ဟဏဳ၊ ဂျာန္နဝါရဳ ၁၄
ပ္ဍဲကဵုပရေၚ်ပရူ ကပေါတ်ကိရိယာစၟဳတ်ကဝ်ဝေဒ်ဂှ် ဟိုတ်နူကလိလောန်ဒး ဒဒှ်မစလာပ်ဗဇဴတံဂှ်တုဲ စၟဳတ်မံက်တိတ်အာဂှ်ရ ရုၚ်သၞောဝ်ဓဝ်ဗဳယေတ်နာမ် ဖျေံလဝ်ဒဏ်ထံၚ် ကုဝန်ဇၞော်တြေံၜါတၠရ။
ပ္ဍဲကဵုပရေၚ်ပရူဏံ သၞာဲဒဴဂၠိုၚ်ကဵုဒါဇြိန် ပါလုပ်ဆက်စပ်လဝ်တုဲ ညးတံဝွံ ဟိုတ်နူကၠောန်သ္ပကောပ်ကာဲဒးဗၠေတ်မှာ ကေုာံ ပရေၚ်စလာပ်ဗဇဴတံဂှ်တုဲ ဒုဟ်နွံရောၚ် စၟဳတ်ဂွံဆဵုကေတ်ဂှ်ရ ဒးဒုၚ်ဖျေံစၟတ်လဝ်ဒဏ်ထံၚ်ဂှ် ရုၚ်သၞောဝ်ဓဝ် သ္ဂးလဝ်ရ။
ဝန်ဇၞော်ပရေၚ်ထတ်ယုက်တြေံ ၚုယေန်ဒံၚ်လောန်ဝွံ ဟိုတ်နူစလဝ်လာဘ် ဒဝ်ဠာအမေရိကာန် ၂ ဒဿမ ၂၅ ပြကောဋိကိုဋ်ဂှ်ရ ဒးဒုၚ်ဖျေံလဝ်ဒဏ်ထံၚ် ၁၈ သၞာံတုဲ ဝန်ဇၞော်တြေံ သိပ္ပံ ကေုာံ နဲပညာ ချူနတ်အာန်ဂှ် ဟိုတ်နူကၠောန်သ္ပလဝ် ပရေၚ်ကောပ်ကာဲဗၠေတ်မှာတံဂှ်တုဲ ဒးဒုၚ်ဖျေံလဝ်ဒဏ်ထံၚ် ၃ သၞာံရ။
ကမၠောန်စပ်ကဵုလ္ပာ်ဂဥုဲ ပုဂ္ဂလိက Viet A Technology Corp မပါလုပ်လဝ် ပ္ဍဲကဵုပရေၚ်ပရူဏံ အဓိကဂှ်ဝွံ ပံၚ်တောဲကဵုသၞာဲဒဴဂမၠိုၚ်တုဲ ကၠောန်ပ္တိတ် ကိရိယာစၟဳတ်ကဝ်ဝေဒ် သွက်သၞောတ်ပရေၚ်ထတ်ယုက်အလဵုအသဳတုဲ ပ္တိုန်ၚုဟ်သွံတြးလဝ်ရောၚ် ဒးဒုၚ်စောတ်စောဲလဝ်ရ။
ကြဴနူဒးဒုၚ်ဖျေံစၟတ်ဒဏ်ထံၚ် ၁၈ သၞာံတုဲ ဝန်ဇၞော်ပရေၚ်ထတ်ယုက်တြေံ လံၚ် ဒဒှ်ရဒုၚ်လဝ်ဂုဏ်ဂှ် မဳဒဳယျာအပ္ဍဲဒေသဂမၠိုၚ် ထ္မံက်ထ္ၜးလဝ်ရ။
ဍုၚ်ဗဳယေတ်နာမ် အခိၚ်သၠုၚ်ပ္တိုန်အသိၚ် ကၠောန်ဒၟံၚ်အစဳဇန် ဗ္တိုက်သရိုဟ်ပရေၚ်စလာပ်ဗဇဴတံဂှ် ညးတံ ဒးဒုၚ်ရပ်လဝ်ရ။
ဟိုတ်နူအစဳဇန်ဗ္တိုက်သရိုဟ်ပရေၚ်စလာပ်ဗဇဴတံဂှ်တုဲ သၞာဲဒဴဂၠိုၚ်ကဵုကၠံ ဒးဒုၚ်စၟဳတ်လဝ်တုဲ ၚုယေန်ယှဝေန်ဖျူ ညးမဒှ်သ္ကိုပ်ဝန်ဇၞော်၊ သမ္မတတြေံ ကေုာံ လစှ်ေသ္ကိုပ်ဝန်ဇၞော်ၜါတၠ ပါလုပ်ဂှ် သၞာဲဒဴဗွဲမဂၠိုၚ်ဂၠေၚ်လေဝ် ဒးနုက်တိတ်လဝ် နူကဵုကဆံၚ်ဌာနန္တရဂမၠိုၚ်ရ။
ဖါန်ကအ်ဗဳယေတ် သ္ကိုပ်သၞာဲဒဴ၊ ညးမဒက်ပ္တန် Viet A ဂှ် မ္ၚးနူကဵုဒဏ်ထံၚ်တၞဟ်ခြာ ၂၅ သၞာံ ဒးဒုၚ်ဖျေံစၟတ်လဝ် ဂိတုဒဳဇြေမ်ဗာကြပ်အိုတ်တေံဂှ် ထပ်ဒးဒုၚ်ဖျေံစၟတ်လဝ် ဒဏ်ထံၚ် ၂၉ သၞာံပၠန်ဂှ် ဂွံတီကေတ်ရ။
Viet A သွံတြးလဝ် ကိရိယာစၟဳတ်ကဝ်ဝေဒ် ၄ ဒဿမ ၅ ကိုဋ် ပ္ဍဲကဵုဗဳယေတ်နာမ်ဂှ်ဝွံ ပ္တိုန်ၚုဟ်ၜိုတ်ပိဆတုဲ သွံတြးလဝ်ဂှ်ရ ကလိဂွံလဝ်ဒဝ်ဠာ ၅၀ ဒဿမ ၂၅ ပြကောဋိကိုဋ် နနဲဟွံလုပ်သၞောဝ်ဂှ် ဌာနဝန်ဇၞော်ပရေၚ်ဂီုကၠီု ကဵုလဝ်သမ္တီရ။
မၞိဟ်မပါလုပ်ဒၟံၚ် ပ္ဍဲဂဗုတ်ဏံဗွဲမဂၠိုၚ်ဂှ်ဝွံ ဒှ်သၞာဲဒဴထိၚ်ဒက်ယဲ ကဆံၚ်ပွိုၚ်ဍုၚ်၊ ကဆံၚ်တွဵုရးတံဏောၚ်ဂှ် ဌာနဝန်ဇၞော်ပရေၚ်ဂီုကၠီု ဂးလဝ်တုဲ မ္ၚးနူကဵုညးတာလျိုၚ်တံဂှ် နူကဵုရုၚ်သၞောဝ်ဓဝ် ဖျေံစၟတ်လဝ်ဒဏ်ထံၚ် မၞိဟ်ပူဂဵု ၃၅ တၠ နူဒဏ်ထံၚ် ၁၈ ဂိတု စဵုကဵု ၁၅ သၞာံဂှ် ဂွံတီကေတ်ရ။
Ref: CNA