မတ်မလီု၊ ဂျန္နဝါရဳ(၁၉)
ပ္ဍဲသၞာံဘဏ္ဍာဏံ သွက်ဂွံပလံၚ်ပ္တိုန်ဍုၚ်မ္ၚး လျိုၚ်တာန်ထၜိုတ်ပိကိုဋ်မာန် စၟဳစလဝ်ရဂှ် ဂကောံတဵုလွဳကၠောန်ပ္တိတ်ထၜိုတ်ဍုၚ်ဗၟာတံ ဟီုဂးလဝ်ကီုလေဝ် ဒှ်ကၠုၚ်နတဲဟွံမာန်ရဂှ် တၠကမၠောန်ထၜိုတ်တံ ထံက်ထ္ၜးဟီုဂးလဝ်ရ။
ဍုၚ်ဗၟာဂှ် လၟေၚ်သၞာံ လျိုၚ်တာန်ထၜိုတ် တိတ်ဒၟံၚ် ဗ္ဒါဲ(၄)ကိုဋ်တုဲ ပ္ဍဲသၞာံဘဏ္ဍာတုဲကၠုၚ်တေံဂှ် ပလံၚ်ပ္တိုန်လဝ်ဍုၚ်မ္ၚး လျိုၚ်တာန်ထၜိုတ် မွဲကိုဋ်ပြၚ်တံမာန်လဝ်ရ။ ပ္ဍဲသၞာံဘဏ္ဍာဏံဂှ်တှ်ေ ပလံၚ်ပ္တိုန်အာ လျိုၚ်တာန်ထၜိုတ် (၃)ကိုဋ်ရောၚ်ဂှ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒ ကံၚ်ဇြဳပၞာန် ပ္တိတ်လဝ် ပ္ဍဲဂိတုဂျာန္နဝါရဳ စၟတ်တ္ၚဲ(၁၇)ဂှ်ရ။
အတိုၚ်လဟီု လိက်ပရိုၚ်တြးဝါဒကံၚ်ဇြဳပၞာန်တံဂှ်မ္ဂး ပ္ဍဲသၞာံဘဏ္ဍာတုဲကၠုၚ်တေံ ပလံၚ်ပ္တိုန်ထၜိုတ်ဟွံမာန်ဂှ် ဟိုတ်နူမူဝါဒသြန်လှုဲတံတုဲ မွဲတာန်မ္ဂး ကျကၠုၚ်လဝ် နူ(၈)ကိုဋ်ဒ္ကေဝ် စဵုကဵု(၁၀)ကိုဋ်ဒ္ကေဝ်ရ။ ပြဟ်ဟ်ဏံဂှ်တှ်ေ ဟိုတ်နူကံၚ်ဇြဳပၞာန်တံ ယှအ်ကဵုလဝ်တုဲ သၟာဗၞိက်ပလံၚ်တံ ပ္လံၚ်ပ္တိုန်ထၜိုတ်မာန်ရဏောၚ်ဂှ် သ္ဂးရ။
တၠကမၠောန်ထၜိုတ်မွဲတၠဂှ်တှ်ေ တၚ်စၟဳပလံၚ်ပ္တိုန်ဍုၚ်မ္ၚး လျိုၚ်တာန်ထၜိုတ်(၃)ကိုဋ်တံဂှ် မ္ၚးနူပြဿနာတိဍာ်ဟွံဂီုကၠီုက္တဵုဒှ်မံၚ်လၟုဟ်တံဂှ် ဟိုတ်နူပေါဲဗ္တိုက်တံတုဲ ကၠအ်ထၜိုတ်တံ ခွာတ်ထၜိုတ်ဟွံမာန်ဂှ်ရ ဒှ်ကၠုၚ်နတဲဟွံမာန်တုဲ သွက်ဂွံပလံၚ်ပ္တိုန် ၅၀ တၟံကၠံဂှ် ဆၜိုတ်ဒှ်မာန်ရဂှ် ဟီုကဵုသြၚ်လောန်တိုၚ်မ်ရ။
“လျိုၚ်တာန်ထၜိုတ် ပိကိုဋ်ဂွံပေၚ်ဂှ် ဟွံလောဲပုဟ်။ သ္ဂောံဂွံ ၅၀ တၟံကၠံဂှ် ဆၜိုတ်မာန်ရ။ ဟိုတ်အဓိကဂှ်တှ်ေ အခိၚ်ကာလပ္လံၚ်ပ္တိုန်ဗၞိက်ပလံၚ်တံ လ္ဇုဲလ္ဇအာဂှ်မွဲ၊ တုဲပၠန်တှ်ေ ပရေၚ်ဂီုကၠီုတိဍာ်ဒေသရဏး။ အရာတံဏံလေဝ် ပါလုပ်မံၚ်ကီုရ။ ပ္ဍဲဏံဂှ် ဒေသဟွံညိၚ်ဝတ် ဒေသပရေၚ်ဂီုကၠီုဟွံညိၚ်ဝတ်တံဂှ်တှ်ေ ဒှ်အခက်ခုဲကွေံကွေံရ။ လ္ၚဵုတံဂှ် ဒှ်မံၚ်အကာဲအရာပံက်ဟွံမာန်လးလးတံလေဝ် နွံမံၚ်ရ။ ပ္ဍဲဒေသလ္ၚဵုတံဂှ် အကာဲအရာဟွံဂွံပံက်လးလးတံလေဝ် နွံမံၚ်ရ”ဂှ် သ္ဂးရ။
ကမၠောန်ထၜိုတ်တံဂှ် ပ္ဍဲကာလသီအဝဵုဏံ ဟိုတ်နူကောန်ကလောန်အောန်ကၠုၚ်ကီု၊ ဟိုတ်နူၚုဟ်ဝါဲကေုာံ ၚုဟ်အေတ်သေတ် မဒှ်ကပေါတ်တမ်ရိုဟ်တံ က္ဍၚ်တိုန်ကၠုၚ်ဂၠိုၚ်ကဵုဆဂှ်ရ ဒးဆေၚ်မံၚ်မုက်ကဵု ပြဿနာစရိတ်အိုတ်ကၠောန်ပ္တိတ် ဟွံရုမ်ဂပ်တံရ။
တၠကမၠောန်ထၜိုတ်မွဲတၠၠပၠန်ဂှ်လေဝ် ဟိုတ်နူပေါဲဗ္တိုက်အခိၚ်လၟုဟ်တံတုဲ ကၠအ်ထၜိုတ်ခွာတ်ထၜိုတ်ဟွံမာန်တံ နွံမံၚ်ဗွဲမဂၠိုၚ်တုဲ သွက်ဂွံပလံၚ်ပ္တိုန် နူကဵုဂၠံၚ်တရဴပရေၚ်ကူသာန်သွံရာန် ဗၞိက်ပယျဵုဗီုကၠာတေံဂှ် ဒှ်မံၚ်အခက်အခုဲရဂှ် ဟီုကဵုသြၚ်လောန်တိုၚ်မ်ရ။
“လ္ဂောံကဵုအကာဲအရာပြဟ်ဟ်ဏံမ္ဂး ပ္ဍဲဒၞါဲဒှ်မံၚ်ပၞာန်တံဂှ် ကၠအ်ထၜိုတ်ဟွံဂွံခွာတ်ထၜိုတ်တံ နွံကၠုၚ်ဗွဲမဂၠိုၚ်ရ။ နကဵုတၚ်ၜါဂှ် ပိုဲတံအာကဵုကမၠောန်ဏံတှ်ေ ကၠာတေံအခိၚ်ဍေံတံဟီု လျိုၚ်တာန်ပိကိုဋ်ဂှ်တှ်ေ ပ္ဍဲတွဵုရးဍုၚ်မန်ဂှ် တိတ်ၜိုတ်မွဲကိုဋ်။ အခိၚ်တိတ်မံၚ်ၜိုတ်မွဲကိုဋ်ဂှ် သ္ပပဓါန်ကဵုပရေၚ်ကူသာန်သွံရာန်ဗၞိက်ပယျဵုတုဲတှ်ေ တိတ်နူကဵုပရေၚ်ကူသာန်သွံရာန်ပယျဵုဂှ်ဂၠိုၚ်ရ။ ပ္ဍဲသၞာံဏံဟီုတှ်ေ တိတ်နူပရေၚ်ကူသာန်သွံရာန်ဗၞိက်ပယျဵုဂှ် အောန်အာကွေံကွေံယျ”ဂှ် သ္ဂးရ။
မွဲလ္ပာ်ပၠန်ဂှ် တၠကမၠောန်ထၜိုတ်တံဂှ် ဟိုတ်နူပေါဲဗ္တိုက်တုဲ သွက်ဂွံပလံၚ်ပ္တိုန်ထၜိုတ် နူကဵုဂၠံၚ်တရဴ ပရေၚ်ကူသာန်သွံရာန်ဗၞိက်ပယျဵုတံဂှ် အခက်အခုဲနွံမံၚ်တုဲ ဟိုတ်နူဒးပလံၚ်ပ္တိုန်မံၚ် နကဵုက္ၜၚ်နူကဵုဂၠံၚ်ဍာ်တံဂှ်ရ ဒးဒုၚ်စသိုၚ်မံၚ် ဘဲဒဏ်စရိတ်အိုတ်ဇၞော်သၠုၚ် ဇၞော်ကဵုဇြဟတ်ရ။
သ္အာၚ်နူဂှ်ပၠန် ဟိုတ်နူအပြံၚ်အလှာဲဥတုရာသဳသၞာံဏံတုဲ အခိၚ်တၞးထၜိုတ်ပြဟ် ပြဟ်ကၠုၚ်ဂှ်ရ ဒမြိပ်ထၜိုတ်တိတ်အောန်စှ်ေကၠုၚ် တီတီဒှ်ဒှ်တုဲ ကၠအ်ထၜိုတ်ဗွဲမဂၠိုၚ် ကၟာတ်သီလဝ်ကမၠောန်ရဂှ် ဂွံတီကေတ် အတိုၚ်လဟီု တၠကမၠောန်ကၠအ်ထၜိုတ်တံရ။
က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော်မေန်အံၚ်လှာၚ်ဂှ် ပ္ဍဲဍုၚ်ဂှ် သွက်ဂွံဖအောန်ဖျေံ ဗၞိက်ပၠုပ်ထၜိုတ်တံကဵု သွက်ဂွံကၠောန်ပ္တိတ် ဗၞိက်ပ္တိတ်ကဆံၚ်သၠုၚ်တံဂှ် ဟီုဂးကဵုကၠုၚ်ဇြဟတ်ဂရိုဟ် ပ္ဍဲဖိုရာမ်ထၜိုတ်ဍုၚ်ဗၟာ ၂၀၂၃ ကၠောန်ဗဒှ်လဝ် ပ္ဍဲဂိတုနိုဝေန်ဗာ (၉) သၞာံတုဲကၠုၚ်တေံရ။
ထၜိုတ်ဍုၚ်ဗၟာတံဂှ် ပ္ဍဲတွဵုရးဍုၚ်မန်၊ ရးတၞၚ်သြဳကဵု တွဵုရးကရေၚ်တံဂှ် တိတ်ဒၟံၚ်ဂၠိုၚ်အိုတ်တုဲ ထၜိုတ်တိတ်ကၠုၚ် ၇၅ တၟံကၠံတံဂှ် ပလံၚ်ပ္တိုန်သွံတြးမံၚ်ဍုၚ်ကြုက်တုဲ ထၜိုတ်သှ်ေတံဂှ်တှ်ေ ပလံၚ်ပ္တိုန်ဒၟံၚ် မ္ၚးနူဍုၚ်သေံ၊ သေၚ်္ကာပေါဝ်၊ မလေဝ်ယှာ၊ အေန်ဒိုနဳယှာတံဂှ် ပလံၚ်ပ္တိုန်မံၚ် ဍုၚ်တၞဟ်ဟ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်မ်
ဗီု-CJ