တဳဟဳရာန်၊ ဂျာန္နဝါရဳ ၁၉
ပေါဲဗ္တိုက်ဂါဇြာဒေါံမ္ဂး ဒေါံဒေၚ်အာကဵု ပရေၚ်မဟာမိတ်တံ ဗ္တိုက်မံၚ် ကုအေဿရေတံဏောၚ်ဂှ် ဝန်ဇၞော်ကာဍုၚ်သ္အာၚ်အဳရာန်ဟီုလဝ်တုဲ ဟိုတ်နူပေါဲဗ္တိုက်ဏံတုဲ ပ္ဍဲသ္ကုတ်ဗၟံက်လ္ဒေါဝ်တံဂှ် ပရေၚ်ကြံၚ်မ္ၚိုဟ်တံ သာတုဲသၠုၚ်တိုန်ကၠုၚ်မာန်ရောၚ် ကဵုလဝ်သတိရ။
ဂကောံဟာမာသ်ဂှ် အဳရာန်တံ ရီုဗၚ်ကဵုဒၟံၚ်တုဲ အေဿရေ ကလိလောန်ဒၟံၚ် အမှုရာဇဝတ်ဏောၚ် စောတ်စောဲလဝ်တုဲ သီုအမေရိကာန် ရီုဗၚ်ကဵုမံၚ်ဏောၚ်ဂှ်လေဝ် သ္ဂးရ။
ယဝ်ခါရဒေါံဒေၚ်ထောံ ပွဂစိုတ်ကမၠက်ဂကူ ပ္ဍဲဂါဇြာတံမ္ဂး ပွချဳဒရာၚ်ပၞာန် ပ္ဍဲဒေသတံဒေါံဒေၚ်အာရောၚ်မဒှ်တုဲ ပဋိပက္ခပ္ဍဲဒေသတံလေဝ် ဒေါံဒေၚ်အာရောၚ်ဂှ် ဝန်ဇၞော်ကာဍုၚ်သ္အာၚ်အဳရာန် အမဳရက်ဒိုဝ်လာဟဳယာန်ဂှ် ဟီုဂးလဝ် ပ္ဍဲဖိုရာမ်ပရေၚ်ပိုန်ဒြပ်ဂၠးကဝ် ကၠောန်ဗဒှ်ဒၟံၚ် ပ္ဍဲသွေတ်သလာန်ဂှ်ရ။
ပရေၚ်ဂီုကၠီုၜဳဗ္ကေတ်ဂှ် ဆက်စပ်ဒၟံၚ်ကဵု ပရေၚ်ဖောအ်ဗြေဝ်တဴတက် ဒေသဂါဇြာတုဲ ပေါဲဗ္တိုက်အေဿရေတံ ဟွံဒေါံမ္ဂး ဇၟာပ်မၞိဟ်ဒှ်ဒဒိုက်ဏောၚ်တုဲ ဂကောံဒပ်တံလေဝ် ဆက်ချဳဒရာၚ်မံၚ်ဏီဏောၚ်ဂှ် ညးဟီုလဝ်ဏီရ။
ပ္ဍဲသတ္တာဟတုဲကၠုၚ်တေံ ကုညးသပုန်ဟူတဳ မၞုံယဳမေန် အဳရာန်ကဵုလဝ်အထံက်အရီု လ္ပာ်လက္ကရဴဂှ် ကြဴနူအမေရိကာန်ကေုာံ ဗျိတိၚ်တံ ကၠောန်သ္ပပရေၚ်ဗ္တိုက်တုဲဂှ် သမ္မတအမေရိကာန် ဂျဵုဗိုၚ်ဒေန် ထပ်လလောၚ်တြးလဝ်ဂကောံဏံ နဒဒှ် ဂကောံပကီုပရာပ်ရ။
ဂကောံဟူတဳဂှ် ဒတူလိုၚ်မံၚ် မွဲကရောံကဵုပါလက်သတိုၚ်တံရောၚ် သ္ဂးလဝ်တုဲ ဗ္တိုက်ဒၟံၚ် က္ၜၚ်ဖ္ဍိုက်ကပေါတ်တတ်ကၠောံအာကၠုၚ်ဒၟံၚ် ၜဳဗ္ကေတ်တံရ။
သ္အာၚ်နူဂှ်ပၠန် အဳရာန်တံ ဗ္တိုက်လဝ် ဌာနထံၚ်ပရိုၚ်အေဿရေ ဖျေံသ္ဇိုၚ်ဍုၚ်အဳရာတ်ရဂှ် ဟီုဂးလဝ်ကီုလေဝ် အေဿရေဂှ် ဌာနထံၚ်ပရိုၚ်ညးတံဒၞါဲဂှ် ဟွံမွဲပုဟ်ဂှ် ကယျာန်ပါဲလဝ်ရ။
ပ္ဍဲဒေသကာဒ် ဂွံလဝ်အခေါၚ်အုပ်ဓုပ်အပိုၚ်ဂှ် စပ်ကဵုပရေၚ်ချဳဒရာၚ်ထံၚ်ပရိုၚ်အေဿရေတံတုဲ အဳရာန်တံ ပလံၚ်ကဵုဒၟံၚ်တၚ်နၚ်ပရိုၚ် ကုအဳရာတ်တံရဂှ် ဝန်ဇၞော်ကာဍုၚ်သ္အာၚ်အဳရာန် ဟီုရ။
Ref: Yahoo news