ဟွံမွဲဂှ်ရ အခေါၚ်ဂွံဂျိုၚ်တဴလမျီု သာအောန်စှ်ေကၠုၚ်ဂှ် ညးရီုဗၚ်ရေၚ်တၠုၚ် ပရေၚ်ညးအဝဲဟွံခိုၚ်ကၠိုၚ်တံ သ္ဂးအိုတ်ရ။
အခိၚ်လၟုဟ် ဟိုတ်နူပေါဲဗ္တိုက် မက္တဵုဒှ်ဒၟံၚ် အလုံဍုၚ်မွဲတံဂှ်တုဲ ဇီုကပိုက်ကလိဂွံဝပ် ဒးဆောံလေၚ်အဝဲအၚ်္ဂဇိုၚ်တဲတုဲ ဒှ်ကၠုၚ်အဝဲဟွံခိုၚ်ကၠိုက်တံနွံတုဲ ဟိုတ်နူလွဟ်ဇၞော်တုဲ ဒးဆောံလေၚ်အာ အရီုမိၚ်ကဵု အရီုဆဵုတံတုဲ မၞိဟ်ဒှ်ကၠုၚ်အဝဲဟွံခိုၚ်ကၠိုက်တံဂှ် သၠုၚ်တိုန်ကၠုၚ် တီတီကီုလေဝ် လၟိဟ်ချိုတ်တ်ပၠိုတ်တ်ဂှ်တှ်ေ ဂွံက္ဍစိုပ်ဂှ် ဝါတ်ဂါတ်တဴရောၚ် ညးမရီုဗၚ်ကဵုဒၟံၚ်ပရေၚ်အဝဲဟွံခိုၚ်ကၠိုက်တံ ဟီုရ။
လ္ဂောံကဵုစရၚ်လၟိဟ်မၞိဟ်သ္ဂာဗ္တံ သၞာံ ၂၀၁၉ ဂှ်မ္ဂး လၟိဟ်မၞိဟ်ကၟိန်ဍုၚ် ၁၂ ဒဿမ ၈ တၟံကၠံဂှ်ဝွံ ဒှ်ညးအဝဲဟွံခိုၚ်ကၠိုက်တံတုဲ ညးတံဝွံ အပ္ဍဲကာလသီအဝဵုဏံ ကရောံဒးဒုၚ်ဖံက်ပ္ကဝ်ကၠုၚ်အခေါၚ်အရာမၞိဟ်ပရေံပရေံဂှ် ဒးဒုၚ်စသိုၚ်ဒၟံၚ် ဒဒိုက်ပၞာန်အပ္ဍဲဍုၚ်တံ နာနာသာ်ရ။
ပရိုၚ်−သြၚ်လောန်တိုၚ်(မ်)
ဗီု−CJ