မာလေဝ်၊ ဂျာန္နဝါရဳ ၁၆
သမ္မတမဝ်ဒိုက် ကလေၚ်စိုပ်ကၠုၚ် နူလၟေၚ်တရဴဍုၚ်ကြုက်ဂှ် ဂိတုမာတ်ချ် စၟတ်တ္ၚဲ ၁၅ စွံလက္ကရဴအိုတ်တုဲ သွက်ဂွံကလေၚ်ကော်ဖျဴ ကောန်ဒပ်အိန္ဒိယ ဗၞတ် ၁၀၀ ဂှ် အာတ်မိက်လဝ် အလဵုအသဳနျူဒေလဳရ။
ဍုၚ်အိန္ဒိယ ၜိုန်ရထေၚ်လဝ် အုပ်ဓလီုဍုၚ်မဝ်ဒိုက် မၞုံဒၟံၚ်ပ္ဍဲၜဳမှာသၟိတ်အိန္ဒိယဂှ်မာန်ဏောၚ်ကီုလေဝ် မဝ်ဒိုက်ဂှ် ကာတ်ကၠုၚ်ဒၟံၚ် လ္ပာ်ကြုက် မဒှ်တၠခတှ်ဍုၚ်သ္အာၚ်ဇၞော်အိုတ်ဂှ်ရ။
တုဲကၠုၚ်ပ္ဍဲဂိတုဂျာန္နဝါရဳ ၁၄ တေံ အပ္ဍဲကဵုပေါဲသဳကၠဳမကၠောန်ဗဒှ်လဝ် ပ္ဍဲဍုၚ်မဝ်ဒိုက် ကုသၞာဲဒဴအိန္ဒိယတံဂှ် ကဵုလဝ်သမ္တီ တ္ၚဲကောန်ဒပ်အိန္ဒိယတံ ဒးဆုတ်ကလေၚ်လက္ကရဴအိုတ်ဂှ် သမ္မတမိုဝ်ဟာမက် မူအဳဇူ ဟီုလဝ်ရ။
သွက်ဂွံဂေတ်ကၚ်မၚ်ရံၚ် တွဵုဒၞက်ဍာ်မဝ်ဒိုက် မသၠဲလးဂှ်တုဲ အိန္ဒိယ ဖျေံလဝ် ညးယိုက်ဝန်ပၞာန် ၈၉ တၠ ပါလုပ်သီုကဵုညးယိုက်ဝန်လ္ပာ်ဂဥုဲ ပ္ဍဲကဵုမဝ်ဒိုက် သွက်က္ၜၚ်ကျာ ၃ ဖ္ဍိုက်ရ။
ကောန်ပၞာန်အိန္ဒိယ မဖျေံလဝ် သွက်ပရေၚ်ဗ္စာရဏာမၞိဟ် ကေုာံ သွက်ပရေၚ်ဆုဲပြံၚ်ကာတၟေၚ် စပ်ကဵုလ္ပာ်ဂဥုဲတံဂှ် ညံၚ်ဂွံဆက်မံၚ်အာ ပ္ဍဲမဝ်ဒိုက်ဂွံ သွဟ်သီုၜါလ္ပာ်ပြေပြံၚ် ဂွံတိတ်ကၠုၚ်ဂှ် ပ္တိတ်အာဇြဟတ် နကဵုနဲကဲကလုတ်တမာန်ဏောၚ်ဂှ် ဌာနဝန်ဇၞော်ကာဍုၚ်သ္အာၚ်အိန္ဒိယ ဟီုလဝ်ရ။
ဍုၚ်မဝ်ဒိုက်ဝွံ ၜိုန်ရဍောတ်ကီုလေဝ် သ္ပမာန်ဍဵုဍိုက်ဂွံဟွံသေၚ် ကြဴနူစိုပ်ကၠုၚ်နူဍုၚ်ကြုက်တုဲ ခြာဟွံလအ်ဂှ် မူအဳဇူ ဟီုလဝ်ရ။
အခိၚ်ဍုၚ်ကြုက် ကေုာံ ဍုၚ်အိန္ဒိယတံ ပ္တိတ်ဒၟံၚ်ဇြဟတ် သွက်ဂွံအုပ်ဓလီု လ္တူဍုၚ်မဝ်ဒိုက်ဂှ် သမ္မတမူအဳဇူဂှ် မ္ၚးနူကဵုကတိကဝတ် ဒက်အာပရေၚ်ဆက်ဆောံ ကုကြုက်ဂှ် ဒှ်ကၠုၚ်လဝ်သမ္မတ နကဵုကတိကဝတ်ပေါဲရုဲမာဲ ထဍေၚ်ပတိတ် ဒပ်အိန္ဒိယတံဂှ်ရ။
ကြဴနူညးဒှ်ကၠုၚ်သမ္မတတုဲဂှ် နဒဒှ်လၟေၚ်တရဴဍုၚ်သ္အာၚ်ကၠာအိုတ်ဂှ်လေဝ် အာစိုပ်လဝ် ဍုၚ်ကြုက်မဒှ်ရ။
ဆ္ဂး ထဍေၚ်ပ္တိတ်ဒပ်အိန္ဒိယတံတုဲ ဂလာန်ကော်ပၠောပ်နၚ်ကောန်ဒပ်ကြုက်တံတုဲ ပ္တိတ်ဒၟံၚ်ဇြဟတ် သွက်ဂွံပြံၚ်လှာဲဇြဟတ်အပ္ဍဲဒေသဂှ် သမ္မတမူအဳဇူ တးပါဲလဝ်ရ။
မဝ်ဒိုက်ဝွံ သွက်ဂွံဒက်ပ္တန် စမြိုၚ်သ္ဇိုၚ် ကုဍုၚ်ကြုက်ဂှ်ကီု၊ ပရေၚ်မၚ်မွဲရံၚ်စံၚ်ပရေၚ်ထတ်ယုက် ကေုာံ စပ်ကဵုလ္ပာ်ဂဥုဲတံဂှ်ကီု၊ ညံၚ်အကာဲအရာဘဝပရေၚ်မၞိဟ် ညးဍုၚ်ကွာန်မဝ်ဒိုက်တံ ဂွံတောတက်ကၠုၚ်ဂှ်ကီု၊ သွက်ဂွံမၚ်မွဲထိၚ်ဒဝ် ပွဳပွူဗလးဍာ် ကေုာံ ပရေၚ်ထတ်ယုက်တံဂှ် ထ္ပက်လဝ်စၟတ်တဲ တၚ်တုပ်စိုတ်တံရောၚ်ဂှ် ထ္မံက်ထ္ၜးလဝ် ပ္ဍဲပရိုၚ်မဳဒဳယျာဍုၚ်ကြုက်ရ။
Ref: Yahoo news