ၜဳကလေၚ်၊ ဂျာန္နဝါရဳ ၁၈
ဟိုတ်နူပရေၚ်ဗ္တိုက်လွဟ်ဇၞော် ကေုာံ တရဴကျာ ဒပ်ကံၚ်ဇြဳပၞာန် အပ္ဍဲကွာန်ဝေန်တာပါန် ပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ်တုဲ ကျာ်စေတဳမွဲတၞုၚ်၊ စမြိုၚ်ဘာသာမွဲမ ကေုာံ သ္ၚိမၞိဟ်ဒၟံၚ် ၇ မ ဇီုကပိုက်လီုလာ်လဝ်ဂှ် ပ္ဍဲဂိတုဂျာန္နဝါရဳ ၁၇ တေံ ခရိုၚ်သဓီု KNU လလောၚ်ပ္တိတ်လဝ်ရ။
တုဲကၠုၚ် ပ္ဍဲဂိတုဂျာန္နဝါရဳ ၁၅ အခိၚ်ဗ္တံ ၜိုတ် ၈ နာဍဳဂှ် နူကဵုတမ်ဒပ် ခမရ ကံၚ်ဇြဳပၞာန် စၟတ် (၃) ဂှ် ပန်ပှော်စုတ်လဝ် လွဟ်ဇၞော် ဗ္ဒါဲကွာန်ဝေန်တာပါန်ဂှ်တုဲ ဘာလကျာ်(သာလည်ထ) ကေုာံ ကျာ်စေတဳမွဲတၞုၚ် ဒးမကမ်လွဟ်ဇၞော် လီုလာ်အာလဝ်ရ။
သ္အာၚ်နူဂှ်ပၠန် အပ္ဍဲဂိတုဒဳဇြေမ်ဗာ ၂၆ ကဵု ၃၁ ဂှ် ဒပ်ကံၚ်ဇြဳပၞာန် ဟိုတ်နူကၠောန်သ္ပဗ္တိုက်လဝ် ကဵုက္ၜၚ်ကျာ ကေုာံ လွဟ်ဇၞော်တံဂှ်တုဲ သ္ၚိဒၟံၚ်ညးဒေသ မၞုံကွာန်ဝေန်တာပါန် ၇ မ ဇီုကပိုက်လီုလာ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြးဂှ်ရ။
စနူဂိတုဒဳဇြေမ်ဗာ ၁၃ တုဲကၠုၚ်တေံတုဲ ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံကဵု ဂကောံဒပ်စဵုဒၞါကောန်ဂကူကရေၚ် KNDO တံ လုပ်စိုပ်ဗ္တိုက်လဝ်တုဲ ပေါဲဗ္တိုက်ၜါလ္ပာ်တံ က္တဵုဒှ်ဒၟံၚ် လၟေၚ်ဒဒှ်တ္ၚဲရ။
အပ္ဍဲအခိၚ်ပေါဲဗ္တိုက် ဂိတုဂျာန္နဝါရဳ ၃ ဂှ်လေဝ် ဂကောံဒပ်ပံၚ်ကောံ KNDO တံ သီဂွံလဝ် ဓုပ်ဂွဳဒပ်ကံၚ်ဇြဳပၞာန် ကၠုၚ်ဖျေံလဝ် ဇွောံမ ကေုာံ လွဟ်လက်နက်မကမ် သွက်ဗ္ဒိုပ်ဒပ်ဝေန်တာပါန်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အပ္ဍဲပေါဲဗ္တိုက်သီဗ္ဒိုပ်ဝေန်တာပါန် မက္တဵုဒှ်ဒၟံၚ် လလအ်ပွိုၚ်မွဲဂိတုပြၚ်ဂှ် ပရေၚ်ဇီုကပိုက်ၜါလ္ပာ်ချိုတ်အာတံ နွံဒၟံၚ်တုဲ ဂကောံဒပ်ပံၚ်ကောံ KNDO တံလေဝ် ဘိုၚ်ကၟာတ်လဒဵုလဝ် ဗ္ဒိုပ်ကံၚ်ဇြဳပၞာန်ဂှ် ညးတာလျိုၚ်ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူပေါဲဗ္တိုက်ဗ္ဒိုပ်ဝေန်တာပါန်ဂှ်တုဲ ညးဍုၚ်ကွာန်ဒေသ ဗ္ဒါဲ ၁၅၀၀ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တုဲ အရီုဗၚ်ပရေၚ်ဗ္စာရဏာမၞိဟ်တံ နွံပၟိက်ဂၠိုၚ်တိုန်ကၠုၚ်ဂှ် ဂွံတီကေတ် ဇရေၚ်ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−KNU