မဝ်သကိုဝ်၊ ဂျာန္နဝါရဳ ၁၈
ယဝ်ရပေါဲပၞာန်ဆက်က္တဵုဒှ်ဒၟံၚ်အတိုၚ်ဏံမ္ဂး ဍုၚ်ယူကရုၚ် သ္ဂောံတန်တဴအာဂှ်ဝွံ အန္တရာယ်ဒးဂဗကဵု အရာမစၞေဟ်ပ္ကာန် ကလေၚ်ပလေဝ်ဟွံဂွံတံ နွံမာန်ရောၚ် သမ္မတရုယှာ ပူတေန် ဘပဠလဝ်ရ။
ကြဴနူသွေတ်သလာန် တုပ်စိုတ် သွက်ဂွံဒုၚ်တဲကၠောန်ဗဒှ် ကောံဓရီုစပ်ကဵုဂၠးတိ နကဵုတၚ်အာတ်မိက် သမ္မတယူကရုၚ် ဇြဳလာန်သကဳဂှ်တုဲဂှ် ပူတေန် ဟီုကၠုၚ်သာ်ဏံရ။
အစဳဇန် ယူကရုၚ် ကေုာံ ဍုၚ်ပလိုတ်တံ သဳကၠဳဒၟံၚ်ဂှ် ပူတေန် တးပါဲလဝ်တုဲ တၚ်နၚ်ညးတံ မပလေဝ်ဒၟံၚ် သွက်ဂွံအာတ်မိက်ဂှ်ဝွံ ဒှ်တၚ်အာတ်မိက် ဂွံဖ္ဍိုက်ဗပေၚ်ကဵု ဒှ်ဟွံမာန်တံရောၚ်ဂှ် သ္ဂးလဝ်ရ။
အခိၚ်လၟုဟ် ပၞာန်ကလေၚ်ဗ္တိုက်ယူကရုၚ် ဟွံအံၚ်ဇၞးဒၟံၚ်ဂှ် တီကၠးကၠုၚ်တုဲ အစဳဇန်ပရေၚ်ၜိုဟ်လလမ်ဂှ်လေဝ် နွံဒၟံၚ်ပ္ဍဲတဲရုယှာဟီုဂှ် ကၠးဖ္ဍးဒၟံၚ်ရောၚ် ပူတေန် ဟီုရ။
ဒပ်ရုယှာဝွံ သီလဝ် တိဍာ်ယူကရုၚ် ၁၇ ဒဿမ ၅ တၟံကၠံတုဲ စပ်ကဵုတၠုၚ်လအာ ပေါဲပၞာန်ဂှ်တုဲ ဂလာန်ပူတေန်ဝွံ အရာမပတှ်ေဖျေံစိုတ်ဇကုဇကုတံ ဂၠိုၚ်ကၠုၚ်တုဲ သာတုဲသီုကဵုဂၠါဲတိုန်သၞတံရ။
သ္အာၚ်နူဂှ်ပၠန် တိဍာ်ဒပ်ရုယှာတံ သီဂွံလဝ်တံဂှ် စၟတ်လဝ် နဒဒှ်တွဵုဒၞက်ညးတံတုဲ ပွမပ္ညဳပ္ညပ် သွက်ဂွံဗလးထောံတဲတံဂှ်ဝွံ ဒှ်ဟွံမာန်ပုဟ်ဂှ် ပူတေန် ဟီုဂးလဝ်ဏီရ။
ပ္ဍဲကဵုဗီုပြၚ်ပရေၚ်ၜိုဟ်လလမ် လ္ပာ်ယူကရုၚ်တံ ပ္တိုန်ထ္ၜးလဝ်တံဂှ် သွက်ဂွံကလေၚ်ကေတ်ဂုဏ်သိက္ခာယူကရုၚ် စပ်ကဵုတိဍာ်တံဂှ်ကီု၊ သွက်ဂွံဒေါအ်ဒေၚ် ပရေၚ်ဗ္တိုက်တံဂှ်ကီု ကေုာံ ဒပ်ရုယှာတံ သွက်ဂွံဆုတ်ကလေၚ်ဂှ်ကီု တၚ်နၚ်တၞဟ်ဟ်တံလေဝ် နွံဒၟံၚ်ရ။
ပူတေန်ဂှ်တှ်ေ ယဝ်ရပ္ညဳပ္ညပ်မ္ဂး အကာဲအရာဂကောံဒပ်ဇကုတံ သီဂွံလဝ်တိဍာ် ပ္ဍဲဗလးတိဏံဂှ် ဒးချပ်စုတ်ကီုဏောၚ်ဂှ် ကဵုလဝ်သတိရ။
Ref: Reuters