မတ်မလီု၊ ဂျာန္နဝါရဳ(၁၄)
သွက်ဂွံရီုဗၚ်ဍုၚ်ဗၟာ ဒမြိပ်ညးဒးဂြိပ်ဒဴထောံလသာသ္ၚိဌာန်တံ သၠုၚ်တိုန်ဒၟံၚ် ဟိုတ်နူပေါဲဗ္တိုက်အလုံဍုၚ်တံဂှ် နွံပၟိက်ဒၟံၚ် သြန်ဒဝ်ဠာအမေရိကာန်ကာတၟေၚ် (၉၉၄) ပြကောဋိကိုဋ်ရောၚ်ဂှ် ဂွံတီကေတ်ကေတ် အတိုၚ်တၚ်လလောၚ်တြး ရုၚ်ပညဳပ္ညပ် စပ်ကဵုပရေၚ်ဗ္စာရဏာမၞိဟ် UNOCHA Myanmar ရ။
မ္ၚးနူပေါဲဗ္တိုက် က္တဵုဒှ်ကၠုၚ်ဟိုတ်နူသီအဝဵုတံဂှ် ဟိုတ်နူပဋိပက္ခရပ်လွဟ်တံတုဲ ပ္ဍဲသၞာံ ၂၀၂၄ ဏံ လၟိဟ်မၞိဟ်နွံပၟိက်မံၚ် အရီုဗၚ် ဗ္စာရဏာပရေၚ်မၞိဟ်အပ္ဍဲဍုၚ်ဂှ် သၠုၚ်တိုန်ကၠုၚ် စဵုကဵုဗ္ဒါဲ ၁၈ ဒဿမ ၆ ပြကောဋိကိုဋ်ရောၚ်ဂှ် ထ္မံက်ထ္ၜးပါလုပ်လဝ် ပ္ဍဲလိက်ဒုၚ်စဳရေၚ် UNOCHA Myanmar ရ။
နူကဵုအပ္ဍဲဏံဂှ် စဳဇန်လဝ် သွက်ဂွံကဵုဖျုန်ရီုဗၚ်ကဵု မၞိဟ်နွံပၟိက်အရီုဗၚ် ၅ ဒဿမ ၃ ပြကောဋိကိုဋ်တံ ကာတၟေၚ်တုဲ သွက်ဂွံကဵုအရီုဗၚ်ကုညးတံဂှ် နွံပၟိက်ဒၟံၚ် ဒဝ်ဠာအမေရိကာန် (၉၉၄)ပြကောဋိကိုဋ်တံ ကာတၟေၚ်ရောၚ်ဂှ် ဂွံတီကေတ်ရ။
အတိုၚ်လိက်ဒုၚ်စဳရောၚ် UNOCHA Myanmar မ္ဂး သၞာံ ၂၀၂၃ ဂှ် အိုတ်ကၠုၚ်အခိၚ်ကဵု ပရေၚ်ပေါဲဗ္တိုက်သ္ကာတ်မြဟ် က္တဵုဒှ်အလုံဍုၚ်တံ၊ ဒမြိပ်ညးဒးဂြိပ်ဒဴထောံလသာသ္ၚိဌာန်သၠုၚ်တိုန်ကၠုၚ်တံ ကေုာံ ပရေၚ်ဘပဠ လမျီု ညးဍုၚ်ကွာန်ကောန်အရာပ်တံရဂှ် သ္ဂးရ။
ပေါဲဗ္တိုက်စက္တဵုဒှ်ကၠုၚ် နူစဂိတုအံက်တဝ်ဗာအိုတ်တေံ သ္ကာတ်မြဟ်ကၠုၚ်ဂှ် ဆက်က္တဵုဒှ်ဒၟံၚ် စဵုကဵုလလအ်ပွိုၚ်ၜါဂိတုပြၚ်တုဲ ပေါဲဗ္တိုက်သၠဲတြးကၠုၚ်တံဂှ် ကြဴနူပရေၚ်သီအဝဵုက္တဵုဒှ်လဝ် သၞာံ ၂၀၂၁ ပြဟ်ဟ်တေံဂှ် ဒှ်လဝ်ဇၞော်အိုတ်တုဲ လ္ဂောံကဵုအကာဲအရာဗလးတိပထဝဳမ္ဂး သၠဲလးအိုတ်ရဂှ် သ္ဂးရ။
စဵုကဵုသ္ကုတ်သၞာံ ၂၀၂၃ အိုတ်ဂှ် အလုံမွဲကၟိန်ဍုၚ် လၟိဟ်မၞိဟ်စဵုကဵု ၂ ဒဿမ ၆ ပြကောဋိကိုဋ်ပြၚ် ဒးဂြိပ်ဒဴပါဲဓလေတ်ဒၟံၚ်တုဲ ဟိုတ်နူပေါဲဗ္တိုက်သ္ကာတ်မြဟ်ကၠုၚ် နူစဂိတုအံက်တဝ်ဗာအိုတ်တေံတုဲ လၟိဟ်မၞိဟ်ချိၚ်ခယျ အပံၚ်ဗ္ဒါဲ ၆၂၈၀၀၀ ဒးဂြိပ်ဒဴပါဲဓလေတ်လဝ်ရ။
သ္အာၚ်နူဂှ်ပၠန် ဂကောံမိတ် ဆေၚ်စပ်ကဵုပရေၚ်ဗ္စာရဏာမၞိဟ်တံဂှ် ဒးဆေၚ်မံၚ်မုက်ကဵုပွသၞောတ်ဗ္ၜတ် အခေါၚ်လုပ်စိုပ်ရီုဗၚ်တံကဵု စပ်ကဵုလၟေၚ်ကမၠောန်တံ ဗွဲမဇၞော်ကဵုဇြဟတ်ရဂှ် UNOCHA Myanmar ကဵုလဝ်သမ္တီရ။
သ္ပတံနူ ဂိတုဂျာန္နဝါရဳ သၞာံ ၂၀၂၃ စဵုကဵုဂိတု နိုဝေန်ဗာဂှ် ဒပ်ကံၚ်ဇြဳပၞာန်တံကဵု ဂကောံပၠန်ဂတးရပ်လွဟ်တံ ရပ်ထိၚ်ဒဝ်လဝ် ညးရီုဗၚ်ကဵုဒၟံၚ် ပရေၚ်ဗ္စာရဏာမၞိဟ်တံ ၁၄၂ တၠရဂှ် ဂွံတီကေတ် အတိုၚ်တၚ်လလောၚ်တြး UNOCHA Myanmar ရ။
ပရိုၚ်-သြၚ်လောန်တိုၚ်မ်
ဗီု-WFP