ၜဳကလေၚ်၊ ဂျာန္နဝါရဳ ၂၀
ပေါဲဗ္တိုက်ဟွံမွဲမွဲသာ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် ပ္ဍဲကဵုကွာန် (တက်တူးကုန်း) ၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ်တုဲ ညးဗြဴ ၃ တၠ ချိုတ်တုဲ ၇ တၠ ကလိဂွံလဝ်ဝပ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဂျာန္နဝါရဳ ၁၉ အခိၚ်နူဂယး ၜိုတ် ၁၁ နာဍဳ နူကဵုဒပ်အမၠံက်ဇြဳဝန်ကံၚ်ဇြဳပၞာန် ဖျေံသ္ဇိုၚ်ၜဳကလေၚ် ပန်စုတ်လဝ် လွဟ်ဇၞော် ၂ မ အပ္ဍဲကွာန် (တက်တူးကုန်း) ဒၞါဲညးဍုၚ်ကွာန်ကောန်အရာပ်တံ မမံၚ်တန်တဴဒၟံၚ်ဂှ်ရ။
မကမ်လွဟ်ဇၞော် ဒပ်ကံၚ်ဇြဳပၞာန်တံ မပန်ပှော်စုတ်လဝ်ဂှ်ဝွံ ဟိုတ်နူဒတုံဗ္တိုဟ်ထ္ကးအာလဝ် လ္တူသ္ၚိဒၟံၚ်အပ္ဍဲကွာန်ဂှ် ၜါမဂှ်တုဲ ဒးအာလဝ် မစန္ဒာ အာယုက် ၂၂ သၞာံ၊ ဒဝ်နဝ်မူ အာယုက် ၄၉ သၞာံတုဲ ချိုတ်အာလဝ်ရ။
သ္အာၚ်နူဂှ်ပၠန် မာၚ်ယျေဝ်ယျေတ်အံၚ် အာယုက် ၂ သၞာံ၊ ညးဗြဴဒေသ ဒဝ်တဝ်တာ၊ ဒဝ်ခေန်တာန်၊ ဒဝ်ခေန်ဝေန်လှိုၚ်၊ မဝါဝါတေန် တံပါလုပ်ဂှ် ညးဒေသ ၇ တၠ ဒးမကမ်လွဟ်ဇၞော် ကလိဂွံလဝ်ဝပ်အိုတ်ရ။
ကွာန်(တက်တူးကုန်း) ဒပ်ကံၚ်ဇြဳပၞာန်တံ ပန်ပှော်လဝ်လွဟ်ဇၞော်ဂှ်ဝွံ ဒှ်တိဍာ်အုပ်ဓုပ် ပွိုၚ်ဍုၚ်ၜဳကလေၚ်၊ ခရိုၚ်သဓီု ဒပ်မဟာ (၁) ဗော်သွးကောန်ဂကူကရေၚ် KNU ဂှ် ဂွံတီကေတ်ရ။
တုဲကၠုၚ် ပ္ဍဲဂိတုဂျာန္နဝါရဳ ၁၈ တေံဂှ်လေဝ် ဒၟါနူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် အကြာကွာန်ကအ်လှာၚ်ကဵု ကွာန်(ကုလားကုန်း) ပွိုၚ်ဍုၚ်သဓီုတံဂှ်တုဲ ညးဒေသကွာန်ကအ်လှာၚ် သဝ်တာန်မျေတ် ကေုာံ နဝ်ကူကူတံ သမ္ဘာတၠသ္ၚိၜါတၠ ကလိဂွံလဝ်ဝပ်ရ။
ပ္ဍဲကဵုပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်သဓီု မဒှ်တိဍာ်ခရိုၚ်သဓီု ဗော်သွးကောန်ဂကူကရေၚ် KNU တံဂှ် စနူသၞာံဏံမံက်တုဲ ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံ သီုဗ္တံသီုတ္ၚဲဂှ်တုဲ ညးဒေသတံ ဇီုကပိုက်ချိုတ်အာတံ နွံဒၟံၚ်တုဲ ညးဍုၚ်ကွာန်ကောန်အရာပ် ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ