ကၞောတ်ၜဳရေဝ်၊ ဂျာန္နဝါရဳ (၁၆)
ဗော်ဍုၚ်မန်တၟိ ဒှ်ဗော်ရပ်လွဟ်ကောန်ဍုၚ်အရၚ်မန် ဝှ်ကြံၚ်ဂှ် ပ္ဍဲဒေသမန်တံ ညံၚ်ပရေၚ်သၞောဝ်ဥပဒေအုပ်လဒံတံကဵု ပရေၚ်ဂီုကၠီု သ္ဂောံခိုဟ်ကၠုၚ်ဂှ် ဂၠါဲနဲကဲနာနာသာ်တုဲ သ္ပဇြိုဟ်နက် ရေၚ်တၠုၚ်အာရောၚ်ဂှ် လလောၚ်တြးလဝ် ပ္ဍဲကၞောတ်ကောံဓရီုဂှ်ရ။
လလောၚ်ပ္တိတ်လဝ် ပ္ဍဲကၞောတ်ကောံဓရီုဗော်ဍုၚ်မန်တၟိ မရနုက်ကဵု (၁၁) ဝါ ကၠောန်ဗဒှ်လဝ် ပ္ဍဲကၞောတ်ၜဳရေဝ် သ္ပတံနူ ဂိတုဒဳဇြေန်ဗာ စၟတ်တ္ၚဲ (၂၅) စဵုကဵု ဂိတုဂျာန္နဝါရဳ စၟတ်တ္ၚဲ (၁၄) သၞာံဏံဂှ်ရ။
ဒၞါဲလ္ၚဵုပ္ဍဲဒေသမန်တံဂှ် ပၟတ်ပၞာန်ပ္ဍဲဍုၚ်တံ ကၠောံထၞာန်ကၠုၚ်မံၚ်တုဲ လ္တူဗော်တံ စဵုဒၞါကဵု ညးဍုၚ်ကွာန်ကောန်အရာပ် ဒးကၠုၚ်ဘဲပၞာန်လ္ၚဵုတံဟွံမာန်ဂှ် သၚ်မန်တံကဵု ညးဍုၚ်ကွာန်တံ ဟွံဒးကၠုၚ်လဝ်ဂၞပ်စိုတ်ရဂှ် သ္ဂးရ။
ဆ္ဂး ညံၚ်ပရေၚ်အုပ်လဒံဥပဒေ ကေုာံ ပရေၚ်ဂီုကၠီု သ္ဂောံခိုဟ်ကၠုၚ် ပ္ဍဲဒေသမန်တံဂှ် ဗော်ဍုၚ်မန်တၟိ ဗီုလဵုထ္မံက်အာရုပ်ရဴရောဟီုဂှ် ဟွံထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ညးရေၚ်တၠုၚ်မံၚ် ပရေၚ်ဂကူမန်မွဲတၠဂှ် နကဵုဗော်ဍုၚ်မန်တၟိတံ သွက်ဂွံကဵုအာဂီုကၠီု ပ္ဍဲဒေသမန်တံ ဒှ်မာန်ကီုလေဝ် ဟိုတ်နူပေါဲဗ္တိုက် က္တဵုဒှ်ဒၟံၚ် လၟုဟ်တံဂှ်တုဲ တၚ်ကော်ဆဴတံ နွံမာန်ရဂှ် သ္ၚဳဂၠိပ်လဝ်ရ။
“အတိုၚ်ဖျေံစၟတ်လဝ် ပ္ဍဲကောံဓရီု ဗော်ဍုၚ်မန်တၟိ မရနုက်ကဵု(၁၁)ဝါဂှ် သွက်ဂွံကဵုအာဂီုကၠီု ပ္ဍဲဒေသမန်တံဂှ် ဒှ်မာန်ရောၚ် ညာတ်ကေတ်ရ။ လ္တူဏံဂှ် ပ္ဍဲကာလကဵုဂီုကၠီုတံဂှ် ကဵုဂကောံရပ်လွဟ်ကောန်ဍုၚ်အရၚ်တံကီု၊ ကဵုစကစတံကီုဂှ် တၚ်ကော်ဆဴလ္ၚဵုတံ ဒှ်ကၠုၚ်ကဵုညးတံမာန်ရဂှ် ညာတ်ကေတ်ရ။ ဆ္ဂး မုဒှ်ဒှ် အကြာညးတံရေၚ်သ္ကအ် ဗီုလဵုပ္ညဳပ္ညပ် ထ္မံက်အာဗီုလဵုရောဂှ် ပါလုပ်မံၚ် ပ္ဍဲအစဳဇန်သောဲသောဲဗြောဲဗြောဲညးတံမာန်မံၚ်ရဂှ် ညာတ်ကေတ်ရ” သာ်ဝွံ သ္ဂးရ။
မွဲအခိၚ်ဓဝ် သွက်ပရေၚ်ညဳသၟဟ် ကုဂကောံရပ်လွဟ်ကောန်ဍုၚ်အရၚ်ဘဝတုပ်တံကဵု ဂကောံရပ်လွဟ် တၚ်ရန်တၟံတုပ်တံ သ္ဂောံနွံဂှ် ဆက်ဂ္စာန်အာရောၚ်တုဲ ကံကုသိုလ်ဇကု ညံၚ်ဇကုဂွံဖန်ဖက်ကေတ်မာန်၊ ညံၚ်ကၟိန်ဍုၚ်ပံၚ်ကောံဖက်ဒရာဍာံဇေတ် ဂွံမံက်ဂတဝ်ကၠုၚ်မာန် ဂ္စာန်ရေၚ်တၠုၚ်အာရောၚ်ဂှ် ဂွံတီကေတ် အတိုၚ်တၚ်လလောၚ်တြး ဗော်ဍုၚ်မန်တၟိရ။
သ္အာၚ်နူဂှ်ပၠန် အသိၚ်ပေါဲဗ္တိုက် အကြာဒပ်ကံၚ်ဇြဳပၞာန်ကဵု ဂကောံပၠန်ဂတးတံဂှ် သၠုၚ်တိုန်ကၠုၚ်မံၚ်လၟေၚ်တ္ၚဲတုဲ သွက်ဂွံဒေါံပန်ပှော်အလုံဍုၚ်ဂှ် ဒှ်ဟွံမာန်တုဲ ပြဟ်ဟ်ဏံဂှ်တှ်ေ သွက်ဂွံပသောၚ်ပြဿနာပရေၚ်ဍုၚ်ကွာန်၊ သွက်ဂွံဒက်ပ္တန်ပရေၚ်ၜိုဟ်လလမ်၊ သွက်ကၟိန်ဍုၚ်ပံၚ်ကောံဖက်ဒရာ ဂွံမံက်ဂတဝ်ကၠုၚ်ဂှ် ဟွံညာတ်ကေတ်အယောၚ်အလာရဂှ် ဗော်ဍုၚ်မန်တၟိ သ္ဂးရ။
ပ္ဍဲအကာဲအရာဏံဂှ် နကဵုဗော်ဍုၚ်မန်တၟိတံ ညးပရေၚ်ညဳသၟဟ်ကောန်ဂကူ ကေုာံ ပရေၚ်ဒက်ပ္တန်ဗော် သ္ဂောံခိုၚ်ကၠိုက်တံ၊ ဒပ်တံ၊ တိဍာ်ဒေသတံ သာတုဲသ္ဂောံခိုဟ်တိုန်ဂှ် ဆက်ဂ္စာန်ရေၚ်တၠုၚ်အာရောၚ်ဂှ် ကဵုလဝ်သမ္တီရ။
နာဲပညာမာန် ညးတာလျိုၚ် ဂကောံဇြဟတ်ဖက်ဒရာရာမညတၟိ (NRFF)ဂှ် “နကဵုဗော်ဍုၚ်မန်တၟိတံ ထ္မံက်အာရုပ်ရဴကမၠောန်တံ ပ္ဍဲဒေသထိၚ်ဒဝ်ညးတံသၟးရဟာ ဟွံသေၚ်မ္ဂး မ္ၚးတိဍာ်ထိၚ်ဒဝ်ညးတံ မွဲလ္ပာ်ဂၠံၚ်ကွဳစက်ဂှ်ရော ထ္မံက်အာပရေၚ်အုပ်ဓုပ်ညးတံကီုဟာ။ တုဲပၠန် ထ္မံက်အာရုပ်ရဴ ကမၠောန်ပရေၚ်အုပ်လဒံဥပဒေ ဒေသမန်တံဂှ်ဟာဟီုဂှ် သ္ဇက်ဂွံမံၚ်ရံၚ်ခိုဟ်တုဲ သ္ဇက်စိုတ်ဂွံလုပ်စလေဝ် ခိုဟ်ရ။ ယဝ်ရကၠောန်ကၠုၚ် ဗီုဏံမ္ဂး မွဲလ္ပာ်ဂှ် ပရေၚ်လုက်စုက်ဒး ကုစကစတံဒှ်ကၠုၚ်မာန်ရောၚ်ဂှ် သ္ၚဳဂၠိပ်ဒးလဝ်ရ။ ဆ္ဂး အခိၚ်ပြဟ်ဟ်ဏံဂှ် ညးဍုၚ်ကွာန်တံဂှ် က္ဍုဟ်မၠေံဒၟံၚ် စကစရ။ ဟိုတ်နူဒှ်ဒၟံၚ် အခိၚ်ကယျာန်ပါဲဒၟံၚ် ပရေၚ်အုပ်ဓုပ် စကစဂှ်ရ နဒဒှ်ဂကောံပၠန်ဂတးမွဲ ပံၚ်တောဲကဵုညးဍုၚ်ကွာန်တံတုဲ ပံၚ်တောဲရေၚ်တၠုၚ်မ္ဂး ညးဍုၚ်ကွာန်တံ ဒုၚ်တၠုၚ်ရောၚ်ဂှ် ညာတ်ကေတ်ရ” သာ်ဝွံ ဟီုကဵု သြၚ်လောန်တိုၚ်မ်ရ။
ညးခါတ်အကာဲပရေၚ်ဍုၚ်ကွာန်မန်တံဂှ်တှ်ေ နကဵုဗော်ဍုၚ်မန်တၟိဂှ် ဆက်တုဲ ကေမ်ဇျှာပ်အာ ဂၠံၚ်တရဴဆဵုဂဗသဳကၠဳပၠန်ဂှ်ရ ပါလုပ်ကၠုၚ် ပ္ဍဲပေါဲဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန်တံ ဟွံသေၚ်ကီုလေဝ် ကၠောန်ကၠုၚ်ပရေၚ်ပလေဝ်ပလေတ်ပရေၚ်ပၞာန်တံ မာန်မံၚ်ရဂှ် သ္ၚဳဂၠိပ်လဝ်အိုတ်ရ။
ပ္ဍဲကောံဓရီုဗော် လအ်ပွိုၚ် (၂၀)တ္ၚဲဂှ် ကောန်ဂကောံကဝ်မတဳ ကေၚ်ကာဗဟဵု(၂)တၠ ထပ်ပဵုတုဲ လ္ပာ်က္ဍိုပ်သ္ကိုပ် ရုဲစှ်လဝ်အပြံၚ်အလှာဲဟွံမွဲတုဲ ရုဲစှ်လဝ် ကောန်ဂကောံကဝ်မတဳဗဟဵု (၃၅)တၠ၊ ကောန်ဂကောံကဝ်မတဳဗဟဵုအရန် (၆)တၠ ကေုာံ ကောန်ဂကောံကဝ်မတဳပၞာန် (၇)တၠရ။
ဟိုတ်နူထပ်ဗပဵုလဝ် ကောန်ဂကောံကဝ်မတဳတံဂှ်ရ နကဵုဗော်ဍုၚ်မန်တၟိ ပ္ဍဲ(၄)သၞာံဂတဏံ ဒှ်အဓိပ္ပာယ် ထပ်သၠဲပ္တိတ်အာ လၟေၚ်ကမၠောန်အဓါန်ဂတတံတုဲ ပ္ဍဲပရေၚ်ဂီုကၠီုဒေသတံဂှ် သၠဲပ္တိုန်ကၠုၚ်ဇြဟတ်ဒပ်တံမာန်မံၚ်ရဂှ် ထံက်ထ္ၜးလဝ်တံလေဝ် နွံဒၟံၚ်ရ။
အကာဲအရာ ပရေၚ်ဂၠးကဝ်၊ ပရေၚ်ပ္ဍဲဍုၚ်၊ ပရေၚ်ဂကောံဇြဟတ်နာနာ၊ ပရေၚ်အပ္ဍဲဗော်၊ ပရေၚ်ညးဍုၚ်ကွာန် ကေုာံ သၟတ်တံကဵု တၚ်စၞောန် လၟေၚ်ကမၠောန်အဓါန်ဂတ ပါလုပ်ပ္ဍဲလိက်ဒုၚ်စဳရေၚ် ကဝ်မတဳဗဟဵု သ္ပဒတန်လဝ် ပ္ဍဲကောံဓရီုတံဂှ်တှ်ေ စဵုကဵုတ္ၚဲဏံဂှ် ထ္မံက်ထ္ၜးလဝ် ချိုတ်တ်ပၠိုတ်တ်ဟွံမွဲဏီရ။
ဗော်ဍုၚ်မန်တၟိဂှ် ကြဴနူဒပ်ပၞာန်သီအဝဵုတုဲ မွဲဂကောံဓဝ်ကဵုဒှ်၊ နကဵုဂကောံကဵုဒှ် ဒှ်ဂကောံရပ်လွဟ်ကောန်ဍုၚ်အရၚ် အာစိုပ်သဳကၠဳလဝ် ပရေၚ်ၜိုဟ်လလမ် ကုကံၚ်ဇြဳပၞာန် စဵုကဵု (၇)ဝါ မွဲဂကောံရ။
ပရိုၚ်-သြၚ်လောန်တိုၚ်မ်
ဗီု-NMSP