လံၚ်လုၚ်၊ ဂျာန္နဝါရဳ ၁၄
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် အပ္ဍဲကွာန်အံက်ကျံက်ဝတ် ပွိုၚ်ဍုၚ်လံၚ်လုၚ် ရးတၞၚ်သဳ ပန်ဂစိုတ်ဏာလဝ် ညးဒေသကောန်ကွာန်မွဲတၠဂှ် ဂွံတီကေတ် အတိုၚ်ဂလာန် ညးဒေသတံရ။
တုဲကၠုၚ် ပ္ဍဲဂိတုဂျာန္နဝါရဳ ၁၁ အခိၚ်နူဂယး ၜိုတ် ၁၀ နာဍဳ ကရောၚ်ပၞာန်ဒပ်ကံၚ်ဇြဳပၞာန် လုပ်စိုပ်ကၠုၚ် အပ္ဍဲကွာန်တုဲ အဃောညးဒေသတံ ဂြိပ်ဒဴပါဲဒလေတ်ဒၟံၚ်ဂှ် ကောန်ဂကောံဒပ်ကံၚ်ဇြဳပၞာန်တံ ဗက်ပန်ပှော်လဝ်ရ။
ဟိုတ်နူဒပ်ကံၚ်ဇြဳပၞာန် ပန်ပှော်တုဲ ကောန်ကွာန်အံက်ကျံက်ဝတ် ဥူကျဝ်နာၚ် အာယုက် ၄၀ သၞာံ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
ဥူကျဝ်နာၚ် မချိုတ်အာဂှ်ဝွံ ညးမဒှ်သမ္ဘာ ကေုာံ ကောန်ဝုတ်ၜါတၠ သှ်ေဒၟံၚ်တုဲ အခိၚ်ကရောၚ်ပၞာန်ဒပ်ကံၚ်ဇြဳပၞာန် ကလေၚ်တိတ်အာ ပ္ဍဲကဵုဇိုၚ်သဝ်တ္ၚဲ တ္ၚဲဂှ်ဂှ် ညးဒေသတံ စံၚ်လဝ်ကဵုဇွရောၚ် သ္ဂးရ။
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် အပ္ဍဲကွာန်အံက်ကျံက်ဝတ်ဂှ်ဝွံ တုဲကၠုၚ် ပ္ဍဲဂိတုဒဳဇြေမ်ဗာ ၂၈ တေံဂှ်လေဝ် ပ္ဍဲကဵုဂၠံၚ်တိတ်ကွာန်သေတ်ပျေဝ်ဂှ် ကုတ်ကအ်ဂစိုတ်ဏာလဝ် မၞိဟ်တြုံ ၁ တၠဏီဂှ် ဂွံတီကေတ် နူကဵုညးဒေသတံရ။
ဒပ်ကံၚ်ဇြဳပၞာန် ဂေတ်ကွာန်ထ္ပက်ဒၟံၚ်ကရောၚ်ပၞာန် ပ္ဍဲပွိုၚ်ဍုၚ်လံၚ်လုၚ်ဂှ်ဝွံ အပ္ဍဲၜါသတ္တာဟတုဲကၠုၚ်တေံ စံၚ်ပလီုပလာ်လဝ် သ္ၚိဒၟံၚ်ညးဒေသ နူကဵုကွာန် ၇ ကွာန် ဗ္ဒါဲ ၁၅၀ ရ။
အတိုၚ်တၚ်လလောၚ်တြး ဂကောံသုတေသန FE5 Tanintharyi ဂှ်မ္ဂး ပ္ဍဲရးတၞၚ်သဳ အပ္ဍဲသၞာံ ၂၀၂၃ မွဲသၞာံတုဲကၠုၚ်တေံ ကောန်အရာပ် ၂၆၇ တၠ ဒးဒုၚ်ဂစိုတ်လဝ်ရောၚ် လလောၚ်ပ္တိတ်လဝ် လိက်ဒုၚ်စဳရေၚ် ပ္ဍဲဂိတုဂျာန္နဝါရဳ ၁၀ တေံရ။
ပရိုၚ်−သြၚ်လောန်တိုၚ်(မ်)
ဗီု−Social Media