သဓီု၊ ဂျာန္နဝါရဳ ၂၂
ကောန်ဒပ်တၟိ ၆ တၠ ဂြိပ်တိတ်ကၠုၚ် သီုကဵုလွဟ်လက်နက် နူကဵုဘာပ္ကတ်ပ္ကေၚ်ကံၚ်ဇြဳပၞာန် စၟတ် (၉) ဖျေံသ္ဇိုၚ်ကွာန်ဇြယေတ်ချံၚ် ပွိုၚ်ဍုၚ်သဓီု၊ တွဵုရးဍုၚ်မန်ဂှ် ဒးဒုၚ်ပန်ဂစိုတ်တုဲ ချိုတ်အာလဝ်ဂှ် ဂၠိုက်ဂၠါဲဂွံတီကေတ် နူကဵုပရိုၚ်တမ်ရိုဟ်အပ္ဍဲဒပ်တံရ။
တုဲကၠုၚ် ပ္ဍဲဂိတုဂျာန္နဝါရဳ ၂၀ တေံ ကောန်ဒပ်တၟိ ၉ တၠ ဂြိပ်တိတ်ကၠုၚ် နူကဵုဘာပ္ကတ်ပ္ကေၚ် စၟတ် (၉) သီုကဵုလွဟ်လက်နက်တံဂှ် အခိၚ်ဒပ်ကံၚ်ဇြဳပၞာန် ဗက်ရပ်ဒက်ဂှ် က္တဵုဒှ်လဝ် ပရေၚ်ပန်ပှော် ပ္ဍဲကဵုဝါဗ္ၚ ဗ္ဒါဲကွာန်ကတိုက်ကျဳရ။
အပ္ဍဲပရေၚ်ပန်ပှော်ဏံ ကောန်ဒပ်တၟိ ၆ တၠ ချိုတ်အာလဝ်တုဲ ရပ်ဂွံဏာ ၁ တၠ ဂျိုၚ်ၚ်တုဲ ၂ တၠ ဂြိပ်ဗၠးအာဂှ် ဂွံတီကေတ် နူကဵုပရိုၚ်တမ်ရိုဟ်အပ္ဍဲဒပ်တံရ။
ဇွကောန်ဒပ်တၟိ မချိုတ်အာလဝ် အပ္ဍဲပရေၚ်ပန်ပှော်ၜါလ္ပာ်တံဂှ် ဂအုံလဝ် ပ္ဍဲခဠာတ်ဝါ ကွာန်ကတိုက်ကျဳတုဲ စံၚ်လဝ်ရောၚ် ပရိုၚ်မံက်တိတ်ဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ဂောံသ္ပဒတန်မာန်ဂှ် ဂၠိုက်ဂၠါဲဒၟံၚ်ဖိုဟ်ရ။
ကောန်ဒပ်တၟိ ဂြိပ်တိတ်ကၠုၚ် သီုကဵုလွဟ်လက်နက်ဂမၠိုၚ်တံဂှ်ဝွံ ဒှ်ညးဒးဒုၚ်ပကောံလဝ်မၞိဟ်အတေၚ်အဓမ္မ ပ္ဍဲကဵုသၞေဟ်ကာ၊ သၞေဟ်ကွဳပၟတ် ရးဒေသဇၞော်ဗဂေါတံဏောၚ်ဂှ် ဂွံတီကေတ်ရ။
ပ္ဍဲကဵုအကံက်ထလဳဂရာမ် ရဲထံက်ဂလာန်ဒပ်ပၞာန်တံဂှ် ကောန်ဒပ်တၟိ ဂြိပ်တိတ်အာတံဂှ်ဝွံ ကြဴနူတန်ဗ္တောန်ပရေၚ်ပန်ပှော် လွဟ်လက်နက်ဍောတ် ပ္ဍဲကဵုဒပ်ပ္ကတ်ပ္ကေၚ်တံတုဲဂှ် ကေတ်အဆက်ကဵုက္ဍိုပ်သ္ကိုပ် PDF နူကဵုဒပ်မဟာ ၁ KNU မွဲတၠတုဲ ကေတ်ဏာလွဟ်လက်နက်တုဲ ဂြိပ်တိတ်အာလဝ်ရောၚ် သ္ဂးရ။
သ္အာၚ်နူဂှ်ပၠန် ကောန်ဒပ်တၟိ ဂြိပ်တိတ်တံဂှ် ၄ တၠရတုဲ အပ္ဍဲပရေၚ်ပန်ပှော်ဂှ် ၃ တၠချိုတ်တုဲ ၁ တၠ ရပ်ဂွံလဝ်ဂျိုၚ်ၚ် သီုကဵုဝပ်ဒးဂွိၚ်ဂှ် ရဲထံက်ဂလာန်ဒပ်ပၞာန်တံ ချူပ္တိုန်လဝ်တံ နွံဒၟံၚ်ရ။
ကရောၚ်ပၞာန်တပေန်ယှိုဲထဳ မဒှ်ကရောၚ်ပၞာန်ပၠန်ဂတးဂှ် သွက်ဂွံရီု ကောန်ဒပ်တၟိ ၂ တၠ ဂြိပ်ဗၠးအာတံဂှ် ဆက်ဂၠိုက်ဂၠါဲဒၟံၚ်ဖိုဟ်ရောၚ် ပ္ဍဲဂိတုဂျာန္နဝါရဳ ၂၂ တေံ လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media