မတ်မလီု၊ ဂျာန္နဝါရဳ (၁၅)
ၚုဟ်ထဝ်ပ္ဍဲဍုၚ် ညိၚ်မံၚ်ပ္ဍဲသၞာံစတေံဂှ် ပ္ဍဲဂိတုဂျာန္နဝါရဳ သတ္တာဟဒုတိယဂှ် ထဝ်ဒကောၚ်မဳလေန် မွဲဒကေဝ်ဂှ် ၚုဟ်ထပ်သၠုၚ်တိုန်အာ စဵုကဵု ၃၇ ကိုဋ် ၇ ဠက်ဒကေဝ်ရဂှ် ဂွံတီကေတ် နူတၠကမၠောန်ထဝ်တံရ။
ပ္ဍဲဂိတုဂျာန္နဝါရဳ သတ္တာဟပထမ သၞာံ ၂၀၂၄ စဂှ် ၚုဟ်ထဝ်ပ္ဍဲဍုၚ် နွံလဝ် မွဲဒ္ကေဝ် (၃၇)ကိုဋ် ပြၚ်ညိဓရ်ဂှ် သ္ပတံနူ ဂိတုဂျာန္နဝါရဳ သတ္တာဟဒုတိယတုဲ မွဲတ္ၚဲမ္ဂး နှေန်မွဲဠက်ဒ္ကေဝ် ၚုဟ်သၠုၚ်တိုန်ကၠုၚ်လဝ်ရ။
ၚုဟ်ထဝ်ပ္ဍဲဍုၚ်ဂှ် ဟိုတ်နူၚုဟ်ထဝ်ဂၠးတိသၠုၚ်တိုန်ကၠုၚ်ကီု၊ ဟိုတ်နူဒးတၟော်ကဵု အတိုၚ်ၚုဟ်ဗွဝ်ဖျာဒဝ်ဠာမ္ၚးတံတုဲ ဒးသွံရာန်ဒၟံၚ်ဂှ်ရ ၚုဟ်နှေန်သၠုၚ်တိုန်ကၠုၚ်ရဂှ် ညးတာလျိုၚ် ဂကောံတၠကမၠောန်ထဝ်ရးလ္ဂုၚ်မွဲတၠ ဟီုကဵုသြၚ်လောန်တိုၚ်မ်ရ။
ဟိုတ်နူၚုဟ်ထဝ်ပ္ဍဲဍုၚ်သၠုၚ်တိုန်မံၚ်ဂှ်ရ ပရေၚ်သွံရာန်အောန်မံၚ်တုဲ ညးရာန်ပကောံထဝ်တံ အောန်မံၚ်စဵုကဵုဟၟဲရဂှ် ဂွံတီကေတ် အတိုၚ်တၠကမၠောန်ထဝ်တံ လဴထ္ၜးလဝ်ဂှ်ရ။
ပ္ဍဲဗွဝ်ဖျာထဝ်ဂၠးတိဂှ် ပ္ဍဲဂိတုဂျာန္နဝါရဳ သတ္တာဟပထမဂှ် ထဝ်မွဲအံၚ်သမ္ဂး ၜိုန်ရၚုဟ်မၞုံလဝ် ပွဳူ ၂၀၄၀ ဒဝ်ဠာအမေရိကာန်ဓဝ်ကီုလေဝ် ပြဟ်ဟ်ဏံဂှ်တှ်ေ မွဲအံၚ်သမ္ဂး စဵုကဵုပွဳူ ၂၀၅၄ ဒဝ်ဠာ ၚုဟ်သၠုၚ်တိုန်ကၠုၚ်ညိည မဒှ်ရ။
ဟိုတ်နူၚုဟ်ထဝ် ထပ်သၠုၚ်တိုန်ပၠန်ဂှ်ရ ဂကောံတၠကမၠောန်ထဝ်ရးလ္ဂုၚ်ဂှ်လေဝ် ထပ်စၟတ်သၠုၚ်ပ္တိုန်အာ ၚုဟ်စၞောန်ထဝ် စဵုကဵု (၃၆)ကိုဋ် (၉)ဠက်ဒ္ကေဝ်ပြၚ်ရ။
ၚုဟ်ထဝ်ပ္ဍဲဍုၚ်ဂှ် ပ္ဍဲလက်ထက်အလဵုသဳ NLD ဂှ် ၜိုန်ရၚုဟ်ဗွဝ်ဖျာ မၞုံလဝ် မွဲဒ္ကေဝ် ပွဳူ (၁၃)ကိုဋ်ဓဝ်ကီုလေဝ် ပ္ဍဲလက်ထက်ကံၚ်ဇြဳပၞာန်ဂှ် ၚုဟ်သၠုၚ်တိုန်မံၚ် စဵုကဵု(၃)ဆတုဲ ၚုဟ်နှေန်ဟွံညိၚ်ဝတ်တံ က္တဵုဒှ်ဒၟံၚ် အရိုဟ်ဒဒှ်တ္ၚဲရ။
ပရိုၚ်-သြၚ်လောန်တိုၚ်မ်
ဗီု- CJ