ရေဝ်၊ ဂျာန္နဝါရဳ (၁၇)
ပ္ဍဲဒေသသ္ကုတ်သၠုၚ်ကျာတွဵုရးဍုၚ်မန်ဂှ် ပ္ဍဲအခိၚ်ခြာဟွံလအ်ဏံ သၠုၚ်ပ္တိုန်အာ အသိၚ်ပရေၚ်ပၞာန်ရောၚ်ဂှ်ရ နကဵုညးဍုၚ်ကွာန်တံ သွက်ဂွံစွံသတိအာကၠုၚ်အိုတ်ညိဂှ် ဂကောံဇြဟတ်ပၠန်ဂတး ဖျေံသ္ဇိုၚ်ဒေသတံ ဖ္တိုက်ဖ္အောဝ်လဝ်ရ။
ဂကောံဇြဟတ်ပၠန်ဂတး ဖျေံသ္ဇိုၚ်ဒေသ သ္ကုတ်သၠုၚ်ကျာတွဵုရးဍုၚ်မန်တံဂှ် ပ္ဍဲသၞာံ ၂၀၂၄ဏံ သၠုၚ်ပ္တိုန်အာ အသိၚ်ပရေၚ်ပၞာန်ရောၚ်မဒှ်တုဲ ထ္မံက်အာပေါဲဗ္တိုက်သီဍုၚ်သီဗ္ဒိုပ်တံရောၚ်ဂှ် ပ္ဍဲသၞာံဏံမံက်ဂှ် ကဵုသမ္တီလလောၚ်ပ္တိတ်လဝ်ရ။
မွဲကရောံကဵုတၚ်လလောၚ်တြးဏံဂှ် ပ္ဍဲပွိုၚ်ဍုၚ်ရေဝ်၊ ဇြပ်ဗု၊ မုဟ်ဍုၚ်မပါလုပ် ပ္ဍဲပွိုၚ်ဍုၚ်မတ်မလီု တွဵုရးဍုၚ်မန်တံဂှ်လေဝ် ရေၚ်တၠုၚ်အာ ပွဗ္တိုက်သၠုၚ်ပ္တိုန်အသိၚ်ပရေၚ်ပၞာန်တံရောၚ်ဂှ် ဂကောံဇြဟတ်ပံၚ်ကောံ ပၠန်ဂတးတံ ဟီုဂးလဝ်ရ။
ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် (MSRF) နာဲနဂါဂှ်တှ်ေ သာတုဲရေၚ်တၠုၚ်အာ ပရေၚ်ပြုပြေၚ်ပၞာန် ဂကောံဇြဟတ်ပံၚ်ကောံပၠန်ဂတးတံ လ္တူနူကဵုကၠာတေံရောၚ်ဂှ် ဟီုကဵု သြၚ်လောန်တိုၚ်မ်ရ။
ဟိုတ်နူသၠုၚ်ပ္တိုန်ကၠုၚ် အသိၚ်ပရေၚ်ပြုပြေၚ်ပၞာန်တံရောၚ်ဂှ်ရ နကဵုညးဍုၚ်ကွာန်တံ ညံၚ်ဟွံဂွံအာကၠုၚ်မံၚ်စံၚ် ဗ္ဒါဲဗ္ဒိုပ်ဒပ်ကံၚ်ဇြဳပၞာန်တံဂှ်ကဵု ပၟိက်ဟၟဲမွဲသာ် ညံၚ်ဟွံဂွံအာကၠုၚ်တရဴတံကီု၊ ဟွံဒေါံဟွံဂွံ ဒးအာကၠုၚ်မံၚ်စံၚ်မ္ဂးလေဝ် ညံၚ်သ္ဂောံထံၚ်ပရိုၚ်ပရေၚ်ပၞာန်တံကဵု ညံၚ်ဂွံၜံက်စွံလဝ်ဥမၚ်တံညိဂှ် ဖ္တိုက်ဖ္အောဝ်လဝ်ရ။
ဂကောံလကိုဟ်ဍုၚ်ရေဝ် ချဳဒရာၚ်ဒၟံၚ်ပရေၚ်ပၞာန် ပွိုၚ်ဍုၚ်ရေဝ်သၠုၚ်ကျာဂှ်လေဝ် ပ္ဍဲတ္ၚဲအကြာတံဏံ နကဵုညးဍုၚ်ကွာန်ကောန်အရာပ်တံ သွက်ဂွံစွံသတိအာကၠုၚ်အိုတ်ညိဂှ် ပ္ဍဲဂိတုဂျာန္နဝါရဳ စၟတ်တ္ၚဲ(၁၅)ဂှ် ကဵုသတိလလောၚ်ပ္တိတ်လဝ်ရ။
ဂကောံလကိုဟ်ဍုၚ်ရေဝ်ဂှ် တ္ၚဲဏံ ဂိတုဂျာန္နဝါရဳ စၟတ်တ္ၚဲ(၁၆)ဏံဂှ် အာစိုပ်ဗ္တိုက်လဝ် ဒပ်ခမရ(၅၉၁)ကံၚ်ဇြဳပၞာန် ဖျေံသ္ဇိုၚ်ကွာန်ဘာ၊ ပွိုၚ်ဍုၚ်ရေဝ်တံ နကဵုလွဟ်ဇၞော်ရ။
ဟိုတ်နူကဵုပရိုၚ် ဂကောံဇြဟတ်ပံၚ်ကောံပၠန်ဂတးတံ သၠုၚ်ပ္တိုန်အသိၚ်ပရေၚ်ပၞာန်တံဂှ်တုဲ ဒပ်ကံၚ်ဇြဳပၞာန်တံလေဝ် ပလေဝ်ပလေတ် သွက်ပၞာန်ဒုၚ်တံကီု၊ မၚ်တောပ်ဗ္တိုက်တံကီု၊ သၠုၚ်ပ္တိုန်ပရေၚ်ဂီုကၠီုတံကဵု အပ္ဍဲဒပ်တံ ပလေဝ်ပလေတ်လဝ် သွက်ပရေၚ်ပြုပြေၚ်ပၞာန်တံရဂှ် ဂွံတီကေတ် အတိုၚ်လဟီုတမ်ရိုဟ်ပရိုၚ် ပ္ဍဲဒပ်တံရ။
ဂကောံဇြဟတ်ပံၚ်ကောံပၠန်ဂတး ဖျေံသ္ဇိုၚ် သ္ကုတ်သၠုၚ်ကျာတွဵုရးဍုၚ်မန်ဂှ် တုဲကၠုၚ်ပ္ဍဲသၞာံ ၂၀၂၃ဂှ် ပေါဲဗ္တိုက်ၜါလ္ပာ် ကုဒပ်ကံၚ်ဇြဳပၞာန်တံ က္တဵုဒှ်လဝ် ဟွံအောန်နူကဵု (၅၀)ဝါတုဲ အပ္ဍဲပေါဲဗ္တိုက်ဂှ် ကောန်ဂကောံဒပ်ကံၚ်ဇြဳပၞာန် ဗ္ဒါဲ (၁၀၀) ဒးချိုတ်လဝ်ရဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
ပရိုၚ်-သြၚ်လောန်တိုၚ်မ်
ဗီု-CJ