မတ်မလီု၊ ဂျာန္နဝါရဳ ၂၀
ပ္ဍဲတိဍာ်အုပ်ဓုပ်ဗော်သွးကောန်ဂကူကရေၚ် KNU ဂှ် အပ္ဍဲသၞာံ ၂၀၂၃ တုဲကၠုၚ်တေံ ပွိုၚ်မွဲသၞာံ ဟိုတ်နူဒပ်ကံၚ်ဇြဳပၞာန် ပန်ပှော်ဗ္တိုက်ပြိုက်ဂစိုတ်လဝ် ကေုာံ ဖံက်ပကဝ်လဝ်အခေါၚ်အရာမၞိဟ်တံဂှ်တုဲ ညးဍုၚ်ကွာန်ကောန်အရာပ် ဗ္ဒါဲ ၂၀၀ ဒးချိုတ်အာလဝ်ရောၚ် ဌာနဗဟဵု လလောၚ်ပ္တိတ်လဝ်ရ။
ဒပ်ကံၚ်ဇြဳပၞာန်ဝွံ ဗ္တိုက်ကဵုတရဴကျာ လ္တူညးဍုၚ်ကွာန်တံဂှ်ကီု၊ ပန်ပှော်လွဟ်ဇၞော်လွဟ်ဍောတ်တံဂှ်ကီု၊ ဖံက်ခတိုဟ်မာၚ်၊ ရပ်ပဝ်တာ ကေုာံ စကာနဒဒှ်ဇွောံစဵုဒၞါပၞာန်၊ ရပ်ဒက်ဍဵုဍိုက်တံပါလုပ်ဂှ် ကၠောန်သ္ပလဝ် ဒဒှ်မဖံက်ပ္ကဝ်အခေါၚ်အရာမၞိဟ် ၁၈ သာ်၊ ဟွံအောန်နူကဵု ၃၀၀၀ ဝါဂှ် ဂွံတီကေတ် အတိုၚ်တၚ်လလောၚ်တြးရ။
ဟိုတ်နူဒပ်ကံၚ်ဇြဳပၞာန် ပန်ပှော်ဗ္တိုက်ပြိုက်ဂစိုတ်လဝ်ဂှ်ကဵု ဖံက်ပ္ကဝ်အခေါၚ်အရာမၞိဟ်တံဂှ်တုဲ အပ္ဍဲပွိုၚ်မွဲသၞာံ ညးဍုၚ်ကွာန်ကောန်အရာပ်ဒေသ ၁၉၆ တၠ ချိုတ်လဝ်တုဲ ၆၆၁ တၠ ဇီုကပိုက်ကလိဂွံလဝ်ဝပ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် ဘာကျာ် ၁၈ မ၊ ဘာလေံကျာ် ၂၅ မ၊ ဗလဳ ၁ မ၊ ဘာဗ္တောန်လိက် ၁၆ မ၊ ဗ္ဒမ်ကဵုဂဥုဲ ၂ မ၊ ရုၚ်ဂဥုဲ ၅ မ၊ စမြိုၚ်ညးဍုၚ်ကွာန် ၉၁ မ၊ ကၠအ်တဵုလွဳ ၁၁ ကေုာံ သ္ၚိ ၁၈၆၉ မ ဟွံအောန် ဇီုကပိုက်လီုလာ်ဆောံလေၚ်လဝ်ဂှ် ထ္မံက်ထ္ၜးလဝ်ရ။
အပ္ဍဲသၞာံ ၂၀၂၃ တုဲကၠုၚ်တေံ ပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်ဝွံ သာသ္ကာတ်မြဟ်ဂၠိုၚ်ကၠုၚ်လဝ်တုဲ ပ္ဍဲသၞာံ ၂၀၂၄ ဂိတုဂျာန္နဝါရဳဂှ်လေဝ် ပရေၚ်ဗ္တိုက်တရဴကျာ ကေုာံ လွဟ်ဇၞော် ဒပ်ကံၚ်ဇြဳပၞာန်တံ ဆက်က္တဵုဒှ်ဒၟံၚ်ရောၚ် ညးဒုၚ်တာလျိုၚ်ဆဝ်မ္ၚုဟ်စန်ဒက် ဂကောံအခေါၚ်အရာမၞိဟ်ကရေၚ် KHRG သဝ်နန္ဒသူ ဟီုရ။
“ပ္ဍဲသၞာံ ၂၀၂၃ မွဲသၞာံဂှ် ဟိုတ်နူပေါဲဗ္တိုက်ဆက်က္တဵုဒှ်ဒၟံၚ်တံဂှ်တုဲ သီုကဵုပရေၚ်ပန်ပှော်လွဟ်ဇၞော် ကေုာံ ပရေၚ်ပန်ပှော်ကဵုက္ၜၚ်ကျာတံဂှ်တုဲ ဗွဲဒိုဟ်အဂၞဲဍုၚ်ဗၟာ အပ္ဍဲတွဵုရးကရေၚ်ဂှ်ဟီုတှ်ေ ညးဍုၚ်ကွာန်ကောန်အရာပ်တံ ဇီုကပိုက်ဒးချိုတ်အာတံ နွံလဝ်တၟာဂလိုၚ်ရ။ အပ္ဍဲသၞာံ ၂၀၂၄ ဏံလေဝ် အကာဲအရာဂှ် ဆက်တုဲပရေံဒၟံၚ် ဗီုကဵုသၞာံ ၂၀၂၃ တေံဖိုဟ်ရ။ ဗွဲတၟေၚ် ပရေၚ်ဗ္တိုက်တရဴကျာတံ ဆက်က္တဵုဒှ်ဒၟံၚ်ရ။ အခေါၚ်အရာမၞိဟ်သ္ဇိုၚ် မပ္တံကဵုညးဍုၚ်ကွာန်ဒေသတံ အခေါၚ်ဂွံဂျိုၚ်လမျီုဗွဲမဗၠးဘဲဂီုကၠီု၊ အခေါၚ်ဂယျိုၚ်လမျီု အခေါၚ်ဗ္တောန်ပညာ၊ ပရေၚ်ထတ်ယုက်တံဂှ် ဆက်တုဲဒးဒုၚ်ဖံက်ပ္ကဝ်ဒၟံၚ်ရ” သာ်ဝွံ သဝ်နန္ဒသူ သ္ဂးရ။
ဒပ်ကံၚ်ဇြဳပၞာန် မကျဗြံကၠုၚ်ဒၟံၚ် အပ္ဍဲပေါဲဗ္တိုက် တိဍာ်အုပ်ဓုပ်ကဝ်တူလေဝ်တံဂှ်ဝွံ စွံကၠုၚ်ပွန်ကုညးဍုၚ်ကွာန်တံ ညံၚ်ရဴသၞတုဲ ပရေၚ်ပန်ပှော်ဗ္တိုက်လွဟ်ဇၞော်တံ၊ ဟိုတ်နူပရေၚ်ဗ္တိုက်တရဴကျာတံတုဲ အပ္ဍဲပွိုၚ် ၃ သၞာံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ ၇ ကိုဋ်ဘာ်ပြၚ် နွံကၠုၚ်လဝ်ဂှ် KNU ဗဟဵု လလောၚ်ပ္တိတ်လဝ်ရ။
အပ္ဍဲပွိုၚ်မွဲသၞာံတုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံ ပါလုပ်သီုကဵုဒပ်စဵုဒၞါကောန်ဂကူကရေၚ် KNDO ၊ ဒပ်ပၞာန်ဗၠးၜးကောန်ဂကူကရေၚ် KNLA တံဂှ် ပေါဲဗ္တိုက်အပံၚ် က္တဵုဒှ်လဝ် စဵုကဵု ၄၆၀၀ ဝါရ။
အပ္ဍဲပေါဲဗ္တိုက်ဂှ် လ္ပာ်ဒပ်ကံၚ်ဇြဳပၞာန် ပါလုပ်သီုကဵုသၞာဲဒဴတံဂှ် ကောန်ဒပ် ၅၀၀၀ ပြၚ် ချိုတ်အာလဝ်တုဲ ၃၃၀၀ ပြၚ် ကလိဂွံလဝ်ဝပ်တုဲ လ္ပာ်ဂကောံဒပ်ပၠန်ဂတးတံဂှ် ၁၅၄ တၠ ချိုတ်လဝ်တုဲ ဗ္ဒါဲ ၆၀၀ ဇီုကပိုက်ကလိဂွံလဝ်ဝပ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−KNU