ၜဳကလေၚ်၊ ဂျာန္နဝါရဳ(၁၃)
ပေါဲဗ္တိုက်ဗ္ဒိုပ်ဝေန်တာပါန်ကံၚ်ဇြဳပၞာန် ဖျေံသ္ဇိုၚ်ကွာန်ဝေန်တာပါန်၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ် ဆက်က္တဵုဒှ်ဒၟံၚ် စဵုကဵုလလအ်ပွိုၚ်မွဲဂိတုတုဲ ပရေၚ်ချိုတ်ဂျိုၚ်ၜါလ္ပာ်တံ နွံဒၟံၚ်ရဂှ် ဂွံတီကေတ် နူကဵုခရိုၚ်သဓီု KNU ရ။
ကုဗ္ဒိုပ်ဝေန်တာပါန် ဒှ်ဗ္ဒိုပ်ပံၚ်တောဲ ကံၚ်ဇြဳပၞာန်၊ BGFတုဲ ဇြဟတ်ဒပ် ၆၀ ပြၚ်ဖျေံဗ္ဒိုပ်မံၚ်တန်တဴဒၟံၚ်ဂှ် သ္ပတံနူဂိတုဒဳဇြေန်ဗာ စၟတ်တ္ၚဲ (၁၃)ဂှ်တုဲ ဒပ်စဵုဒၞါကောန်ဂကူကရေၚ် KNDO ကေုာံ ဂကောံဒပ်ပံၚ်ကောံပၠန်ဂတးတံ လုပ်စိုပ်ဗ္တိုက်လဝ်ရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ်တံ ဆက်က္တဵုဒှ်ဒၟံၚ် စဵုကဵုဂိတုဂျာန္နဝါရဳ စၟတ်တ္ၚဲ(၁၃)ဂှ်တုဲ ကၟာတ်လဒဵုလဝ် ဗ္ဒိုပ်ကံၚ်ဇြဳပၞာန်တံတုဲ ထပိုတ်လဝ် ဇွောံမတံရဂှ် ညးတာလျိုၚ် ခရိုၚ်သဓီု KNUမွဲတၠ ဟီုကဵုသြၚ်လောန်တိုၚ်မ်ရ။
ပ္ဍဲကာလပေါဲဗ္တိုက်တံဂှ် နူကဵုဒပ်ကံၚ်ဇြဳဳပၞာန်တံ ကၠုၚ်ကၠောန်သ္ပလဝ်ကဵုပရေၚ်ဗ္တိုက်တရဴကျာ ဟွံအောန်နူကဵု(၃)ဝါတုဲ ပ္ဍဲဂိတုဒဳဇြေန်ဗာ သတ္တာဟလက္ကရဴအိုတ်ဂှ်လေဝ် မ္ၚးနူဇွောံမတံဂှ် သီုကဵုဖျေံဏာလဝ် သီုမကမ်လ္ၚဵုတံ နကဵုက္ၜၚ်ကျာဂှ်ရ ဂကောံဒပ်ပံၚ်ကောံတံ သီကေတ်လဝ်ရ။
ပ္ဍဲပေါဲဗ္တိုက်ၜါလ္ပာ်က္တဵုဒှ်ဒၟံၚ် လလအ်ပွိုၚ် မွဲဂိတုပြၚ်ဂှ် လ္ပာ်ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ကလိဂွံလဝ်ဝပ် (၇)တၠတုဲ လ္ပာ်ကံၚ်ဇြဳပၞာန်တံဂှ် ၜိုန်ရပရေၚ်ဇီုကပိုက်ချိုတ်ဂျိုၚ်ဂၠိုၚ်မာန်ကီုလေဝ် လၟိဟ်ချိုတ်တ်ပၠိုတ်တ်ဂှ် ဂၠိုက်ဂၠါဲမံၚ်ဖိုဟ်ရဂှ် သ္ဂးရ။
ဗ္ဒိုပ်ဝေန်တာပါန်ဂှ် မၞုံဒၟံၚ်ပ္ဍဲတိဍာ်ထိၚ်ဒဝ် ဒပ်စဵုဒၞါကောန်ဂကူကရေၚ် KNDO တုဲ ဒှ်ဗ္ဒိုပ်ဒပ်ပၞာန်ဒုၚ်ကံၚ်ဇြဳပၞာန် ဟွံဆုတ်ကလေၚ်လးလးမွဲလေဝ် မဒှ်ရ။
အပ္ဍဲပေါဲဗ္တိုက်ဝေန်တာပါန်ဂှ် ဟိုတ်နူပရေၚ်ဗ္တိုက်ကဵုတရဴကျာ ကေုာံ လွဟ်ဇၞော်ကံၚ်ဇြဳပၞာန်တံတုဲ ညးဒေသဗ္ဒါဲ ၂၀၀၀ ဒးဂြိပ်ဒဴပါဲဓလေတ်မံၚ်တုဲ စဵုကဵုအခိၚ်လၟုဟ် ဟွံဂွံစဴ ဌာန်ဒၟံၚ်ဏီရ။
ပရိုၚ်-သြၚ်လောန်တိုၚ်မ်
ဗီု-