အခိၚ်ဟွံရုဲ ကလေၚ်သီကေတ် ဒေသၜါသွာၚ်မာန်ဂှ် ဂကောံဇြဟတ်ပၠန်ဂတးတံဟီု

ကျာ်မြဟ်၊ ဂျာန္နဝါရဳ ၁၆

ဒေသၜါသွာၚ် ကလေၚ်ဗ္တိုက်ဂွံလဝ် လလအ်ပွိုၚ် ၅၀ တ္ၚဲ မွဲဒမြိပ်ဝၚ်ဒပ်ပၞာန်ဗၟာဂှ် အခိၚ်ဟွံရုဲ ကလေၚ်သီကေတ် အပ္ဍဲပွိုၚ် ၂၄ နာဍဳမာန်ဂှ် သ္ကိုပ်ဒပ် S.O.F ဂကောံဒပ်ပြုပြေၚ်ပၞာန်တၟေၚ် မပါလုပ်လဝ် ပ္ဍဲပရေၚ်ပၞာန်ဂှ်ကဵု သ္ကိုပ်ကရောၚ်ပၞာန် Lion Battalion Commando တံ ဟီုရ။

တုဲကၠုၚ်သၞာံ ၂၀၂၃ ဂိတုနဝ်ဝေမ်ဗာ ၁၀ တေံ ဂကောံဒပ်ပံၚ်ကောံ KNLA လုပ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ်တိဍာ် ကေုာံ ဗ္ဒိုပ်သၞေဟ်ကၚ် ဒဒန်အတ္တရာန် (ၜါသွာၚ်) ဒပ်ကံၚ်ဇြဳပၞာန် BGF တံ ဖျေံလဝ်သ္ဇိုၚ် ပ္ဍဲကွာန်ၜါသွာၚ် ပွိုၚ်ဍုၚ်ကျာ်မြဟ် ပယျဵုတွဵုရးကရေၚ်ကဵု တွဵုရးဍုၚ်မန်ဂှ် ပေါဲဗ္တိုက်က္တဵုဒှ်လဝ် လလအ်ပွိုၚ် ၂ ဂိတုရ။

တ္ၚဲပေါဲဗ္တိုက်စဒှ်ဂှ် ဂကောံဒပ်ပံၚ်ကောံပၠန်ဂတး KNLA တံ သီဂွံလဝ် ဗ္ဒိုပ်သၞေဟ်ကၚ်ဒဒန်ၜါသွာၚ်ဂှ်တုဲ ထိၚ်ဒက်ဂွံလဝ်တိဍာ် ဂၠံၚ်ပလံၚ်ဗစိုပ်ဇွောံမကံၚ်ဇြဳပၞာန်အဓိက ဂၠံၚ်လှာဒကှ်−ၜါသွာၚ်ကဵု ဂၠံၚ်ၜါသွာၚ်−တၟံဗြဴတံဂှ်တုဲ မွဲတ္ၚဲဓဝ် တၚ်ရန်တၟံ ပရေၚ်ပြုပြေၚ်ပၞာန်ၜါသွာၚ် ၂ အာစိုပ်ဒတုဲ ဗွဲမအံၚ်ဇၞးဂှ် သ္ကိုပ်ဒပ် S.O.F ဟီုရ။

အပ္ဍဲလၟေၚ်ဒဒှ်ပေါဲဗ္တိုက်ဂှ် ဒပ်ကံၚ်ဇြဳပၞာန် သုၚ်စောဲဗ္တိုက်ဒၟံၚ် သီုကဵုအရီုဗၚ်လွဟ်ဇၞော် သီုကဵုအရီုဗၚ်က္ၜၚ်ကျာတံဂှ်တုဲ ကရောၚ်ပၞာန်ဒပ်ကံၚ်ဇြဳပၞာန် မဘိုၚ်ကဵုလဝ်ပၞာန်အရီု နူကဵုဗလးတိဏံဂှ် ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ဘိုၚ်ကၟာတ်လဒဵုဗ္တိုက်လဝ်ရ။

ကရောၚ်ပၞာန်ဒပ်ကံၚ်ဇြဳပၞာန် ကၠုၚ်စိုပ်ကဵုပၞာန်ရီု ကုဒေသၜါသွာၚ် ၜါကရောၚ် စှ်ေအာတုဲ လ္ပာ်ဒပ်ကံၚ်ဇြဳပၞာန် ပါလုပ်သီုကဵုသ္ကိုပ်တမ်ဒပ် ကေုာံ ကဆံၚ်သၞာဲဒဴတံဂှ် စဵုကဵု ၃၄ တၠ ချိုတ်တုဲ ၂၀ တၠပြၚ် ကလိဂွံလဝ်ဝပ်တုဲ ဂကောံဒပ်ပံၚ်ကောံ KNLA တံ သီဂွံလဝ် ဂၠုဲပၞာန် ၃၀ ပြၚ်၊ လွဟ်လက်နက် ဗ္ဒါဲ ၉၀ ရ။

ပေါဲဗ္တိုက်ၜါသွာၚ် လအ်ကၠုၚ်ၜိုတ် ၅၀ တ္ၚဲဂှ်ဝွံ တုဲကၠုၚ်ပ္ဍဲဂိတုဒဳဇြေမ်ဗာ ၂၉ တေံ နူကဵုကံၚ်ဇြဳပၞာန် ကေုာံ ဒပ်မၚ်ပယျဵု BGF တံဂှ် သုၚ်စောဲ လွဟ်ဇၞော်၊ က္ၜၚ်ကျာ၊ ဒရုၚ် နာနာသာ်တုဲ ဟိုတ်နူထ္ပက်ကၠုၚ်ကရောၚ်ပၞာန် နကဵုဇြဟတ်ဗွဲမဂၠိုၚ်ဂၠေၚ်ဂှ်တုဲ ဂကောံဒပ်ပံၚ်ကောံပၠန်ဂတးတံ ကလေၚ်ဆုတ်ကဵုလဝ်ရ။

သ္ကိုပ်ကရောၚ်ပၞာန် Lion Battalion Commando ဗိုလ်အေဝ်သေဝါဂှ် ဆုတ်ကလေၚ်ကဵု နူကဵုဒေသၜါသွာၚ်မွဲလစုတ်ဂှ်ဝွံ ဟိုတ်နူဒှ်ဒၞါဲပွန်ပၞာန်ပၟိက်ဇၞော်ဟွံသေၚ်ဂှ်ကီု သီုကဵုမိက်ဂွံကဵုသၟတ်တံဇူဒီုကီုဂှ်တုဲ အခိၚ်ဟွံရုဲ ကလေၚ်သီကေတ်မာန်ဂှ် ဟီုရ။

“ၜါသွာၚ်ဂှ် ဒှ်ပွန် ပိုယ်တံစၟတ်လဝ်ဇၞော်ဇၞော်လေဝ်ဟွံသေၚ်ပုဟ်။ တုဲပၠန် ၜိုတ်ဗ္ၜတ်မိက်ဂွံဂွံ ဂွံဒၞါဲဏံမှ ပိုယ်တံလေဝ် ဖျေံသ္ဇိုၚ်တုဲ ဒှ်အကာဲအရာဂွံအံၚ်ဇၞးဟွံသေၚ်ပုဟ်။ ၜိုတ်ကရောၚ်ပၞာန်ကၠုၚ်ဂှ်ရ သွက်ဂွံသီဂှ် ပိုယ်တံရန်တၟံလဝ်။ နကဵုဗီုပြၚ် ကဵုသၟတ်တံဇူထောံတုဲ ဆုတ်ကလေၚ်ထောံ မွဲလဂါံရ။ ညအ်ဂှ် သွက်ဂွံဂြိပ်ဟွံသေၚ်ပုဟ်။ လဂါံဇိုၚ်ဆုတ်ကလေၚ်လဝ်ဂှ် ကလေၚ်ကေတ်ဇြဟတ်တုဲ သွက်ဂွံဆက်ဂါံစှ်လဂါံမာန် ပ္တိတ်လဝ်ဇြဟတ် မဒှ်ရ။ ၜါသွာၚ်ဂှ်တှ်ေ တ္ၚဲယးဟာ၊ အဠဳတေံဟာ၊ အပ္ဍဲပွိုၚ်မွဲနာဍဳဟာ အခိၚ်ဟွံရုဲ ပိုယ်တံ လုပ်ဍိုက်ဗ္တိုက်ဂွံဒၟံၚ်ဏောၚ်” သာ်ဝွံ ဗိုလ်အေဝ်သေဝါ သ္ဂးရ။

ကံၚ်ဇြဳပၞာန် ကေုာံ ရဲထံက်ဂလာန်ဒပ်ပၞာန်တံဂှ် ကလေၚ်သီကေတ် ဒေသၜါသွာၚ်တုဲ ထိၚ်ဒက်တိဍာ်ပေၚ်ၚ်မာန်ယျ လလောၚ်ပ္တိတ်ဂွံၜါသတ္တာဟတုဲ ကောန်ဂကောံဒပ် မပါလုပ်လဝ် အပ္ဍဲပေါဲဗ္တိုက်ၜါသွာၚ်ဂှ် ပအပ်ပြာပ်ကဵုလဝ် တဆိပ်ကြာသရာဲသ္ဂံၚ် ကေုာံ တဆိပ်ကြာပ္တိုန်စရာဲတံ နွံဒၟံၚ်ရ။

တုဲကၠုၚ် ပ္ဍဲဂိတုဂျာန္နဝါရဳ ၁၄ တေံဂှ်လေဝ် ကောန်ဂကောံဒပ် မပါလုပ်လဝ် ပ္ဍဲပေါဲဗ္တိုက်ၜါသွာၚ်တံဂှ် ဂကောံ YMBA သၟဝ်တဲကံၚ်ဇြဳပၞာန်တံ ပအပ်ကဵုလဝ်တဆိပ်ကြာ YMBA ပ္ဍဲကဵုဘာပရိယတ္တိ ဍုၚ်မတ်မလီုဂှ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။

သ္ကိုပ်ဒပ် ဂကောံဒပ်ပြုပြေၚ်ပၞာန်တၟေၚ် S.O.F ကိုဝ်အံၚ်သာန်ယှာဂှ် ဒပ်ကံၚ်ဇြဳပၞာန် ၜိုန်ရကလေၚ်သီလဝ် ၜါသွာၚ်ကီုလေဝ် နတဲဏံ သီဂွံလဝ်ပေၚ်ၚ်ဟွံမာန်ဏီတုဲ နွံဒၟံၚ် အပ္ဍဲဗ္ဒိုပ်ၜါသွာၚ်သၟးရတုဲ ဒၞါဲပွဳပွူကွာန်သှ်ေဒၟံၚ်တံသီုဖအိုတ်ဂှ် ဂကောံဒပ်ပံၚ်ကောံပၠန်ဂတးတံ ထိၚ်ဒက်လဝ်ရောၚ်ဂှ် ဟီုရ။

“ဍေံတံ (စကစ) လေဝ် ကလေၚ်သီဂွံလဝ် ၜါသွာၚ်ပေၚ်ၚ်ဟွံသေၚ်ပုဟ်။ ဍေံတံ ကၠောံဒဒန်ဂှ်တုဲ တက်ဗဳဒဳယောစၟတ်သမ္တီ ပ္ဍဲဒဒန်ဂှ်တုဲ ပ္တိုန်လ္တူလာၚ်။ တြးဝါဒ။ ဍေံတံ နွံဒၟံၚ် အပ္ဍဲဗ္ဒိုပ်ၜါသွာၚ်ဂှ်ဖိုဟ်ရ။ ပ္ဍဲကဵုဗ္ဒိုပ်ဗၠာဲသၟိၚ်ဂှ်ကဵု ၜါသွာၚ် လ္ပာ်သ္ကုတ်ဂၠံၚ်ကွာန် မၞုံပွဳပွူဗ္ဒါဲဗ္ဒါဲတံဂှ်ရ။ ကြပ်ဖအိုတ်ဂှ်တှ်ေ ပြဟ်ဟ်ဏံ နွံဒၟံၚ်သၟဝ်အုပ်ဓုပ် ဂကောံပံၚ်ကောံ Lion SOF ပါလုပ်သီုကဵု KNLA ပိုယ်တံဖိုဟ်ဂှ် မိက်ဂွံဟီုရ” သာ်ဝွံ ကိုဝ်အံၚ်သာန်ယှာ သ္ဂးရ။

အတိုၚ်ဂလာန်ညးဒေသတံဂှ်မ္ဂး ကြဴနူပေါဲဗ္တိုက်ၜါသွာၚ်တုဲ ဂကောံဒပ်ပံၚ်ကောံ ကံၚ်ဇြဳပၞာန် ကေုာံ BGF တံဝွံ ၜိုန်ရဖျေံသ္ဇိုၚ်မံၚ်ဒၟံၚ် ပ္ဍဲဗ္ဒိုပ်ဗၠာဲသၟိၚ်ၜါသွာၚ်ကဵု ကွာန်ဗ္ဒါဲဗ္ဒါဲတံဂှ်သၟးကီုလေဝ် ထိၚ်ဒက်ဂွံလဝ်အလုံဒေသမွဲ ဟွံမွဲဏီပုဟ်ဂှ် ဂွံတီကေတ်ရ။

အပ္ဍဲကာလပေါဲဗ္တိုက် ဒေသၜါသွာၚ်ဂှ် ဂကောံဒပ်ပံၚ်ကောံ ကံၚ်ဇြဳပၞာန်၊ BGF တံဝွံ နူကဵုကွာန်ၜါသွာၚ်၊ တၟံဗြဴ၊ (ကျောက်ကွဲ) ၊ မဂြောဝ်တံဂှ် အရိုဟ်ဒဒှ်တ္ၚဲ ကၠတ်ဂၠံက်ကေတ်ဏာ ကပေါတ်မၞုံကဵုၚုဟ်မးဂမၠိုၚ် နူကဵုသ္ၚိဒၟံၚ်ညးဍုၚ်ကွာန်ပါဲဒဴဘဲပၞာန်တံ နကဵုကွဳစက်ဍောတ်ဇၞော်ဂှ် ကၠောန်ၜိုတ်ဒၟံၚ်ရောၚ် ဂွံတီကေတ် အတိုၚ်ပရိုၚ်ဗလးတိတံရ။

ဟိုတ်နူပေါဲဗ္တိုက်ၜါသွာၚ် ပွိုၚ်ဍုၚ်ကျာ်မြဟ်ဂှ်တုဲ ညးဍုၚ်ကွာန်ဒေသ ၂၀၀၀၀ ပြၚ် နူကဵုကွာန် ၂၀ ကွာန်ပြၚ်ဂှ်ဝွံ ဒဵုကဵုအခိၚ်လၟုဟ် ဟွံဂံၚ်စဴဌာန်ဒၟံၚ်အိုတ်ဏီတုဲ ပရေၚ်နွံပၟိက်အရီုဗၚ်ပရေၚ်ဗ္စာရဏာမၞိဟ်တံလေဝ် သၠုၚ်တိုန်ကၠုၚ်ဂှ် ဂွံတီကေတ် အတိုၚ်ဂလာန် ညးဍုၚ်ကွာန်ပါဲဒဴဘဲပၞာန်တံရ။

ပရိုၚ်−သြၚ်လောန်တိုၚ်(မ်)

ဗီု−Lion Battalion