သဓီု၊ ဂျာန္နဝါရဳ ၁၆
ပ္ဍဲတွဵုရးဍုၚ်မန်၊ ပွိုၚ်ဍုၚ်သဓီုဂှ် ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန်တံ ပန်ပှော်မံၚ်လွဟ်ဇၞော်ဂှ်ရ ညးဒေသဗ္ဒါဲ (၄၀၀) ထောံလသာဌာန်ဒၟံၚ် ဒးဂြိပ်ဒဴပါဲဓလေတ်မံၚ်ရဂှ် ဂွံတီကေတ် အတိုၚ်တၚ်လလောၚ်တြး ဗော်သွးကောန်ဂကူကရေၚ် (KNU) ခရိုၚ်သဓီုရ။
တုဲကၠုၚ်ဂိတုဂျာန္နဝါရဳ၊ စၟတ်တ္ၚဲ(၁၀) စနူအခိၚ်နူဂယး (၆)နာဍဳ စဵုကဵု (၉)နာဍဳ အခိၚ်ဗ္တံဂှ် နူကဵုဒပ်အမၠံက် စၟတ်(၄၀၂)ကံၚ်ဇြဳပၞာန် ဖျေံသ္ဇိုၚ်သဓီုတံ ပန်ပှော်လဝ် လွဟ်ဇၞော် ပ္ဍဲကွာန် သူအေန်(ဆူးအၚ်း) ကေုာံ ကွာန်ကအ်လှာၚ်ပန်ကအ်တံ (၉)မရ။
ဟိုတ်နူမကမ်လွဟ်ဒပ်ကံၚ်ဇြဳပၞာန်ပန်ပှော်လဝ်ဂှ်တုဲ သ္ၚိဒၟံၚ် သဝ်ဖိုဝ်လေဝ် ကေုာံ သဝ်ရာဇာ ဒၟံၚ်ကွာန်သူအေန် (၂)မ ကေုာံ သ္ၚိဒၟံၚ် သဝ်ယှိုဲလှဝေန် ကေုာံ သဝ်မံၚ်ဂျာန်ယျေတ် ဒၟံၚ်ကွာန်ကအ်လှာၚ်ပန်ကအ် (၂)မ အပံၚ်သ္ၚိ (၄)မ ဇီုကပိုက်လီုလာ်အာလဝ်ရ။
ဟိုတ်နူပွပန်ပှော်လွဟ်ဇၞော် ဒပ်အမၠံက်ကံၚ်ဇြဳပၞာန်တံတုဲ သ္ၚိဒၟံၚ် နူကွာန်(ကျုံမိန်)ကေုာံ ကအ်လှာၚ်ပန်ကအ်တံ (၈၂)မ၊ အပံၚ်လၟိဟ်မၞိဟ် (၃၈၂)တၠ ဒးဂြိပ်ဒဴပါဲဓလေတ်မံၚ်တုဲ စဵုကဵုအခိၚ်လၟုဟ် ဟွံဂံၚ်စဴဌာန်ဒၟံၚ်ဏီရဂှ် ဂွံတီကေတ်ရ။
တုဲကၠုၚ် ပ္ဍဲဂိတုဒဳဇြေန်ဗာ စၟတ်တ္ၚဲ (၁၉)ဂှ်လေဝ် ဟိုတ်နူမကမ်လွဟ်ဒပ်ကံၚ်ဇြဳပၞာန်ပန်ပှော်လဝ်တံ ဒတုံဗ္တိုဟ်ထ္ကးလဝ် ပ္ဍဲကွာန်(ကျုံမိန်)ဂှ်ရ ညးမၞုံကဵုယဲဒိုက်မွဲတၠ ချိုတ်တုဲ ညးဒေသ (၁၂၀၀)ပြၚ် ဒးဂြိပ်ဒဴပါဲဓလေတ်လဝ်ရ။
အတိုၚ်တၚ်လလောၚ်တြး ဗော်သွးကောန်ဂကူကရေၚ် (KNU) ဗဟဵုဂှ်မ္ဂး ပ္ဍဲကာလသီအဝဵုဏံ မ္ၚးနူပေါဲဗ္တိုက်တံဂှ် ဟိုတ်နူပွဝးပ္ကဝ်အခေါၚ်အရာမၞိဟ် ဒပ်ကံၚ်ဇြဳပၞာန်တံဂှ်တုဲ ညးဍုၚ်ကွာန်ဒေသ (၈)ကိုဋ်ပြၚ် ထောံလသာဌာန်ဒၟံၚ် ဒးဂြိပ်ဒဴပါဲဓလေတ်မံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်မ်
ဗီု-KNU