တၞၚ်သြဳ၊ ဂျာန္နဝါရဳ (၁၈)
ဗ္ဒိုပ်ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲရးတၞၚ်သြဳ၊ ပွိုၚ်ဍုၚ်တၞၚ်သြဳ၊ ပ္ဍဲကွာန်ညံၚ်ပေန်ကွေန် (၂)ဗ္ဒိုပ် ဒးဒုၚ်ဗ္တိုက်တုဲ ကောန်ဒပ်ကံၚ်ဇြဳပၞာန် (၂)တၠ ဒးချိုတ်လဝ်ရဂှ် တမ်ဒပ်စၟတ်(၂) ခရိုၚ်ဗိက် လလောၚ်တြးလဝ်ရ။
တုဲကၠုၚ် ဂိတုဂျာန္နဝါရဳ စၟတ်တ္ၚဲ(၁၅) ၜိုတ်အခိၚ် (၆)နာဍဳနူဂယးဂှ် ဒပ် ခမရ- ၅၆၁ ဖျေံသ္ဇိုၚ်ညံၚ်ပေန်ကွေန်ကဵု သၞေဟ်ကၚ်စၟဳတ် ဒဒန်ကွာန်ညံၚ်ပေန်ကွေန်ဂှ် ကရောၚ်ပၞာန်ပံၚ်ကောံစဵုဒၞါညးဍုၚ်ကွာန်(၁)တံ လုပ်စိုပ်ဗ္တိုက်လဝ်ရ။
ဟိုတ်နူပေါဲဗ္တိုက်ဂှ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် ဗ္ဒါဲပွိုၚ်(၃)နာဍဳတုဲ ကောန်ဒပ်ကံၚ်ဇြဳပၞာန် (၂)တၠ ချိုတ်တုဲ လ္ပာ်ကရောၚ်ပၞာန်ပံၚ်ကောံ စဵုဒၞါညးဍုၚ်ကွာန်တံဂှ် ကောန်သ္ဂံၚ် (၂)တၠ ကလိဂွံလဝ်ဝပ်ရဂှ် ညးတာလျိုၚ်လလောၚ်ပရိုၚ် တမ်ဒပ်စၟတ်(၂) ခရိုၚ်ဗိက် ဟီုကဵုသြၚ်လောန်တိုၚ်မ်ရ။
သ္အာၚ်နူဂှ်ပၠန် ဟိုတ်နူကံၚ်ဇြဳပၞာန်ပန်ပှော်လွဟ်ဇၞော်ကြာန်န် ပ္ဍဲပေါဲဗ္တိုက်တံဂှ်တုဲ ကောန်အရာပ်(၂)တၠ ကလိဂွံလဝ်ဝပ်တုဲ သ္ၚိဒၟံၚ် (၃)မလေဝ် ဇီုကပိုက်လီုလာ်အာလဝ်ရ။
ဂိတုဂျာန္နဝါရဳ စၟတ်တ္ၚဲ(၁၆) အခိၚ်ဗ္တံ ၜိုတ်(၉)နာဍဳဂှ်လေဝ် ဂကောံပံၚ်ကောံ စဵုဒၞါညးဍုၚ်ကွာန်တံ ထပ်ဗ္တိုက်လဝ် သၞေဟ်ကၚ်စၟဳတ် ဒဒန်ညံၚ်ပေန်ကွေန်ဂှ်ရ တမ်ဒပ် ခမရ-၅၆၁ ဖျေံသ္ဇိုၚ်ညံၚ်ပေန်ကွေန်ဂှ် ကၠောန်သ္ပမံၚ် ပရေၚ်ပန်ပှော်လွဟ်ဇၞော်ကြာန်န်တံ စဵုကဵုအခိၚ်တ္ၚဲဏံရ။
ဟိုတ်ပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်ကြာန်န်တံဂှ်တုဲ ညးဒေသနူကွာန်ညံၚ်ပေန်ကွေန်၊ ဍာ်ဗု၊ ယှာန်အေန်ဒဝ်မပါလုပ် နူကွာန်ဗ္ဒါဲဗ္ဒါဲတံ ဒးဂြိပ်ဒဴပါဲဓလေတ်ဒၟံၚ် ဒၞါဲဗၠးဘဲရဂှ် ညးတာလျိုၚ်လလောၚ်ပရိုၚ် ပကဖတၞၚ်သြဳ ဟီုရ။
ပ္ဍဲပွိုၚ်ဍုၚ်တၞၚ်သြဳ ပရေၚ်ပၞာန်ၜါလ္ပာ်ကြံၚ်မ္ၚိုဟ်မံၚ်ဂှ် ပေါဲဗ္တိုက်တံ အခိၚ်ဟွံရုဲ က္တဵုဒှ်ကၠုၚ်မာန်မံၚ်ဂှ်ရ နကဵုညးဍုၚ်ကွာန်တံ သွက်ဂွံစွံသတိပရေၚ်ပၞာန်တံကဵု သွက်ဂွံရံၚ်စံၚ်ကဵုပရေၚ်ဂီုကၠီု ညးဍုၚ်ကွာန်အာတရဴတံအိုတ်ညိဂှ် ကဵုသမ္တီဖ္တိုက်ဖ္အောဝ်လဝ်ရ။
တုဲကၠုၚ်ပ္ဍဲသၞာံ ၂၀၂၃ ပ္ဍဲဂိတုဒဳဇြေန်ဗာဂှ် ဟိုတ်နူပရေၚ်ဗ္တိုက် ဒပ်စဵုဒၞါညးဍုၚ်ကွာန်ဒေသတံတုဲ ကောန်ဒပ်ကံၚ်ဇြဳပၞာန် ဟွံအောန်နူကဵု (၈၉)တၠ ဒးချိုတ်လဝ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံသုတေသန FE5 Tanintharyi ရ။
ပရိုၚ်-သြၚ်လောန်တိုၚ်မ်
ဗီု- တမ်ဒပ်(၂) ခရိုၚ်ဗိက်