ထဝါဲ၊ ဂျာန္နဝါရဳ(၁၈)
ပ္ဍဲပါၚ်ဂၠံၚ်လုပ်ဍုၚ်ထဝါဲ ရးတၞၚ်သြဳ ဗ္ဒါဲကွာန်မံၚ်မေဝ်ယှံၚ်ဂှ် ကြဴနူပေါဲဗ္တိုက် အကြာဒပ်ကံၚ်ဇြဳပၞာန်ကဵု ဒပ်စဵုဒၞါညးဍုၚ်ကွာန်တံ က္တဵုဒှ်တုဲဂှ် ညးဒေသဂၠိုၚ်ကဵုစှော် ဒးဒုၚ်ရပ်ဒက်လဝ်ရဂှ် ဂွံတီကေတ် အတိုၚ်လဟီုညးဒေသတံရ။
တ္ၚဲဏံ ဂိတုဂျာန္နဝါရဳ စၟတ်တ္ၚဲ(၁၈) အခိၚ်နူဂယး ၜိုတ်(၈)နာဍဳကဝက်ဂှ် အကြာဒပ်ကံၚ်ဇြဳပၞာန် ချဳဒရာၚ်မံၚ်ကရောၚ်ပၞာန် ဗ္ဒါဲကွာန်မံၚ်မေဝ်ယှံၚ်တံကဵု ဒပ်စဵုဒၞါညးဍုၚ်ကွာန်တံ ပေါဲဗ္တိုက်က္တဵုဒှ်လဝ် ပွိုၚ်မွဲနာဍဳပြၚ်ရ။
ကြဴနူပေါဲဗ္တိုက်က္တဵုဒှ်တုဲ ဒပ်ကံၚ်ဇြဳပၞာန် လုပ်ကၠုၚ်ပ္ဍဲကွာန်မံၚ်မေဝ်ယှံၚ်ဂှ် တိုန်သ္ၚိမွဲစှ်ေသ္ၚိမွဲတုဲ ဗက်ရပ်ဒက်လဝ် ညးဒေသပ္ဍဲကွာန်တံဂှ်ရ။
ကြဴနူဂှ်တုဲ ဒပ်ကံၚ်ဇြဳပၞာန်တံ ညးဒေသရပ်ဒက်လဝ်တံဂှ် ကဵုဂ္ဇအ်ပ္ဍဲကျာ် (ရှၚ်ဓါတ်ဝဲ) မၞုံလ္ဒေါဝ်ကွာန်ဂှ်တုဲ ကၠောန်သ္ပပွသၟာန်သၟုက်စၟဳတ်တံတုဲ အခိၚ်လ္ဒေါဝ်တ္ၚဲ ၜိုတ်(၁၂)နာဍဳဂှ် ကလေၚ်ဗလးကဵုလဝ်ရဂှ် ညးဒေသတံ ဟီုရ။
ဒပ်ကံၚ်ဇြဳပၞာန် ကလေၚ်တိတ်အာကရောၚ်ပၞာန်တံဂှ် ကေတ်ဏာလဝ်ကွဳလိုန်ဓါတ် နူကွာန်မံၚ်မေဝ်ယှံၚ် ဟွံအောန်နူ(၇)ဖ္ဍိုက်ရဂှ် သ္ဂးရ။
ပ္ဍဲပေါဲဗ္တိုက်ဗ္ဒါဲဍုၚ်ထဝါဲဂှ် လ္ပာ်ကံၚ်ဇြဳပၞာန်တံ (၁)တၠချိုတ်တုဲ မၞိဟ်တြုံဒေသမွဲတၠလေဝ် ဒးမကမ်ကလိဂွံလဝ်ဝပ်ရဂှ် ဂွံတီကေတ်ရ။
ဟိုတ်နူပေါဲဗ္တိုက်ၜါလ္ပာ်တုဲ ဂၠံၚ်ကွဳစက် လ္ဂုၚ်-ထဝါဲ ကၟာတ်ဆိုအ်အာလဝ် ပွိုၚ်မွဲနာဍဳပြၚ်တုဲ ၜိုတ်အခိၚ်လ္ဒေါဝ်တ္ၚဲဂှ် ကလေၚ်အာကၠုၚ်မံၚ် အတိုၚ်သၞောတ်တြေံအိုတ်ရဂှ် ဂွံတီကေတ် အတိုၚ်လဟီုညးအာတရဴတံရ။
တုဲကၠုၚ်ပ္ဍဲဂိတုနိုဝေန်ဗာဂှ်လေဝ် ဗ္ဒါဲသၞေဟ်ကၚ်ကျာ်လမ္စံက်(ဘုရားမဲ) ကွာန်မံၚ်မေဝ်ယှံၚ်ဂှ် အကြာဒပ်ကံၚ်ဇြဳပၞာန်ကဵု ဒပ်PDFတံ ပေါဲဗ္တိုက်က္တဵုဒှ်လဝ် ၜါတ္ၚဲဆက်က်ဏီရ။
ပရိုၚ်-သြၚ်လောန်တိုၚ်မ်
ဗီု-Social Media