ဒုၚ်ဇြယေတ်၊ ဂျာန္နဝါရဳ (၁၉)
ဟိုတ်နူဗ္ဒိုပ်ဗၠာဲသၟိၚ် ဍုၚ်ဒုၚ်ဇြယေတ်၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန် ဒးဒုၚ်ဗ္တိုက်တုဲ ပရေၚ်ဇီုကပိုက်ချိုတ်တံနွံမာန်ရဂှ် ဂွံတီကေတ် အတိုၚ်တၚ်လလောၚ်တြး ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံရ။
တုဲကၠုၚ်ပ္ဍဲဂိတု ဂျာန္နဝါရဳ စၟတ်တ္ၚဲ(၁၇) အခိၚ်နူဂယး (၈)နာဍဳဂှ် ဂကောံဒပ်ဒမၠုက်တၟေၚ်လ္တူဍုၚ် Gods Of Death (G.O.D)တံကဵု ဂကောံဒပ်ပံၚ်ကောံ Yangon Eagles တံ ကၠုၚ်စိုပ်ပန်ပှော်ဗ္တိုက်လဝ် နကဵုလွဟ်ဇၞော် (၄၀)မမတံရ။
ပ္ဍဲပရေၚ်ဗ္တိုက်ဏံဂှ် ဟိုတ်နူမဗမ် (၄၀)မမတံ ဒတုံဗ္တိုဟ်ထ္ကးလဝ် ပ္ဍဲဗ္ဒိုပ်ဗၠာဲသၟိၚ်တဴဂှ်ရ ကောန်ဒပ်ဗၠာဲသၟိၚ်(၂)တၠ ချိုတ်အာလဝ်ရဂှ် လ္ပာ်ဂကောံဒပ်ပံၚ်ကောံတံ လလောၚ်ပ္တိတ်လဝ်ကီုလေဝ် နကဵုသြၚ်လောန်တိုၚ်မ် သ္ပဒတန်တၞဟ်ခြာဟွံမာန်ဏီရ။
အတိုၚ်လဟီုညးဒေသတံဂှ်မ္ဂး ပ္ဍဲပရေၚ်ဗ္တိုက်ဗ္ဒိုပ်ဗၠာဲသၟိၚ်တံဂှ် နူကဵုလ္ပာ်ဗ္ဒိုပ်ဗၠာဲသၟိၚ်တံ ကညာၚ်ကရေဲလက်ကလေၚ်ပန်ပှော်ဗ္တိုက်လဝ်တုဲ အပ္ဍဲဗ္ဒိုပ်တံဂှ် ဂွံမိၚ်ကေတ်ရမျာၚ်ဟီုဂးမံၚ် ဇီုကပိုက်က္လိဂွံဝပ်ရဂှ် သ္ဂးရ။
ညးတြုံ ဒးကဝေက်မာၚ်ကလိဂွံလဝ်ဝပ်ဂှ် နကဵုအရီုဗၚ် ဂကောံရီုဗၚ်ပရေၚ်မၞိဟ်တံဂှ် ပလံၚ်ဗ္စိုပ်ကဵုလဝ် ရုၚ်ဂဥုဲပွိုၚ်တိုက်ဒုၚ်ဇြယေတ်ရ။
တုဲကၠုၚ်ပ္ဍဲဂိတုဂျာန္နဝါရဳ စၟတ်တ္ၚဲ(၁၆)ဂှ်လေဝ် ဟိုတ်နူပွပန်ပှော်လွဟ်ဇၞော် နူကဵုဒပ်အမၠံက်ကံၚ်ဇြဳပၞာန်ဖျေံသ္ဇိုၚ်ဒုၚ်ဇြယေတ်တံ ဒတုံဗ္တိုဟ်ထ္ကးအာလဝ် ပ္ဍဲကွာန်(သုံးခွ)ဂှ်ရ သၟတ်ညးဒေသ(၂)တၠ ဒးကဝေက်မာၚ်ကလိဂွံလဝ်ဝပ်ရ။
ဗ္ဒိုပ်ဗၠာဲသၟိၚ်ဒုၚ်ဇြယေတ်ဂှ် ပ္ဍဲကာလသီအဝဵုဏံ ဒးဒုၚ်ဗ္တိုက်လဝ် ဟွံအောန်နူကဵု(၇)ဝါတုဲ ပ္ဍဲပရေၚ်ဗ္တိုက်ဏံဂှ် ကောန်ဂကောံဒပ်ကံၚ်ဇြဳပၞာန်လ္ၚဵုတံ ဇီုကပိုက်ကလိဂွံဝပ်တံ နွံမံၚ်ရဂှ် ဂွံကေတ်ကေတ် နူညးစုက်လုက်ကဵုကံၚ်ဇြဳပၞာန်တံရ။
ပရိုၚ်-သြၚ်လောန်တိုၚ်မ်
ဗီု-CJ