မတ်မလီု၊ ဂျာန္နဝါရဳ ၂၃
ပ္ဍဲတွဵုရးဍုၚ်မန် ဂကောံပၞာန်ပျဳတုသေတ် ဒပ်ပၞာန်ဒက်ပ္တန်လဝ် ဒေသကော် ဂကောံပျူသဝ်ထဳတံဝွံ ဗွဲကြဴဏံ ပံၚ်တောဲကၠောန်သ္ပကၠုၚ် ကုဒပ်ကံၚ်ဇြဳပၞာန်၊ ဂကောံဒပ်ဗၠာဲသၟိၚ်တံ ဂၠိုၚ်ကၠုၚ်ဂှ် ညးဒေသတံ ဟီုရ။
ကောန်ဂကောံပျူသဝ်ထဳတံဝွံ ဂေတ်ကၚ် ကရောံဂကောံဒပ်ဗၠာဲသၟိၚ် သၟဝ်တဲကံၚ်ဇြဳပၞာန်တံဂှ်ကီု၊ လုပ်စိုပ်စၟဳတ် စရၚ်ကၟုဲတံဂှ်သၟးဟွံက ပ္ဍဲကဵုဒၞါဲစၟဳတ် နကဵုတၚ်ထ္ၜးဟိုတ်ပရေၚ်ဂီုကၠီုတံဂှ်လေဝ် ပါလုပ်ကၠုၚ်ကီုရ။
ပ္ဍဲဒၞါဲစၟဳတ် ညးဍုၚ်ကွာန်ဒေသတံ နကဵုဟိုတ်ပရေၚ်ဂီုကၠီုတံဂှ်လေဝ် ကၠောန်သ္ပရပ်ဒက်ၜုၚ်တက်ကၠုၚ်တုဲ ပပ္တံနူကဵုအာတ်မိက်ဘပဠသြန် အတေၚ်အဓမ္မတံဂှ် သာတုဲကၠောန်ၜိုတ်ကၠုၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
ညးဒေသမတ်မလီုမွဲတၠဂှ် ကောန်ဂကောံပျူသဝ်ထဳ ကံၚ်ဇြဳပၞာန်တံ မကဵုလဝ်လွဟ်လက်နက်တံဂှ်ဝွံ ဗွဲကြဴဏံ ပပ္တံနူကဵုဂေတ်ကၚ်အပ္ဍဲဍုၚ်တံဂှ် ပူဗိုၚ်ပံၚ်တောဲပါလုပ်ကၠုၚ်တံဂှ် ဂွံဆဵုကေတ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လၟုဟ်မ္ဂးတှ်ေ သီုလ္တူဍုၚ်မတ်မလီု သီုဍုၚ်တၞဟ်ဟ်တံရ။ ဥပမာ−ပ္ဍဲကဵုဒေသ ညၚ်ရဴမုဟ်ဍုၚ်၊ ဇြပ်ဗုတံဂှ်လေဝ် ပျူသဝ်ထဳ ကေုာံ မဘသတံ က္တဵုကၠုၚ်ဒၟံၚ်ကွေံကွေံဏောၚ်။ လၟုဟ်မ္ဂး ဍေံတံ ဒှ်ကၠုၚ်သီုကဵုယူနဳဝှမ်။ ပျူသဝ်ထဳဟီုမ္ဂးလေဝ် တီဒၟံၚ်ရဏောၚ်။ ဒှ်ဒၟံၚ်ရဲနူအရာပ်တံရတှ်ေလေဝ်။ မၞိဟ်ဂျိုၚ်ကၠုၚ် နူကဵုအရာပ်တံဏံရဏောၚ်။ ညအ်ဂှ် ကဵုလဝ်လွဟ်လက်နက်။ လ္ၚဵုတံဂှ်တှ်ေ ကဵုပံၚ်မဳဂၠိဂၠိ၊ လ္ၚဵုတံဂှ်တှ်ေ လ္တက်နၚ်ပဠောံအရာပ်တံပြးဇး။ မွဲဖ္ဍိုက်ဂှ်တှ်ေ ပျူသဝ်ထဳ၊ သ္ကိုပ်က္ဍိုပ်သ္ၚိကၠံ၊ သ္ကိုပ်အုပ်ဓုပ်တံ။ ကဵုလဝ်သေနာတ်ဟီုတှ်ေ ၝတံဏံဂှ် ကၠုၚ်ဂတတုဲ ဂြဴဒၟံၚ်ဟဂှ်ရ“ သာ်ဝွံ သ္ဂးရ။
စနူအခိၚ်ဒပ်ပၞာန်သီအဝဵုတုဲ ပွိုၚ်မွဲသၞာံဘာ်ပြၚ်ဂှ် ကံၚ်ဇြဳပၞာန် စၞောန်ပ္ညုၚ်ကၠုၚ် ဂကောံပျူသဝ်ထဳတံ သွက်ဂွံဒက်ဂကောံ ပ္ဍဲကဵုကွာန်ရး၊ အရာပ် မဆေၚ်စပ်တံ ဟွံဒေါအ်ဟွံဂွံဂှ်ကဵု ဂကောံပျူသဝ်ထဳ မဒက်ပ္တန်လဝ်တံဂှ်လေဝ် သွက်ဂွံကလေၚ်ပ္ကောံပ္ကေဝ်ဇြဟတ် မဒှ်ရ။
ဗွဲကြဴဏံ ဂကောံပျူသဝ်ထဳ မဒက်ပ္တန်လဝ် နကဵုဟိုတ် ပရေၚ်ဂီုကၠီုကွာန်အရာပ်တံဂှ်ဝွံ ပ္ဍဲကဵုပါၚ်ဂၠံၚ် အရာပ်၊ ကွာန်လ္ၚဵုတံဂှ် ရပ်သေနာတ်တုဲ စဵုကဵုဒးကေတ်ဂီုကၠီု ချဳဒရာၚ်ကၠုၚ်ဂှ် ဂွံဆဵုကေတ်ရ။
ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF နာဲနဂါဂှ် နကဵုပျူသဝ်ထဳဂမၠိုၚ် ဍဵုဍိုက်ပျဲပျာံဒၟံၚ် ညးဍုၚ်ကွာန်တံဂှ် ဒေါအ်ကဵုလွာဲဂှ်တုဲ သွက်ဂွံလုပ်စိုပ်ဖျေံလွဟ်ဂှ်ကဵု မၞိဟ်ဟွံလုပ်စိုပ်ဖျေံလွဟ်တံဂှ် ၚးတးပသောၚ်အာဏောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပျူသဝ်ထဳဗွဲမဂၠိုၚ်ဂှ်တှ်ေ သွက်သ္ၚိကၟိန်ညးတံ ဂွံစရုမ်ဂပ်၊ ပရေၚ်မံၚ်စံၚ်ဂွံပြေပြံၚ်တုဲ လုပ်ကၠုၚ်ပ္ဍဲပျူသဝ်ထဳဂှ် ဂၠိုၚ်ဒၟံၚ်ဏောၚ်။ ညံၚ်သ္ၚိကၟိန်တံ ဘဝဂွံပြေပြံၚ် ဍဵုဍိုက်ပျဲပျာံဒၟံၚ်ညးဍုၚ်ကွာန်တံဂှ် ဒေါအ်ကဵုလွာဲဂှ်ညိ။ ရပ်လွဟ်တုဲ ထံက်ဂလာန်ကံၚ်ဇြဳပၞာန်ဟီုဂှ် ဒှ်သၞညးဍုၚ်ကွာန် သၟာပၠန်ဂတးတံသီုဖအိုတ်ဏောၚ်။ ဖျေံလွဟ်တုဲ လုပ်ကၠုၚ်လ္ပာ်ပိုယ်တံအိုတ်ညိ။ သာ်ဏံဟွံသေၚ်မ္ဂး ဗီုပိုယ်တံပသောၚ် စကစဂှ် ၚးတးပသောၚ်အာဏောၚ်တုဲ ဗ္တိုက်သၠေက်အာသီုကဵုမၞးတံဏောၚ်ဂှ် မိက်ဂွံဟီုရ“ သာ်ဝွံ သ္ဂးရ။
အပ္ဍဲတွဵုရး ဟိုတ်နူဂကောံပျူသဝ်ထဳတံ ကလေၚ်က္တဵုကၠုၚ်တုဲ နကဵုညးဍုၚ်ကွာန်တံ ဂီုကၠီုဟွံမွဲရတုဲ ပပ္တံနူကဵုလမျီုဒြပ်ရတ်တံဂှ် ဖျေံစိုတ်ဟွံဂွံရတုဲ သွက်ဂွံမံၚ်စံၚ်အာကၠုၚ် ဗွဲမဗၠးၜးဂှ် အခက်အခုဲနွံကၠုၚ်ဂှ် ညးဒေသတံ ဟီုဂးလဝ်ရ။
ပ္ဍဲကဵုဂကောံပျူသဝ်ထဳ ကံၚ်ဇြဳပၞာန် မဒက်ပ္တန်ကဵုလဝ်ဂှ် မ္ၚးနူကဵုကောန်ပၞာန်တြေံတြေံ၊ မဘသ ရဲစိုပ်တၞုၚ်တၞး လ္ပာ်ဘာသာတံ၊ ကောန်ဗော်ကျခိုၚ်ယျေတံဂှ် ဒက်လဝ် နကဵုညးထံက်ဂလာန်ဒပ်ပၞာန်တံဂမၠိုၚ်ရ။
ဒပ်ကံၚ်ဇြဳပၞာန် ကျဒၟံၚ်ပၞာန်အလုံဍုၚ်မွဲပြးဇး အပ္ဍဲဒပ်လေဝ် ချိုတ်ဂျိုၚ်ကၠုၚ်ဒၟံၚ်ဂှ်ဝွံ ဟိုတ်နူဇြဟတ်ဒပ်လေၚ်ဒိုက်ကၠုၚ်တုဲ ပ္ဍဲကဵုဒေသလ္ၚဵုတံဂှ် ထ္ၜးကၠုၚ်ဟိုတ် ဍုၚ်ကွာန်ဂွံၜိုဟ်သြိုဟ်ညိၚ်ဝတ်တုဲ သွက်ဂွံဂွံပၞာန်ပျဳတုသေတ် ဂကောံပျူသဝ်ထဳတံဂှ် သုၚ်စောဲနဲကဲနာနာတုဲ ပ္တိတ်ကၠုၚ်ဇြဟတ်ရ။
ကံၚ်ဇြဳပၞာန်ဝွံ စနူဂိတုဏံတုဲ ပ္ဍဲကဵုပွိုၚ်ဍုၚ် ကေုာံ ကွာန်ရး နူကဵုရးဗဂေါ၊ ရးမဂွဵု ကေုာံ ရးဨရာဝတဳတံဂှ် ကဵုကၠုၚ်ဇြဟတ်ဂရိုဟ် သ္ကိုပ်အုပ်ဓုပ်ဂမၠိုၚ် သွက်ဂွံဒက်ကဵုဂကောံပၞာန်ပျဳတုသေတ်တံဂှ် နွံကၠုၚ်ရ။
သ္ကိုပ်အုပ်ဓုပ်ကွာန်အရာပ် သၟဝ်တဲကံၚ်ဇြဳပၞာန်တံကဵု ပျူသဝ်ထဳတံဝွံ ပ္ဍဲကဵုကွာန် လၟိဟ်မၞိဟ်မၞုံ ၁၀၀ တံဂှ်ဟီုမ္ဂး သွက်ဂွံလုပ်ပၞာန်ပျဳတုသေတ်ဂှ် တဲဍိုန် ရုဲစှ်ဒၟံၚ် ၁၀ တၠတုဲ နကဵုညးဟွံမိက်ပါလုပ်ဂမၠိုၚ် ဒးကဵုဒၟံၚ်သြန် ဂၠိုၚ်ကဵုစှော်ကိုဋ်ဒ္ကေဝ်ဂှ် ဂွံတီကေတ်ရ။
က္ဍိုပ်သ္ကိုပ်ပၞာန်သီအဝဵုဂှ် အလုံဍုၚ်မွဲ ညံၚ်ဂွံညိၚ်ဝတ် သၠုၚ်ပ္တိုန်ကၠောန်ၜိုတ်အာ ပရေၚ်စဵုဒၞါ ကေုာံ ပရေၚ်ဂီုကၠီုညးဍုၚ်ကွာန်တံဏောၚ်ဂှ် ပ္ဍဲဂိတုဂျာန္နဝါရဳ ၆ တေံ အခိၚ်ဆဵုဂဗကဵု ဗော်ပရေၚ်ဍုၚ်ကွာန်ဂမၠိုၚ် ပ္ဍဲနေဗျဳဒဝ်ဂှ် ဟီုဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−ချာန်နေဝ်ထလဳဂရာမ် ကံၚ်ဇြဳပၞာန်