မတ်မလီု၊ ဂျာန္နဝါရဳ ၂၃
ပ္ဍဲတိဍာ်အုပ်ဓုပ် ဗော်သွးကောန်ဂကူကရေၚ် KNU အပ္ဍဲအကြာတ္ၚဲတံဏံ ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ညးဍုၚ်ကွာန်ကောန်အရာပ် ၆ တၠ ချိုတ်တုဲ ၉ တၠ ကလိဂွံလဝ်ဝပ်ဂှ် ဂွံတီကေတ် အတိုၚ်တၚ်လလောၚ်တြး KNU ဗဟဵုရ။
တုဲကၠုၚ် ပ္ဍဲဂိတုဂျာန္နဝါရဳ ၁၉ တေံ ပေါဲဗ္တိုက်ဟွံမွဲမွဲသာ် နူကဵုဒပ်အမၠံက်ကံၚ်ဇြဳပၞာန် စၟတ် (၃၁၄) ပန်ပှော်စုတ်လဝ် လွဟ်ဇၞော် ၂ မ ပ္ဍဲကဵုကွာန်(တက်တူးကုန်း) ပွိုၚ်ဍုၚ်သဓီု KNU ရ။
လွဟ်ဇၞော်ဒပ်ကံၚ်ဇြဳပၞာန် မပန်ပှော်လဝ်ဂှ် ဒတုံဗ္တိုဟ်ထ္ကးအာလဝ်တုဲ နူကဵုကွာန်(တက်တူးကုန်း) ဂှ် မၞိဟ်ဗြဴ ၄ တၠ ချိုတ်တုဲ ပါလုပ်သီုကဵုကောန်ၚာ်သၟတ်တံဂှ် ကောန်အရာပ် ၆ တၠ ဇီုကပိုက်ကလိဂွံလဝ်ဝပ်ဂှ် KNU သ္ဂးလဝ်ရ။
လအာတုပ်သာ်ဂှ်ကီု ပ္ဍဲကဵုတ္ၚဲဂှ်ရ ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် ပ္ဍဲကဵုပွိုၚ်ဍုၚ်မူ KNU ဂှ်တုဲ ဒဝ်တာန် အာယုက် ၆၅ သၞာံမွဲတၠ ချိုတ်တုဲ မၞိဟ်တြုံအာယုက် ၅၀ သၞာံၜါတၠ ကလိဂွံလဝ်ဝပ်ရ။
သ္အာၚ်နူဂှ်ပၠန် ပ္ဍဲဂိတုဂျာန္နဝါရဳ ၂၀ ဂှ်လေဝ် မကမ်လွဟ်ဇၞော် ဒပ်ကံၚ်ဇြဳပၞာန် ပန်ပှော်စုတ်လဝ် ပ္ဍဲကွာန်ၚဖေဝ်အေန် ပွိုၚ်ဍုၚ်ဖျူ KNU ဒတုံဗ္တိုဟ်ထ္ကးအာလဝ်တုဲ (ညားတချား) အာယုက် ၆၇ သၞာံ ချိုတ်အာလဝ်တုဲ သဝ်နေလေန်ထောန် အာယုက် ၁၄ သၞာံ ဒးမကမ်ကလိဂွံလဝ်ဝပ်ရ။
ဒပ်ကံၚ်ဇြဳပၞာန်ဝွံ ပေါဲဗ္တိုက်ဟွံမွဲမွဲသာ် ပ္ဍဲကဵုကွာန်ညးဍုၚ်ကွာန်ကောန်အရာပ်တံ မံၚ်ဒၟံၚ်တံဂှ် လၟေၚ်ဒဒှ်တ္ၚဲ ပန်ပှော်ဒၟံၚ်လွဟ်ဇၞော်တံသၟးဟွံက ပရေၚ်ဖံက်ပ္ကဝ်အခေါၚ်အရာမၞိဟ်နာနာသာ်တံဂှ် ကလိလောန်ဒၟံၚ်အဆက်က်ရောၚ် KNU သ္ဂးရ။
ပ္ဍဲတိဍာ် KNU ဂှ် ပ္ဍဲသၞာံ ၂၀၂၃ တုဲကၠုၚ်အပ္ဍဲပွိုၚ်မွဲသၞာံတေံ ဟိုတ်နူပရေၚ်ပန်ဗ္တိုက်ပြိုက်ဂစိုတ် ဒပ်ကံၚ်ဇြဳပၞာန်တံကဵု ပရေၚ်ဝးပ္ကဝ်အခေါၚ်အရာမၞိဟ်တံဂှ်တုဲ ညးဍုၚ်ကွာန်ကောန်အရာပ် ဗ္ဒါဲ ၂၀၀ တၠ ဒးချိုတ်အာလဝ်ဂှ် ဂွံတီကေတ် အတိုၚ်တၚ်လလောၚ်တြး KNU ဗဟဵုရ။
ပရိုၚ်−သြၚ်လောန်တိုၚ်(မ်)
ဗီု−KNU