ဗေကျေန်၊ ဂျာန္နဝါရဳ ၁၇
ဍုၚ်ကြုက် ပ္တိုန်လဝ်ဒုဟ် ကုက္ဍိုပ်သ္ကိုပ်ဂၠးတိ မပ္တိုန်လဝ်ဂုဏ်စရာဲ ကုက္ဍိုပ်သ္ကိုပ်ဂွံဇၞး ပ္ဍဲပေါဲရုမာဲသမ္မတထိုၚ်ဝါန်ဂှ်ရ။
ပ္ဍဲကဵုပေါဲရုဲမာဲသမ္မတ မကၠောန်ဗဒှ်လဝ် ပ္ဍဲဂိတုဂျာန္နဝါရဳ ၁၃ တုဲကၠုၚ်တေံဂှ် ဒုတိယသမ္မတ ဝဳလဳယာန်လာၚ် နူကဵုဗော်ဒဳမဝ်ကရေတ်တေတ်ညးဍုၚ်ကွာန် DPP ဂွံဇၞးလဝ်တုဲ အခိၚ်သၞောတ်တၠအဝဵုပၞာန် ကေုာံ ဒဳမဝ်ကရေဇြဳ ပြိုၚ်ပ္ကာန်ဒၟံၚ်ဂှ် ဗော်ညး ဂွံဇၞးလဝ် မရနုက်ကဵုအလန်တတိယရ။
ပေါဲအံၚ်ဇၞး ဗော်ဂွံအဝဵုဂှ် အမေရိကာန်ကီု ဗျိတိၚ်ကီု ဍုၚ်မဟာမိတ်ပလိုတ်တံဂမၠိုၚ် ဒုၚ်လဝ်တၠုၚ်ကီုလေဝ် ကြုက်ဂှ်တှ်ေ ပ္တိုန်လဝ်ဒုဟ် ကုကၟိန်ဍုၚ်တံဏံဂှ်တုဲ သွဟ်ပေါဲရုဲမာဲဂှ်လေဝ် တးပါဲလဝ်ရ။
ကြဴနူဗော်ဂွံအဝဵု DPP ဂွံဇၞးတုဲဂှ် ညးလ္ၚတ်မၚ်ရံၚ် ဗီုပြၚ်ကြုက်ခၠေဝ်ပလန်တံဂှ် ပရေၚ်ဂၠါဲသၞဂမၠိုၚ် နွံကၠုၚ်မာန်ဏောၚ်ဂှ် သ္ဂးဒၟံၚ်အိုတ်ရ။
ပ္ဍဲကဵုဂလာန်သြဝါဒသၞာံတၟိ သမ္မတကြုက် ယှဳကျေန်ဖျေန်ဂှ်လေဝ် ၝောံဍုၚ်ကြုက် ကေုာံ ထိုၚ်ဝါန် ပံၚ်ကောံအာဏောၚ် ဂးလဝ်တုဲ စပ်ကဵုလစွံစိုတ်တုဲ ကဵုလဝ်သမ္တီ သီုကဵုသမ္မတအမေရိကာန် ဂျဵုဗိုၚ်ဒေန်ဂှ် သ္ဂးလဝ်ရ။
သ္အာၚ်နူဂှ်ပၠန် ကြုက်ဝွံ ညာတ်လဝ် ညးမဇၞးလဝ်ပေါဲရုဲမာဲ ဝဳလဳယာန်လာၚ်ဂှ် နဒဒှ်ရဲပါ်တိတ်တုဲ စၟတ်လဝ် သီုကဵုညးအန္တရာယ်မၞုံရ။
ၜိုန်ရဂွံဇၞးလဝ်ပေါဲရုဲမာဲကီုလေဝ် ဗော် DPP ဝွံ ပ္ဍဲကဵုကၠတ်ထဝ် ဒးဆောံလေၚ်လဝ် ဒၞါဲမၞိဟ်ဗွဲမဂၠိုၚ်ဂှ်တုဲ သွက်ဂွံအုပ်ဓုပ်ဗွဲမစိုပ်တရဴမာန် နွံပၟိက်ဒၟံၚ် ပရေၚ်ထံက်ဂလာန် ဗော်အပ္ဍဲဒေသတၞဟ်ဟ်တံဏောၚ်ဂှ် ဂွံတီကေတ်ရ။
ဗော်ကူမေန်တာန် လ္ပာ်ဒစဵုဒစး KMT ဝွံ နဒဒှ်အမာတ်ကၠတ်ထဝ်ဂှ် ကလိဂွံလဝ်ဒၞါဲ ၅၂ ဒၞါဲတုဲ DPP ဂှ်တှ်ေ ကလိဂွံလဝ် ၅၁ ဒၞါဲရ။
ဟိုတ်နူအကာဲအရာဏံတုဲ အနာဂတ်ပရေၚ်ဍုၚ်ကွာန်ထိုၚ်ဝါန်ဝွံ အရာမထုဲထံၚ်တံ နွံကၠုၚ်မာန်ဂှ် ညးလ္ၚတ်ဂမၠိုၚ် သ္ၚဳဂၠိပ်လဝ်ရ။
အခိၚ်လၟုဟ် ဍုၚ်တ္ကအ် နဝ်ရူဂှ်လေဝ် ဟိုတ်နူစဵုစး သြဇာကြုက်ဟွံမာန်တုဲ ထပိုတ်ထောံ ပရေၚ်ဆက်ဆောံကလုတ်တမာန် ကုထိုၚ်ဝါန်ဂှ် ဂွံတီကေတ်ရ။
Ref: Yahoo news