ကျံက်ကျဳ၊ ဂျာန္နဝါရဳ (၁၉)
ဒပ်ကံၚ်ဇြဳပၞာန် လုပ်စိုပ်ကၠုၚ် ပ္ဍဲကွာန်အနာန်ဗဝ် ပွိုၚ်ဍုၚ်ကျံက်ကျဳ၊ ဒပ်မဟာ(၃) ခရိုၚ်ညံၚ်လေဝ်ပေန်၊ ဗော်သွးကောန်ဂကူကရေၚ် (KNU)ဂှ် ရပ်ဒက်ပြိုက်ဂစိုတ်ဏာလဝ် ကောန်အရာပ်(၄)တၠရဂှ် (KNU)ဗဟဵု လလောၚ်ပ္တိတ်လဝ် ပ္ဍဲဂိတုဂျာန္နဝါရဳ စၟတ်တ္ၚဲ (၁၈)ဂှ်ရ။
ဒပ်ကံၚ်ဇြဳပၞာန်ဂှ် တုဲကၠုၚ်ပ္ဍဲဂိတုဂျာန္နဝါရဳ စၟတ်တ္ၚဲ(၁၆) အခိၚ်သဝ်တ္ၚဲ ၜိုတ်(၃)နာဍဳဂှ် လုပ်စိုပ်ကၠုၚ် ပ္ဍဲကွာန်အနာန်ဗဝ်တုဲ ရပ်ဒက်ပြိုက်ဂစိုတ်လဝ် ညးဒေသ မံၚ်ဇြဝ်မေန်တုၚ်၊ မံၚ်ဖိုဝ်ဇြဝ် မပါလုပ် (၄)တၠဂှ် ဂွံတီကေတ် အတိုၚ်တၚ်လလောၚ်တြးရ။
ဟိုတ်နူပွပကီုပရာပ်ဒပ်ကံၚ်ဇြဳပၞာန်တံတုဲ ညးဍုၚ်ကွာန်ဒေသ နူကွာန်အနာန်ဗဝ်တံ ဒးဂြိပ်ဒဴပါဲဓလေတ်မံၚ် အလုံကွာန်မွဲတုဲ ပ္ဍဲကွာန်ဂှ် ကောန်ဒပ်ကံၚ်ဇြဳပၞာန်တံသၟးရ သှ်ေမံၚ်ရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးရ။
ပ္ဍဲတ္ၚဲဂှ်ရ နူကဵုတမ်ဒပ်ယှိုဲဝါကံၚ်ဇြဳပၞာန်တံဂှ် ဟိုတ်နူပန်ပှော်လဝ်လွဟ်ဇၞော် ပ္ဍဲကွာန်အနာန်ဗဝ်ဂှ်တုဲ မၞိဟ်ဗြဴမွဲတၠ ကေုာံ မၞိဟ်တြုံမွဲတၠတံ ဒးလွဟ်လက်နက် ဒးချိုတ်အာလဝ်ရဂှ် ဂွံတီကေတ် အတိုၚ်တၚ်လလောၚ်တြး KNUရ။
တုဲကၠုၚ်ပ္ဍဲဂိတုဂျာန္နဝါရဳ စၟတ်တ္ၚဲ(၁၄) အခိၚ်သဝ်တ္ၚဲ(၆)နာဍဳဂှ် ပ္ဍဲတိဍာ်အုပ်ဓုပ် KNU ပွိုၚ်ဍုၚ်ကျံက်ကျဳဂှ် ဒပ်ကံၚ်ဇြဳပၞာန် ဖျေံသ္ဇိုၚ်ပုၚ်ဇြလုက်(ပိန်းဇလုပ်) ခလရ-၂၆၄ တံ ပန်ပှော်စုတ်လဝ်လွဟ်ဇၞော် ၁၂၀မမ ပ္ဍဲကွာန်ဖိုဝ်တ (၄)မရဂှ် ပါလုပ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် ပ္ဍဲဂိတုဂျာန္နဝါရဳ စၟတ်တ္ၚဲ(၁၅) အခိၚ်ဗ္တံ(၈)နာဍဳဂှ် ပန်ပှော်စုတ်လဝ်လွဟ်ဇၞော် ပ္ဍဲကွာန်ၚဖေဝ်အေန် မွဲမတုဲ ဒပ်ကံၚ်ဇြဳပၞာန်နူနာတ်ဒါန်ကွေန်တံဂှ် ပန်ပှော်စုတ်လဝ် လွဟ်ဇၞော် (၈၁)မမ ပ္ဍဲကွာန်ဖိုဝ်တမွဲမ၊ ပ္ဍဲအခိၚ်ဗ္တံ (၉)နာဍဳဂှ် ဒပ်ခလရ-၂၆၄ ဂှ် ပန်ပှော်စုတ်လဝ် လွဟ်ဇၞော် (၁၂၀)မမ ပ္ဍဲကွာန်အလေဝ်(အလယ်) (၂)မရဂှ် ပါလုပ်လဝ်ရ။
ပ္ဍဲခရိုၚ်ညံၚ်လေဝ်ပေန် (KNU)ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတး (KNLA)တံ ပေါဲဗ္တိုက်ၜါလ္ပာ် သ္ကာတ်မြဟ်မံၚ်တုဲ ဟိုတ်နူပွပန်ပှော်လွဟ်ဇၞော် ကေုာံ ပရေၚ်ဗ္တိုက်တရဴကျာဒပ်ကံၚ်ဇြဳပၞာန်တံကဵု ပွက္လိလောန်ဖံက်ပ္ကဝ်အခေါၚ်အရာမၞိဟ်တံတုဲ ညးဒေသဗွဲမဂၠိုၚ်ဂၠေၚ်တံ ဒးဂြိပ်ဒဴပါဲဓလေတ်မံၚ် ဒၞါဲဗၠးဘဲတံရ။