ကအ်ကြိက်၊ ဂျာန္နဝါရဳ ၂၃
တွဵုရးကရေၚ်၊ လ္တူဍုၚ်ကအ်ကြိက်ဂှ် အကြာဂကောံဇြဟတ်ပၠန်ဂတးတံကဵု ဒပ်ကံၚ်ဇြဳပၞာန်တံ ပေါဲဗ္တိုက် ဆက်က္တဵုဒှ်ဒၟံၚ်တုဲ သ္ၚိဒၟံၚ်ညးပါဲဒဴဘဲပၞာန်တံ ဗ္ဒါဲ ၅၀ ပၟတ်တူလီုလာ်အာလဝ်ပၠန်ဂှ် ဂွံတီကေတ် ဇရေၚ်ညးဒေသလ္တူဍုၚ်တံရ။
တုဲကၠုၚ် ပ္ဍဲဂိတုဂျာန္နဝါရဳ ၂၁ တေံ သ္ၚိဒၟံၚ် ၜိုတ် ၅၀ မ နူကဵုလ္တူဂၠံၚ်ရတနာ အရာပ်စၟတ် (၅) ဍုၚ်ကအ်ကြိက် ပၟတ်တူလီုလာ်အာလဝ်တုဲ သ္ၚိဒၟံၚ်ပၟတ်တူလီုလာ်အာတံဏံဝွံ ဒှ်သ္ၚိဒၟံၚ်ညးဍုၚ်ကွာန်ပါဲဒဴဘဲပၞာန်တံဂှ် သ္ဂးရ။
သ္ၚိဒၟံၚ်ပၟတ်တူလီုလာ်အာဂှ်ဝွံ ညးဒေသကအ်ကြိက်မွဲတၠဂှ် ‘‘ဒၟါနူပၟတ်စံၚ်” ဏောၚ်ဂးတုဲ ဂကောံလဵု စံၚ်လဝ်ရောဟီုဂှ် ပြဟ်ဟ်ဏံ ဟွံဂွံတီကေတ်ဏီရ။
ပ္ဍဲဂိတုဂျာန္နဝါရဳ ၂၂ ဂှ်လေဝ် လ္တူဍုၚ်ကအ်ကြိက်ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ ပေါဲဗ္တိုက်ၜါလ္ပာ် ဆက်က္တဵုဒှ်ဒၟံၚ်ဂှ်လေဝ် ဂွံတီကေတ်ရ။
လ္တူဍုၚ်ကအ်ကြိက်ဂှ် အခိၚ်ပေါဲဗ္တိုက်စက္တဵုဒှ် ပပ္တံနူဂိတုဒဳဇြေမ်ဗာ ၁ သၞာံ ၂၀၂၃ တုဲကၠုၚ်တေံတုဲ ညးဍုၚ်ကွာန်ဒေသတံဝွံ ဒးဂြိပ်ဒဴပါဲဒလေတ်လဝ် နူကဵုဍုၚ်ရ။
သ္ၚိဒၟံၚ် ဒးဂြိပ်ဒဴပါဲဒလေတ်ဒၟံၚ် နူကဵုဍုၚ်ကအ်ကြိက်တံဂှ်ဝွံ ဟိုတ်နူပရေၚ်ဗ္တိုက်ပန်ပှော်တရဴကျာ ကေုာံ လွဟ်ဇၞော်တံတုဲ မ္ၚးနူကဵုဇီုကပိုက်လီုလာ်ဂှ် သီုကဵုဒးဒုၚ်စံၚ်ပလီုပလာ်လဝ်တံလေဝ် နွံဒၟံၚ်ရ။
ဟိုတ်နူလၟေၚ်ဒဒှ်ပၟတ်တူ လ္တူဍုၚ်ကအ်ကြိက်ဂှ်တုဲ သ္ၚိဒၟံၚ်ညးဍုၚ်ကွာန်ဒေသ ၁၀၀ ပြၚ် ဒးဆောံလေၚ်လီုလာ်အာလဝ်တုဲ ဒဒှ်မပၟတ်တူဂှ်ဝွံ နူကဵုပၟတ်စံၚ်မွဲကဆံၚ် တူထၞာန်လဝ်ဏောၚ်ဂှ် ဂွံတီကေတ် ဇရေၚ်ညးဒေသတံရ။
အခိၚ်ညးဒေသကအ်ကြိက်တံ ဒးပါဲဒဴဒၟံၚ်ဘဲပၞာန်ဂှ် သ္ၚိဒၟံၚ်လ္တူဍုၚ်ကအ်ကြိက်တံဂှ် ကမၠတ်ကၠတ်ဂၠံက် နွံဒၟံၚ်တုဲ ညးဍုၚ်ကွာန်ဒေသ ကလေၚ်စဴကၠုၚ် ဌာန်ဒၟံၚ်တံဂှ်လေဝ် ဒးဒုၚ်ပန်ဂစိုတ်လဝ် ကဵုသေနာတ်တုဲ လမျီုဒးအိုတ်ဇီုကပိုက်တံ က္တဵုဒှ်ဒၟံၚ် နွံဒၟံၚ်ရ။
ပ္ဍဲကဵုပေါဲဗ္တိုက်ဍုၚ်ကအ်ကြိက် လအ်ကၠုၚ်ပွိုၚ် ၁ ဂိတုပြၚ်ဂှ် ညးဍုၚ်ကွာန်ကောန်အရာပ်ဗွဲမဂၠိုၚ်ဂၠေၚ် ဇီုကပိုက်ချိုတ်ဂျိုၚ် ကလိဂွံလဝ်ဝပ်တုဲ ညးဍုၚ်ကွာန်ဂၠိုၚ်ကဵုဠက် ဒးဂြိပ်ဒဴပါဲဒလေတ်လဝ် ဒၞါဲဗၠးဘဲရ။
ပရိုၚ်−သြၚ်လောန်တိုၚ်(မ်)
ဗီု−CJ