ကျာ်မြဟ်၊ ဂျန္နဝါရဳ ၁၇
ပ္ဍဲထံၚ်စာတ်ကျာ်မြဟ်၊ တွဵုရးဍုၚ်မန်ဂှ် ပ္ဍဲအကြာတ္ၚဲတံဏံ ဟိုတ်နူဟွံဂွံအခေါၚ်လွဳတ်ဂဥုဲ ဍိုက်က်ပေၚ်ၚ်ဂှ်ရ ကောန်ထံၚ်ပရေၚ်ဍုၚ်ကွာန်ၜါတၠ ချိုတ်အာလဝ်ရဂှ် ကောန်ယက်ကောန်ထံၚ်ပရေၚ်ဍုၚ်ကွာန်အလုံဍုၚ်ဗၟာ PPNM ဟီုကဵုသြၚ်လောန်တိုၚ်မ်ရ။
လ္ဂောံကဵုပရေၚ်ကောန်ထံၚ်ပရေၚ်ဍုၚ်ကွာန်ချိုတ်အာဂှ်မ္ဂး ပ္ဍဲဂိတုဂျာန္နဝါရဳ စၟတ်တ္ၚဲ (၁၂)တုဲကၠုၚ်တေံဂှ် ကိုဝ်ယာယှေန် (ကော်)ကိုဝ်ဟာယှေန် အာယုက်(၄၃)သၞာံ ဒးဒုၚ်ဖျေံစၟတ်လဝ်ဒဏ်ထံၚ်မွဲအာယုက်ဂှ် ဟိုတ်နူကဵုဘဲဝပ် ဒးဒုၚ်ၜုၚ်တက်ပျဲပျာံလဝ် ပ္ဍဲပရေၚ်စၟဳတ်တုဲ အခိၚ်ပဆုဲပြံၚ်လွဳတ်မံၚ် ရုၚ်ဂဥုဲမ္ၚးထံၚ်ဂှ် ချိုတ်အာလဝ်ရ။
သ္အာၚ်နူဂှ်ပၠန် ပ္ဍဲဂိတုဂျာန္နဝါရဳ စၟတ်တ္ၚဲ(၁၆)ဂှ်လေဝ် ကောန်ထံၚ်ပရေၚ်ဍုၚ်ကွာန် ကိုဝ်ပျေအ်ဖျဵုအံၚ် အာယုက်(၃၁)သၞာံ သီုဒှ်ညးယိုက်ဝန်ပၠိုတ်ပၟတ် (CDM)မွဲတၠ ဒးဒုၚ်ဖျေံစၟတ်လဝ် ဒဏ်ထံၚ် (၇)သၞာံဂှ် ကြဴနူဒှ်ယဲကျာထပက်တုဲ အခိၚ်ပလံၚ်ဗ္စိုပ်လွဳတ်မံၚ် ရုၚ်ဂဥုဲမ္ၚးထံၚ်စာတ်ဂှ် ဒးချိုတ်အာလဝ်ပၠန်ရ။
ကောန်ထံၚ်ပရေၚ်ဍုၚ်ကွာန်တံဂှ် ဟိုတ်နူဟွံဂွံပရေၚ်မၚ်မွဲပရေၚ်ထတ်ယုက်ပ္ဍဲထံၚ်စာတ်တံ ဍိုက်က်ပေၚ်ၚ်ကီု၊ ဟိုတ်နူဘဲဝပ် ဒးဒုၚ်ဍဵုဍိုက်ပ္ဍဲပရေၚ်စၟဳတ်တံကီု၊ ဟိုတ်နူဟွံဂွံအခေါၚ် ပလံၚ်ဗစိုပ်လွဳတ်ကဵု မၞိဟ်ယဲကာတၟေၚ်တံ ပ္ဍဲရုၚ်ဂဥုဲမ္ၚးထံၚ်စာတ်တံ မွဲဒမြိပ်အခိၚ်ဂှ်ရ ဒးချိုတ်မံၚ်ရဂှ် ဂွံတီကေတ်ရ။
“ပ္ဍဲထံၚ်စာတ်တံဂှ် ဟိုတ်နူပရေၚ်မၚ်မွဲဂဥုဲဍိုက်က်ပေၚ်ၚ်တံဟွံမွဲဂှ်ရ ညးဒှ်ဒၟံၚ်ယဲဝေဒနာလၟိုန်တံဂှ် ယဲဂၠိုၚ်တိုန်သိုက်က်ရ။ နူဂှ်မွဲကဆံၚ် ချိုတ်ရ။ မွဲသာ်ပၠန်ဂှ်တှ်ေ ကိုပ်ကၠာနူဟွံဂွံစိုပ်ပ္ဍဲထံၚ်ဂှ် ဟိုတ်နူဘဲဒဏ် ဍဵုဍိုက်ပျဲပျာံ ပ္ဍဲပရေၚ်စၟဳတ်တံတုဲလေဝ် မၞိဟ်ဒးချိုတ်တံနွံရ။ မွဲသာ်ပၠန်ဂှ်တှ်ေ ဟိုတ်နူဟွံပလံၚ်ကဵုမၞိဟ်ယဲကာတၟေၚ်တံ ရုၚ်ဂဥုဲမ္ၚးထံၚ်တံ မွဲဒမြိပ်အခိၚ်တုဲ ဒးချိုတ်တံလေဝ် နွံရ။ တၚ်ပိတၚ်ဏံဂှ် ပိုဲဂွံဆဵုကေတ်ရ။ မၞိဟ်ယဲနွံမံၚ်ရရတံဂှ်လေဝ် ချိုတ်လေပ်ရ။ မၞိဟ်ယဲနွံမံၚ်တံဂှ် အလဵုညးတံ ဟိုတ်နူဂဥုဲဟွံမွဲပ္ဍဲတဲညးတံ မွဲဒမြိပ်ကဵုအခိၚ်တုဲ ဒးချိုတ်အာ မဒှ်ရ” သာ်ဝွံ ကိုဝ်တိုက်ထောန်ဥူ ညးတာလျိုၚ်လလောၚ်ပရိုၚ် ကောန်ယက်ကောန်ထံၚ်ပရေၚ်ဍုၚ်ကွာန်အလုံဍုၚ်ဗၟာ (PPNM) သောၚ်ထ္ၜးလဝ်ရ။
ကံၚ်ဇြဳပၞာန်ဂှ် ပ္ဍဲအရာပလံၚ်ဗ္စိုပ် စၞစကပေါတ်ပါဇြေဝ် ဇရေၚ်ကောန်ထံၚ်ပရေၚ်ဍုၚ်ကွာန်တံဂှ်လေဝ် ကၟာတ်လဝ်အခေါၚ် ပလံၚ်ဗ္စိုပ်ဂဥုဲဍုၚ်မ္ၚးတံတုဲ စၞစတံဂှ်လေဝ် သွက်ဂွံပလံၚ်နကဵုသၞောတ်ဗ္ၜတ်အိုတ်ဂှ် ပတေၚ်ဓရတ်လဝ် စေဝ်ပၞောန်ရ။
ပရေၚ်ကောန်ထံၚ်ပရေၚ်ဍုၚ်ကွာန်ဒးချိုတ် ဟိုတ်နူဟွံဂွံအခေါၚ်လွဳတ်ဂဥုဲတံဂှ် ကဝ်မတဳဇိုၚ်ခ္ဍာ်ဍုၚ်နာနာ (ICRC)မပါလုပ် နကဵုဂကောံဍုၚ်နာနာတံကဵု ဂကောံပ္ဍဲဍုၚ်တံ သွက်ဂွံဘိုၚ်အာတ်မိက်ကဵုအိုတ်ညိဂှ် ကောန်ယက်ကောန်ထံၚ်ပရေၚ်ဍုၚ်ကွာန်အလုံဍုၚ်ဗၟာ PPNM ဖ္တိုက်ဖ္အောဝ်လဝ်ရ။
မွဲလ္ပာ်ဂှ်တှ်ေ တၠအဝဵုထံၚ်ကံၚ်ဇြဳပၞာန်တံ ဆက်ဆောံဗွဲမတၞဟ်ခြာ ကုကောန်ထံၚ်ပရေၚ်ဍုၚ်ကွာန်တံ၊ ဍဵုဍိုက်ပျဲပျာံဟွံဗဗွဲဓရ်တံ၊ စကာကမၠောန်ဇြိုၚ်ၚ်တံ၊ ကလိလောန်နဇိုၚ်နတဲတံဒှ်တံ ဖံက်ပ္ကဝ်မံၚ် အခေါၚ်အရာကောန်ထံၚ်တံ နာနာသာ်ရ။
ပ္ဍဲထံၚ်စာတ်ဗဟဵုကျာ်မြဟ်ဂှ်တှ်ေ ကြဴနူဒပ်ကံၚ်ဇြဳပၞာန်တံ ထ္ၜးဟိုတ်နာနာရပ်ဒက်တုဲဂှ် ကောန်ထံၚ်ပရေၚ်ဍုၚ်ကွာန် ဒးဒုၚ်ဖျေံစၟတ်လဝ် ဒုဟ်ဒဏ်ထံၚ် နွံမံၚ် ဟွံအောန်နူကဵု (၄၀၀)ရဂှ် ဂွံတီကေတ် အတိုၚ်လဟီုညးရီုဗၚ်ကဵုမံၚ် ပရေၚ်ကောန်ထံၚ်ပရေၚ်ဍုၚ်ကွာန်တံ လဴထ္ၜးလဝ်ဂှ်ရ။
အတိုၚ်တၚ်နၚ် ကောန်ယက်ကောန်ထံၚ်ပရေၚ်ဍုၚ်ကွာန်အလုံဍုၚ်ဗၟာ (PPNM)ဂှ်မ္ဂး ပ္ဍဲသၞာံ ၂၀၂၃တုဲကၠုၚ်တေံ နူကဵုထံၚ်စာတ်နာနာအလုံဍုၚ်တံဂှ် ဟိုတ်နူဟွံဂွံအခေါၚ်လွဳတ်ဂဥုဲတုဲ ကောန်ထံၚ်တြုံ၊ဗြဴ ပရေၚ်ဍုၚ်ကွာန် ဒးချိုတ်အာလဝ် (၁၇)တၠရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်မ်
ဗီု-Social Media