နေဗျဳဒဝ်၊ ဂျာန္နဝါရဳ ၂၁
အခိၚ်ကာလသီအဝဵု ကြပ်ပေၚ်ပိသၞာံဏံ သွက်ဂွံလှာဲမၞိဟ် ဒၞါဲသ္ကိုပ်က္ဍိုက်ပ်ကာစဵုဒၞါဒပ်ပၞာန်ဂှ် ညးထံက်ဂလာန်ဒပ်ပၞာန်တံကဵု သၚ်ချဳဒရာၚ်ပရေၚ်ဂကူ ဥူအရိယာဝံသ မၞိဟ်တီဂၠိုၚ် (ပေါက်ကိုယ်တော်) တံ အာတ်မိက်ကၠုၚ် ဗွဲကိုပ်ကၠာအိုတ်ရ။
ပ္ဍဲဂိတုဂျာန္နဝါရဳ ၁၆ ပ္ဍဲကဵုရးမာန္တလေဝ် လ္တူဍုၚ်ပျေန်ဥူလွေန် (ပေါက်ကိုယ်တော်) သ္ကိုပ်သ္ကတုဲ ပ္ဍဲကဵုပေါဲထ္ၜးလဝ်ဆန္ဒ ဒစဵုဒစး စပ်ကဵုလ္တူပြဝ ကောန်ပၞာန် MNDAA မွဲတၠ ၜုၚ်လဝ်ကျာ်စေတဳ ကဵုလေံဍံက်ဂှ်တုဲ အာတ်မိက်လဝ်ရ။
ပ္ဍဲကဵုပေါဲထ္ၜးဆန္ဒဏံ ခမဳသၚ်ဂမၠိုၚ်ကီု ကောန်ပၞာန်တြေံတြေံဂမၠိုၚ် သီုကဵုကောန်ဗော်ပျဳခိုၚ်ဖျဵုဂမၠိုၚ် ညးသ္ဍိုက်ဆာန်ဒပ်ပၞာန်ဂမၠိုၚ် အပံၚ်ဖအိုတ် ၜိုတ်ဗၞတ် ၃၂၀၀ ပါလုပ်လဝ်ဂှ် ထ္မံက်ထ္ၜးလဝ် ပ္ဍဲကဵုချာန်နေဝ်ထလဳဂရာမ် တြးဝါဒဒပ်ပၞာန်ရ။
ပ္ဍဲကဵုခဠာတ် ညးထံက်ဂလာန်ဒပ်ပၞာန် ဂၠိုၚ်ကဵုကၠံနွံဒၟံၚ်ဂှ် (ပေါက်ကိုယ်တော်) ဟီုတွံလဝ် လ္တူစၚ် ဒၞါဲကဆံၚ်ဌာနန္တရ သ္ကိုပ်က္ဍိုက်ပ်ကာစဵုဒၞါပၞာန်ဂှ် သွက်ဂွံကဵုထောံ ဒုသ္ကိုပ်ပၞာန်ဇၞော် သဵုဝေန် မဒှ်ရ။
ညးထံက်ဂလာန်ဒပ်ပၞာန် ကလၚ်ဒၟံၚ်သၟဝ်စၚ်တံဂှ်ဂမၠိုၚ် သွက်ဂွံကဵုထောံ ဒါကာဘာဇၞော် သ္ကိုပ်ပၞာန်ဇၞော် မေန်အံၚ်လှာၚ် မကိတ်ညဳကဵု ကဆံၚ်ဌာနန္တရသ္ကိုပ်ဝန်ဇၞော်အရာပ်ဂှ် ဘိုၚ်ထံက်လဝ်ဂလာန်အိုတ်တုဲ (ပေါက်ကိုယ်တော်) ဂှ်လေဝ် ဟီုတွံလဝ် လအာတုပ်သာ်ဂှ်ကီုရ။
ညးလ္ၚတ်သ္ၚဳဂၠိပ် ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် အာတ်မိက်ကၠုၚ်သာ်ဏံဂှ်ဝွံ က္ဍိုပ်သ္ကိုပ်ပၞာန် ဟိုတ်နူဍာ်ဒကေဝ် ထိၚ်ဒဝ်စဵုဒၞါကဵု ဒပ်ပၞာန်ဟွံမွဲဂှ်ရ သၟဝ်ပၠတရဴညးဂှ် ဒပ်ပၞာန် ဒှ်ကၠုၚ်ဒၟံၚ်အကာဲအရာ ကျဗြံဒၟံၚ် သိက္ခာစှ်ေဒၟံၚ်ဇၞော်ဇၞော်ဂှ် သ္ၚဳဂၠိပ်လဝ်ရ။
“အာတ်မိက်ကၠုၚ်သာ်ဏံဂှ်ဝွံ သၟဝ်ပၠတရဴ သ္ကိုပ်ပၞာန်ဇၞော် မေန်အံၚ်လှာၚ်ဂှ် ဒပ်ပၞာန်ဗၟာ ဒှ်ကၠုၚ်ဒၟံၚ်အကာဲအရာ ကျဗြံဒၟံၚ် သိက္ခာစှ်ေကၠုၚ်ဒၟံၚ်တုဲတုဲယျဏောၚ်။ လၟေၚ်ဒဒှ် မၞိဟ် ၄၂၀၀ တၠပြၚ် ပါလုပ်သီုကဵုသ္ကိုပ်ဒစက ၆ တၠ ဖျေံလဝ်လွဟ် ပ္ဍဲလံက်ကိုၚ်ဂှ်လေဝ် ညာန်ညေဲဒၟံၚ် ပ္ဍဲဒပ်ပၞာန်သၟးဟွံက သီုကဵုအလုံဂၠးမွဲဏောၚ်။ ဒးဟီုမ္ဂး နကဵုသ္ကိုပ်ပၞာန်ဇၞော် မေန်အံၚ်လှာၚ် ဟိုတ်နူဍာ်ဒကေဝ် ကေတ်တာလျိုၚ် ထိၚ်ဒဝ်စဵုဒၞါဒပ်ပၞာန်ဟွံမွဲဂှ်ရ သွက်ဂွံလှဲပြံၚ်ကဵုအဝဵု ဒုသ္ကိုပ်ပၞာန်ဇၞော် သဵုဝေန်ဂှ် အာတ်မိက်ပ္တိုန်ထ္ၜးကၠုၚ်ရ။ ဆ္ဂး လညာတ်ပိုယ်တံမ္ဂး ထ္ပက်စုတ်အဇာ ဒၞါဲသ္ကိုပ်ဒပ်ဂှ်ကီုလေဝ် ပေါဲဒပ်ပၞာန်ကျဗြံဒၟံၚ်ဇၞော်ကဵုဇြဟတ်ဂှ် သာ်လဵုမှ တာဒၞါဟွံဂွံရ” သာ်ဝွံ သ္ဂးရ။
ပ္ဍဲသၞာံ ၂၀၁၁ တေံ က္ဍိုပ်သ္ကိုပ်ပၞာန်တြေံ သ္ကိုပ်ပၞာန်ဇၞော် တာန်ယှိုဲ လှဲပြံၚ်ခါန်ကၞက်ကဵုလဝ် သ္ကိုပ်ပၞာန်ဇၞော် မေန်အံၚ်လှာၚ် ကဆံၚ်ဌာနန္တရ သ္ကိုပ်က္ဍိုက်ပ်ကာစဵုဒၞါဒပ်ပၞာန်ရ။
ဆ္ဂး ဟိုတ်နူပရေၚ်သီအဝဵု သ္ကိုပ်ပၞာန်ဇၞော် မေန်အံၚ်လှာၚ် ကလေၚ်မွဲဝါပၠန်ဏံဂှ်တုဲ ပေါဲဗ္တိုက်ပလှ်ဖျေံသၞောတ်တၠအဝဵုပၞာန် မံက်ဂတဝ်ကၠုၚ် အလုံဍုၚ်မွဲပြးဇးဂှ်ဝွံ စဵုကဵုဒပ်ပၞာန် သရိုဟ်စှ်ေအာမာန်ဂှ် ကျဗြံဒၟံၚ်ရ။
ပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံသ္ကုတ်သၟဝ်ကျာ စလဝ် ပ္ဍဲဂိတုအံက်တဝ်ဗာကြပ်အိုတ် တုဲကၠုၚ်တေံဂှ်ဝွံ ဒပ်ပၞာန် ဒုၚ်ကျဖျေံကၠုၚ်လွဟ် ဇြဟတ်ဂၠိုၚ်ကဵုလ္ၚီ မွဲဟာန်ကေုာံကပေါတ်လွဟ်လက်နက်ပၞာန်ဂမၠိုၚ် အလုံတမ်ဒပ်မွဲ စဵုကဵုဌာန်ဂအုပ်ပၞာန်ကောပ်ကာဲဒေသတံဂှ်ရ။
ဣဏံဝွံ ပရေၚ်ထံက်ဂလာန် ညးထံက်ဂလာန်ဒပ်ပၞာန် ကေုာံ ဗွိုၚ်ဒပ်ပၞာန် လ္တူသ္ကိုပ်ပၞာန်ဇၞော် မေန်အံၚ်လှာၚ် မသ္ကိုပ်သ္ကဒၟံၚ် ဒပ်ပၞာန်ဂှ် စှ်ေကၠုၚ်ဒၟံၚ်တုဲ ရမျာၚ်ပါ်ပါဲတံ ဗ္တိုဟ်ထ္ကးကၠုၚ် ထတ်တ်ရ။
ဗိုလ်ဇၞော် CDM လေန်ထက်အံၚ်ဂှ် စပ်ကဵုပရေၚ်အာတ်မိက် လှာဲမၞိဟ် ဒၞါဲသ္ကိုပ်က္ဍိုက်ပ်ဂှ်တုဲ အကြာက္ဍိုပ်သ္ကိုပ်ပၞာန်တံဂှ် ပြးထ္ကးဒၟံၚ်ယျဟာ ဒှ်သံသယဂွံကီုလေဝ် အကာဲအရာလၟုဟ်ဏံဂှ်တှ်ေ ပေါဲပၠံၚ်က္ဍိုပ်သ္ကိုပ်ဒပ်ပၞာန် ဂွံဒှ်ဂှ် ဇြိုၚ်သန်ကွေံဂှ် သ္ၚဳဂၠိပ်လဝ်ရ။
“ ဒပ်ပၞာန်ဝွံ တန်တဴကဵု လ္တူတၚ်အာတ်မိက်လၟုဟ်ဏံတုဲ ဗီုပိုယ်တံထေၚ်လဝ် အကြာက္ဍိုပ်သ္ကိုပ်ဍေံတံ ထ္ကးပြးဒၟံၚ်ယျဟာဟီုဂှ် ဒးဒှ်သံသယညိညနွံဂှ် ညာတ်ရ။ ဍာံဍာံဂှ် ပ္ဍဲကဵုဒပ်ပၞာန် အကာဲအရာလၟုဟ်ဏံ ပေါဲပၠံၚ်ဒၞါဲက္ဍိုပ်သ္ကိုပ်ဂွံဒှ်ဂှ် ဇြိုၚ်သန်ကွေံကွေံဏောၚ်ဂှ် ညာတ်ကေတ်ရ။ အခိၚ်လၟုဟ် သ္ကိုပ်ဗိုလ်ပၞာန်ဗွဲမဂၠိုၚ်ဝွံ ထောံလသာကၠေံ အခေါၚ်အဝဵုညးတံဂွံလဝ်တံဂှ်တုဲ မၞိဟ်ဂံၚ်သၠးကၠေံသာ်ဏံဂှ် အောန်ကွေံဏောၚ်” သာ်ဝွံ သ္ဂးရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဝွံ ကြဴနူသီအဝဵုတုဲ မ္ၚးနူကဵုကဆံၚ်သ္ကိုပ်က္ဍိုက်ပ်ပၞာန်ဂှ် ကေမ်ၛာပ်လဝ် အဝဵုအိုဿီု ပွိုၚ်ပိသၞာံ နဒဒှ်သ္ကိုပ်ဝန်ဇၞော်ကၟိန်ဍုၚ် ကေုာံ ဥက္ကဌ ပ္ဍဲကဵုကံၚ်ဇြဳပၞာန် ဒက်ပ္တန်လဝ်ဂှ်ရ။
မွဲလ္ပာ်ပၠန်ဂှ် အခိၚ်ပပဵုပ္တိုန်အာယုက်ကာလကာတၟေၚ် ၆ ဂိတုတုဲကဵု ကၠာဂွိုအ်ပပဵုပ္တိုန်လဝ်အာယုက်ဂှ်လေဝ် အကြာအပြံၚ်အလှာဲပရေၚ်ပၞာန်၊ ပရေၚ်ဍုၚ်ကွာန် မက္တဵုဒှ်ကၠုၚ်မာန်တံဂှ် ပြံၚ်လှာဲလဝ်မၞိဟ် ကောန်ဂကောံကံၚ်ဇြဳတံကဵု သ္ကိုပ်ဗိုလ်ပၞာန်တံဂှ်ကီုလေဝ် က္ဍိုပ်သ္ကိုပ်ပၞာန်ဂှ်တှ်ေ နွံဒၟံၚ်အတိုၚ်သၞောတ်တြေံဖိုဟ်ရ။
ညးခါတ်အကာဲပရေၚ်ပၞာန်ဂမၠိုၚ် ယဝ်ရက္ဍိုပ်သ္ကိုပ်ပၞာန် အပြံၚ်အလှာဲနွံကၠုၚ်မ္ဂး ပေါဲဒပ်ပၞာန်ကျဒၟံၚ် ဍုၚ်တံ၊ ဗ္ဒိုပ်ဒပ်တံ၊ ကပေါတ်ပၞာန်ကဵုဠက်တံဂှ် သာ်လဵုမှ စဵုဒၞါမာန်ဟွံသေၚ်ပုဟ်ဂှ် သ္ၚဳဂၠိပ်လဝ်အိုတ်ရ။
မွဲလ္ပာ်ပၠန်ဂှ်လေဝ် သ္ကိုပ်ဗိုလ်ပၞာန်တံဝွံ ကဆံၚ်သၠုၚ်တိုန်က္ဍၚ် ဟိုတ်နူကၠောန်ကၠုၚ် သွက်ပူဂဵုသၟးရဂှ်တုဲ မၞိဟ်ဒတူလိုၚ် လ္ပာ်ညးဍုၚ်ကွာန်တံကဵု လ္ပာ်ဓဝ်ဍာံ ပ္ဍဲကဵုဒပ်ပၞာန်စဵုကဵုဟွံမွဲ အောန်ဒၟံၚ်ဂှ် ထံက်ထ္ၜးလဝ်ရ။
အခိၚ်လၟုဟ် ကံၚ်ဇြဳပၞာန်ဝွံ ဒးဆေၚ်ဒၟံၚ်မုက် ပၞာန်ထ္ပက် ပရေၚ်ဗ္တိုက် ဂကောံရပ်လွဟ်ကောန်ဍုၚ်အရၚ်ဂမၠိုၚ်၊ သီုကဵုဂကောံပၠန်ဂတးဂမၠိုၚ်တံဂှ်တုဲ ပ္ဍဲကဵုပရေၚ်ပၞာန် ကေုာံ ပရေၚ်အုပ်ဓုပ်တံဂှ် ဒးဆောံလေၚ်လဝ် ဟွံအောန်နူကဵု ၃၁ ဍုၚ်ရ။
အာယုက်ကာလကာတၟေၚ် မပပဵုပ္တိုန်လဝ်အာယုက် ၆ ဂိတုမွဲဝါဂှ်လေဝ် သှ်ေဒၟံၚ် ၁၀ တ္ၚဲဓဝ်တုဲ နူကဵုကောံဓရီုဂီုကၠီုစဵုဒၞါ ကၠောန်ဗဒှ်အာ ပ္ဍဲဂိတုဂျာန္နဝါရဳ ၃၁ ဏံ ညံၚ်အဝဵုဂွံတန်ကြန် ပပဵုပ္တိုန်အာယုက်သာ်လဵုတုဲ အပြံၚ်အလှာဲက္ဍိုပ်သ္ကိုပ်ပၞာန် က္တဵုဒှ်ကၠုၚ်ဏောၚ်ဟီုဂှ် ဒးမၚ်ကျောဝ်ဒၟံၚ်ဏီရောၚ် မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−MOI