မတ်မလီု၊ ဂျာန္နဝါရဳ (၁၈)
မူဝါဒကာဍုၚ်သ္အာၚ် ဍုၚ်ဇိုၚ်ဝုတ်ဒိုဟ်ကြုက် လ္တူဍုၚ်ဗၟာတံဂှ် ပရေၚ်အုပ်ဓလီု လ္တူအကာဲအရာပ္ဍဲဍုၚ် က္တဵုဒှ်မံၚ်လၟုဟ်တံ နွံမံၚ်ရဂှ် သမ္မတယာယဳ အလဵုသဳညဳသၟဟ်ဂကူ (NUG) ဒူဝါလယှဳလ ဟီုရ။
ဒူဝါလယှဳလ ဟီုဂးလဝ် ပ္ဍဲကောံဓရီုအလဵုသဳ အလဵုသဳညဳသၟဟ်ဂကူ (NUG) ကၠောန်ဗဒှ်လဝ် ပ္ဍဲဂိတုဂျာန္နဝါရဳ စၟတ်တ္ၚဲ(၁၆)ဂှ်ရ။
နကဵုအလဵုသဳညဳသၟဟ်ဂကူဂှ် သွက်ဂွံရပ်စပ် မူဝါဒကာဍုၚ်သ္အာၚ် ၚုဟ်က္တဵုဗၠးၜးတံကဵု ညံၚ်ဂွံရပ်စပ် လစွံစိုတ် ဟွံဒစဵုဒစး ကုလစွံစိုတ်ညးဍုၚ်ကွာန်တံဂှ် နွံပၟိက်ရဂှ် သ္ဂးရ။
သ္အာၚ်နူဂှ်ပၠန် အပ္ဍဲဒေသဂှ် ဒှ်ညးဓဇက်ဗက်ဗ္တဍုၚ်ဇၞော်ဇၞော်တံဟွံဂွံတုဲ ဒှ်ညးဗက်လက်ကရဴ ဍုၚ်ဇြဟတ်ဇၞော်ဂၠးကဝ်တံလေဝ်ဟွံဂွံတုဲ သွက်ဂွံဒတူလိုၚ် နကဵုဗီုပြၚ်ဇကုကဵုဇကုဂှ် နွံပၟိက်ရဂှ် သမ္မတယာယဳ ဒူဝါလယှဳလဂှ် ဟီုဏာလဝ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် နကဵုကြုက်တံ ပ္ဍဲပရေၚ်ပရူဒေသဒိုဟ်ဨသာန်ဂှ် လုပ်စိုပ်ပါလုပ်မံၚ် ပ္ဍဲပရေၚ်အပ္ဍဲဍုၚ်ဗၟာတံ လောန်နူကဵုသၞောတ်ဗ္ၜတ်ဍုၚ်နာနာတံဏီဂှ်ရ သမ္မတယာယီဂှ် ကဵုဂရိပ်အရေဝ် ထံက်ထ္ၜးလဝ်ရဂှ် သ္ၚဳဂၠိပ်လဝ်ရ။
“ဗွဲတၟေၚ် ပ္ဍဲပရေၚ်ပရူဒေသဒိုဟ်ဨသာန်တံဂှ် ပရေၚ်ကြုက်ပါလုပ်တံဂှ် ပ္ဍဲပရေၚ်ဆက်ဆောံ အကြာဍုၚ်မၞုံကဵုအဝဵုအပိုၚ်အခြာရေၚ်သ္ကအ်တံဂှ် ဟိုတ်နူစိုတ်ဒှ် ၜက်ကၠုၚ်စေဝ်ဂှ်ရ စပ်ကဵုကိစ္စဏံတုဲ ဟီုဂးကၠုၚ်ရဂှ် အဲစၟတ်ကေတ်ရ။ အရာဏံဂှ် ဒှ်အကာဲအရာဍာံစၟတ်တုဲ သီုကဵုဒှ်ပလာပ်ပထုဲ ပ္ဍဲပရေၚ်ပ္ဍဲဍုၚ်ဗၟာတံဂှ်ရ နကဵုကြုက်တံ သွက်ဂွံထိၚ်ဒဝ်ကိစ္စဏံဂှ် နွံပၟိက်ရ။ စပ်ကဵုကိစ္စဏံတုဲ ပရေၚ်ကြုက်ပါလုပ်ပလာပ်ပထုဲတံဂှ် ၜက်အာသၞောတ်ဗ္ၜတ်ဍုၚ်နာနာတံတုဲ ဟိုတ်နူဒှ်ပလာပ်ပထုဲ ကုပရေၚ်ပ္ဍဲဍုၚ်ဗၟာတံဂှ်ရ ကဵုဂရိပ်အရေဝ် ထံက်ထ္ၜးလဝ်ရ” သာ်ဝွံ သ္ဂးရ။
ပ္ဍဲပရေၚ်ပြုပြေၚ်ပၞာန် ၁၀၂၇ က္တဵုဒှ်မံၚ် ပ္ဍဲရးသေံသၟဝ်ကျာ မဒှ်ဒေသဒိုဟ်ဨသာန်ဍုၚ်ဗၟာဂှ် ဟိုတ်နူအလဵုသဳကြုက်တံ လုပ်ပ္ညဳပ္ညပ်ကဵုအကြာတုဲ ပရေၚ်ဆဵုဂဗသဳကၠဳ အကြာကံၚ်ဇြဳပၞာန်တံကဵု ဂကောံမဟာမိတ်ကောဒေံပိဂကောံတံ နွံကၠုၚ်လဝ် စဵုကဵုမရနုက်ကဵုအလန် တတိယရ။
သမ္မတယာယဳ ဒူဝါလယှဳလဂှ်တှ်ေ ဍာ်ဒဳပရေၚ်ပၠန်ဂတးပ္ဍဲဍုၚ်တံဂှ် ပ္ဍဲအကြာအပြံၚ်အလှာဲ ကတာ်သၠဒ္ကေဝ်ပရေၚ်ဍုၚ်ကွာန်ဂၠးကဝ်ဂှ် သၠုၚ်သဝ်တိုန်စှ်ေလေပ်တုဲ ဗလးထောံမတ်ကဵု တၚ်ပ္တဝ်က္ဍိုပ်တံဟွံဂွံပုဟ်ဂှ် သ္ဂးရ။
ပရေၚ်ဆက်ဆောံ “မိတ်သဟာဲကောဒေံ” ဍာံစၟတ်ကုကြုက်မပါလုပ် သွက်ဂွံဒှ် ဍုၚ်ဇိုၚ်ဝုတ်ဒိုဟ်ခိုဟ်သွက်ကြုက်ဂှ် ဂ္စာန်အာလၟိုန်ရောၚ်တုဲ ထံက်ဂလာန် ကုမူဝါဒကြုက်မွဲဍုၚ်ဓဝ်ဟေၚ်တုဲ စဵုဒၞါအာပရေၚ်ပိုန်ဒြပ်ကြုက် မၞုံပ္ဍဲဍုၚ်တံရောၚ်ဂှ် ပ္ဍဲဂိတုဂျာန္နဝါရဳ စၟတ်တ္ၚဲ(၁)ဂှ် NUG ကဵုလဝ်သမ္တီ လစွံစိုတ်လ္တူကြုက်တံရ။
ကံၚ်ဇြဳပၞာန်ဂှ်လေဝ် ဆက်ထိၚ်ဒဝ်အာ ပရေၚ်ဆက်ဆောံ မိတ်သဟာဲကောဒေံ ဍုၚ်ဇိုၚ်ဝုတ်ဒိုဟ်ခိုဟ်ဂှ်ရောၚ်တုဲ ထံက်ဂလာန်ကုမူဝါဒကြုက်မွဲဍုၚ်ဓဝ်တံရောၚ်ဂှ် ပ္ဍဲဂိတုဂျာန္နဝါရဳ စၟတ်တ္ၚဲ(၁၅)ဂှ် ဌာနကာဍုၚ်သ္အာၚ် လလောၚ်ပ္တိတ်လဝ်ရ။
ပရိုၚ်-သြၚ်လောန်တိုၚ်မ်