ဗ္တိုက်သ္အးအာ ကမၠောန်ကျာဖျ(ကျားဖြန့်) မၞုံဍုၚ် မြဝတဳတံရောၚ် က္ဍိုပ်သ္ကိုပ်ပၞာန်ကေုာံ ဂအုပ်ဒပ်သေံတံဟီု

မြဝတဳ၊ ဂျာန္နဝါရဳ (၁၄)

ပွဝေၚ်လံၚ်ဇျှၚ်အောန်လာၚ် ကေုာံ ပွလီဠာန်သြန် မ္ဂးယၟု ကျာဖျ(ကျားဖြန့်) နူသ္ကုတ်သၠုၚ်ကျာဍုၚ်ဗၟာ ဗ္ဒါဲဍုၚ်မြဝတဳ မဒှ်ဍုၚ်ပယျဵုသေံ-ဗၟာတံဂှ် ၜါဍုၚ်တံပံၚ်တောဲဗ္တိုက်သ္အးအာဏောၚ်ဂှ် ကံၚ်ဇြဳပၞာန်တံ ပ္တိတ်လဝ်ပရိုၚ်ရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ကေုာံ သ္ကိုပ်က္ဍိုက်ပ် ပရေၚ်စဵုဒၞါ ဒပ်ပၞာန်ဨကရာဇ်သေံ Songwit Noonpackdee တံ ပ္ဍဲဂိတုဂျာန္နာဝါရဳ စၟတ်တ္ၚဲ(၁၂) အခိၚ်သဝ်တ္ၚဲဂှ် ဆဵုဂဗလဝ်ညးသ္ကအ် နကဵု Video Conferencing မဒှ်ရ။

ပ္ဍဲပရေၚ်ဆဵုဂဗဏံဂှ် သဳကၠဳလဝ် ပရေၚ်သၠုၚ်ပ္တိုန်ပရေၚ်ဆက်ဆောံ အကြာဒပ်ပၞာန်ၜါလ္ပာ်၊ ပရေၚ်ကူသာန်သွံရာန်ဗၞိက်ပယျဵု၊ ပရေၚ်ဗ္တိုက်သ္အး ဂဥုဲၜူမာဲ ကေုာံ ပရေၚ်ဗ္တိုက်သ္အးပွပကီုပရာပ်၊ ပရေၚ်ဗ္တိုက်သ္အး ပရေၚ်ကူသာန်သွံရာန်ဗၞိက် ဟွံလုပ်သၞောဝ်၊ ပရေၚ်သၠာဲဂတးတၚ်နၚ်ပရိုၚ်တံကဵု ပရေၚ်ဒေသပယျဵု ၜါကၟိန်ဍုၚ်သ္ဂောံညိၚ်ဝတ်တံရ။

ဗွဲတၟေၚ် ဗ္ဒါဲဍုၚ်မြဝတဳ ပယျဵုၜါဍုၚ်ဂှ် ကၠောန်သ္ပမံၚ် ပွဝေၚ်လံၚ်ဇျှၚ်အောန်လာၚ်တံကဵု ပွလီဠာန်သြန်တံရဂှ် ဂၠိုက်ဂၠါဲဂွံတီကေတ်လဝ်ဂှ်ရ သဳကၠဳလဝ် သီုအကာဲအရာ ၜါကၟိန်ဍုၚ်သ္ဂောံပံၚ်တောဲဗ္တိုက်သ္အးအာရောၚ်ဂှ် ကံၚ်ဇြဳပၞာန်တံ လလောၚ်ပ္တိတ်လဝ်ပရိုၚ်ရ။

ညးဒၟံၚ်ဍုၚ်မြဝတဳမွဲတၠဂှ် နကဵုဒပ်ပၞာန်တံ ဟိုတ်နူစကာကဵု ဒပ်မၚ်ပယျဵု BGF တံဗ္တိုက်ဒၟံၚ် KNU ဒှ်ဒၟံၚ်ပေါဲဗ္တိုက် ကုဒပ်ကံၚ်ဇြဳပၞာန်တံဂှ်ရ ဗ္တိုက်ပလီုအာ ကမၠောန်ကျာဖျဏံ ဟွံသေၚ်တုဲ တုဲဒှ်အာ နကဵုပရေၚ်စၟဳတ်တံသၟးရဂှ် ဟီုကဵုသြၚ်လောန်တိုၚ်မ်ရ။

“ပိုဲတံထေၚ်ကေတ်တှ်ေ ဒပ်ပၞာန်တံလေဝ် ဟွံကၠောန်ပုဟ်။ ညးဂှ်လေဝ် ဟွံကၠောန်ပုဟ်။ မုဟိုတ်ရောတှ်ေ ဍေံတံ(ဂကောံကၠောန်ဒၟံၚ်ကမၠောန် ကျာဖျ)ဂှ် ဇြဟတ်ရပ်လွဟ် နွံဒၟံၚ်ကဵုဠက်ဂှ်ရ စၟဳတ်ထ္ၜးအတိုၚ်ဏံတုဲ တုဲဒှ်အာရ။ အရာတံဏံဂှ် ဒှ်ဒၟံၚ် အတိုၚ်ဆဵုညာတ်မံၚ်ဗီုတြေံဂှ်ရ။ ဒပ်ပၞာန်ဂှ်လေဝ် ဗီုလဵုမှ ဟွံဂံၚ်ကၠောန်ပုဟ် ချိုတ်ပၠိုတ်ရ။ ဟိုတ်နူကဵုဒပ်မၚ်ပယျဵုတံ ဗ္တိုက်ဒၟံၚ် KNUတံဂှ်ရ ဍေံတံ ဗီုလဵုမှ ဟွံဂံၚ်ကၠောန်ပုဟ်။ ပြဟ်ဟ်ဏံဂှ်လေဝ် ဍေံတံလုပ်လေဝ်ဟွံဂွံ၊ တိတ်လေဝ်ဟွံဂွံရ။ ပ္ဍဲဍုၚ်ယှိုဲကုက္ကိုဝ်ဂှ်မှ ဟွံကဵုလုပ်ပုဟ်။ ဂွံစၟဳတ်ဂှ် စွံလဝ်ကၠာ သၟေဟ်တံဂှ်တှ်ေ သ္ၚောဲရ” သာ်ဝွံ သ္ဂးရ။

သၞာံတုဲကၠုၚ် ဂိတုဒဳဇြေန်ဗာ စၟတ်တ္ၚဲ ၂၇ ဂှ်လေဝ် သ္ကိုပ်စၞောန်ပ္ညုၚ် ပရေၚ်ပၞာန်ပံၚ်တောဲ ဒပ်ပၞာန်သေံ သ္ကိုပ်ဗိုလ် ဂျက်ကာပံၚ် ဂျာန်ဗါန်ပါန်ဂှ် ကၠုၚ်ဆဵုဂဗ ကုသ္ကိုပ်ပၞာန်ဇၞော် မေန်အံၚ်လှာၚ်တုဲ သွက်ဂွံဗ္တိုက်ပလီုကဵု ကမၠောန်ကျာဖျ နူကဵုပယျဵုမြဝတဳဂှ် အာတ်မိက်လဝ်ဏီရ။

ဍုၚ်ယှိုဲကုက္ကိုဝ် ထ္မံက်ဒၟံၚ်ရုပ်ရဴ ကိုန်စဳမာန်ဍုၚ်တၟိ ကဆံၚ်ဂၠးကဝ် မၞုံခြာဇမ္ၚောဲ (၁၀)မိုၚ် နူကဵုသ္ကုတ်သၟဝ်ကျာဍုၚ်မြဝတဳဂှ် ဒှ်ဍုၚ်မၞိဟ်တီဂၠိုၚ် နဒဒှ်ဍုၚ် China Town တွဵုရးကရေၚ် ကမၠောန်ကျာဖျနွံတံဂှ်ရ။

ကိုန်စဳမာန်ဏံဂှ် ကုမ္ပဏဳချေတ်လေန်မျိုၚ် ဒပ်မၚ်ပယျဵုမပိုၚ်ပြဳလဝ် ဗိုလ်ဇၞော် သဝ်ချေတ်တူ မပါ်တိတ်လဝ် နူ DKBA သ္ကိုပ်သ္ကလဝ်တံကဵု ဂကောံရထိုက်ကၟိန်ဍုၚ်နာနာပိုၚ်( Yatai International Holdings Group)တံ ပံၚ်တောဲတုဲ ကၠောန်ဒၟံၚ်ရ။

ဂကောံရထိုက်ကၟိန်ဍုၚ်နာနာပိုၚ်ဂှ် ၜိုန်ရဒှ်ကမၠောန် ဖျေံသ္ဇိုၚ်ပ္ဍဲက္ၜၚ်ကံက်တုဲ ပ္တိုန်လဝ်စရၚ်ပ္ဍဲဟံၚ်ကံၚ်ကီုလေဝ် ကမၠောန်ဂှ် ဂကူကြုက်ဒုၚ်ဂိုၚ်ကေတ်လဝ် နဒဒှ်ကောန်ဍုၚ် ကမ္ဘောဒဳယျာတံကဵု မလေဝ်ယှာတံ က္ဍိုက်ဒၟံၚ်က္ဍိုပ်မဒှ်ရ။

ပ္ဍဲသၞာံ ၂၀၁၇ ဂိတုဖေဖဝ်ဝါရဳဂှ် ဂကောံရထိုက်တံကဵု ဒပ်မၚ်ပယျဵုတံ ပံၚ်တောဲတုဲ နဒဒှ် ဂကောံကမၠောန် ဗၟာ-ရထိုက်ကၟိန်ဍုၚ်နာနာပိုၚ်ဂှ် ပ္တိုန်လဝ်စရၚ် ပ္ဍဲဌာနက္ဍိုက်က္ဍိုပ်ပ္တိုန်စရၚ် ပရေၚ်ဓလိုက်တမ်ရိုဟ် ကေုာံ ကုမ္ပဏဳဂမၠိုၚ်ရ။

အတိုၚ်စရၚ် ဌာနက္ဍိုက်က္ဍိုပ်ပရေၚ်ပ္တိုန်စရၚ် ကုမ္ပဏဳဂမၠိုၚ်တံဂှ်မ္ဂး ယှေဝ်ယာကုမ္ပဏဳဂှ် ဂကောံရထိုက်ဂှ် ပိုၚ်ပြဳလဝ် ၈၀ တၟံကၠံတုဲ ဗိုလ်ဇၞော်သဝ်ချေတ်တူဂှ် ပိုၚ်ပြဳလဝ် ၂၀ တၟံကၠံရ။

ကိုန်စဳမာန်ဍုၚ်တၟိယှိုဲကုက္ကိုဝ် သၠဲမၞုံ ဗ္ဒါဲ ပိဠက်ဨကဂှ် တၟော်လဝ် အိုတ်စဵုကဵု ဒဝ်ဠာအမေရိကာန် ၁၅ ဗဳလျာန်တုဲ ရန်လဝ် သွက်ဂွံတုဲ ပ္ဍဲသၞာံ ၂၀၂၇ ဏံရဂှ် ဂွံတီကေတ် အတိုၚ်လိက်ဒုၚ်စဳရေၚ် ISP-Myanmar လလောၚ်ပ္တိတ်လဝ် ပ္ဍဲသၞာံ ၂၀၂၁ ဂိတုဂျောန် သ္ကုတ်လက္ကရဴဂှ်ရ။

လအာတုပ်သာ်ဂှ်ကီု ကိုန်စဳမာန်ဍုၚ်တၟိ KK Park ဂှ်လေဝ် မၞုံဒၟံၚ် ပ္ဍဲတွဵုရးကရေၚ် ဍုၚ်မြဝတဳသ္ကုတ်သၠုၚ်ကျာဂှ်တုဲ မ္ၚးနူကဵု ရုၚ်ဝေၚ်ဇျှၚ်ကာဇြဳနိုဂှ် ကမၠောန်ကျာဖျ လီဠာန်သြန်လ္တူအောန်လာၚ်တံလေဝ် နွံဒၟံၚ်ရဂှ် ကောန်ဍုၚ်တံ သ္ဂးအိုတ်ရ။

သ္ကိုပ်ဗိုလ်သဝ်ချေတ်တူ၊ သဝ်မေန်န်ဥူ မဒှ်ဒါရိုက်တာ ကုမ္ပဏဳချေတ်လေန်မျာၚ်မွဲတၠ ကေုာံ ဂကူကြုက် နူဂကောံရထိုက် ယှဳဇြဳကျာန် ပါလုပ်ဒၟံၚ် ပ္ဍဲကိုန်စဳမာန် ယှိုဲကုက္ကိုဝ်တံဂှ် ကၟိန်ဍုၚ်ဗျိတိၚ်၊ အမေရိကာန် ကေုာံ ကနေဒါတံ တုဲကၠုၚ်ဂိတုဒဳဇြေန်ဗာ စၟတ်တ္ၚဲ(၈)ဂှ် တပ်ဒဏ်ကၟာတ်လဒဵု ကေတ်လဝ်အရေဝ်ရ။

ပရိုၚ်-သြၚ်လောန်တိုၚ်မ်

ဗီု-MOI/Thai TBF